1. Nitoll nirmoll jivitachim, Sorvesporachi Somurt samballtat tim, khorench sukhest.
2. Tachi khuxi palltat tim, sogllea kallzan Taka sôdtat tim, khorench sukhest.
3. Koslench vaitt tim korinant, punn Tachea margan choltat.
4. Zotnaien amim Tuje kaide samballunk Tunvench te porgott keleai.
5. Tujê khuxek sodam pallo diunk mhoje pãi, mhoji chal thir asum.
6. Tujeam soglleam adniank hanvem chit dilear, konn mhaka lojek ghalcho nam.
7. Tuje promannikponnache nem’ xikun khorea kallzan Tuka dhin’vastolom.
8. Tujeô adnia pallunk mhoji khuxi, mhaka kodinch sanddum naka.
9. Tornnattim patkavinn koxim ravtolim? Tujea utrak pallo diun.
10. Sogllea mhojea kallzan Tukach hanv sodit asam, Tujeam adniam velo mhaka koddsorunk dium naka.
11. Tujer patok korinam zaunk Tujem utor hanv kallzant ballgun dovortam.
12. Tum soglleam poros vondovont, Sorvespora, Tujeô adnia mhaka xikoi.
13. Tujea tonddantle nivadde mhojeam onttamnim hanv ucharit asam.
14. Soglli dhon-grestkai mell’lolê porim Tujeam kaideanchea margar hanv sontoxi zalam.
15. Tujeô adnia hanv monant gholloitolom, Tunvem dakhoiloli vatt hanv nialltolom.
16. Tujeam kaideancher mhozo sontôs, Tujem utor hanv kodinch visorcho nam.
17. Tujea chakrak bholeponn dakhoi, mhojem jivit bhagi zaun, Tujem utor samballtolom.
18. Tuji vichitr Somurt niallunk mhojeam dolleank uzvadd di.
19. Hea sonvsarant hanv pordexi dekhun Tujeam adnianchi mhaka ollokh di.
20. Tuje nivadde ollkhun gheunk mhozo otmo otrekamnim lasta.
21. Tujeam adniank patt kortat dekhun gorvi, xirap-poddloleam mon'xank Tum dhomkaitai.
22. Punn hanv Tuji khuxi manun ghetam dekhun, tancheô kenddnniô ani khebddam mhojê-velim pois kôr.
23. Razkunvor mhojê virudh ievzunk boslear porian, hanv Tujeô adnia niallit ravtolom.
24. Tuje nivadde mhozo sontôs, Tuje kaide mhaka budh ditat.
25. Mhozo otmo dhullint lollta, Tujea utra pormannem mhaka ubar.
26. Mhoji chal Tujê mukhar ollkholom ani Tunvem zap dilii, atam Tujeô adnia mhaka xikoi.
27. Tuje kaide koxe pallche te mhaka dakhoi, ani Tujim ochoriam monant gholloun nialltolom.
28. Khontin mhozo otmo sukun veta, Tujea utra pormannem mhaka ubar.
29. Fottkirea margavelo mhaka pois kaddun vhor, upkar korun Tuji Somurt mhaka xikoi.
30. Vixvaxiponnachi vatt hanvem vinchun kaddlea, Tujeanch nivaddeank axeta mhojem kalliz.
31. Tujê khuxek hanv chikttun ravtam, mhozo visvas moddum naka, Sorvespora.
32. Tujeam kaideanchea margan hanv suddsudit vetolom, kiteak Tunvem mhojea kallzak suttka dileai.
33. Tujeam kaideanchi vatt mhaka dakhoi, Sorvespora, hanv te sodanch khuxen man’tolom.
34. Tuji Somurt samballunk mhaka xikoi, ani sogllea kallzan hanv ti palltolom.
35. Tujeam adnianchea margan mhaka choloun vhor; tancher asa mhozo sontôs.
36. Mhojem kalliz Tujê khuxechê chakrek lai, duddvachê axek mhaka lobhdunk dium naka.
37. Polkeam vostuncher mhoji nodor poddunk dium naka, Tujeach utran mhaka jivit di.
38. Tuji bhokti kortoleank Tunvem utor dilai tem Tujea chakra tthãi samball.
39. Tuje nivadde amkam borem kortat dekhun, mhaka bhirant haddtoleam khebddantlo mhaka nivar.
40. Hanv, polle, Tujeam adniam bhair kãich axenam, Tujea promannikponnan mhaka jivit di.
41. Tuzo môg mhojer denvum, Sorvespora, Tujea utra pormannem Tuji soddvonn mhaka mellum.
42. Mhaka okman kortoleank hanv porti zap ditolom, kiteak Tujea utracher hanv visvas dovortam.
43. Mhaka dil’lem visvaxiponnachem utor kaddum naka, kiteak Tujeam nivaddeancher hanv patieun ravlam.
44. Tuji Somurt visvaxiponnam samballtolom sodankal, nitekallim.
45. Tuje kaide pallunk mhoji khuxi dekhun, mukt kallzan hanv choltolom.
46. Tujê khuxechi khobor raiam mukhar kortolom ani kodinch lojek sampoddcho nam.
47. Tujeô adnia mhollear mhozo sontôs, tancho hanv sodam môg korun ailam.
48. Tujeam hukumam mukhar hat zôddtam, tancho môg kortam, Tuje nem'-monant gholloit asam.
49. Tujea chakrak dil’lea utracho ugddas kôr. Tachê vorvim Tunvem mhaka bhorvanso diloi.
50. Tujea utra vorvim mhaka jivit mellta mhonnun, mhojea dolldirponnant mhaka buzvonn mell’li.
51. Gorvixtt mon’xamnim mhaka kenddniamnim samkoch ôddchilo, punn Tujê Somurtichea margavelo hanv koddsorunk nam.
52. Tunvem magam dil’leam nivaddeancho ugddas dhôrtam: tantum mhaka buzvonn mellta, Sorvespora.
53. Patki monis Tuji Somurt soddun ditat dekhun, mhaka kanttallo bhôgta.
54. Hea pordesant hanv dis kaddtam zalear-ui, Tuje nem'-mhaka zatat buzvonnechim gitam.
55. Ratchem legun Tujem Nanv monant ieta, Sorvespora, ani Tuji Somurt hanv samballtam.
56. Tujeô adnia hanvem samball’leat: hench mhojem sukh.
57. Tujem utor pallchem mhollear mhozo daizacho vantto: oxem hanvem mhollam, Sorvespora.
58. Sogllea kallzan Tuzo upkar magtam: Tujê bhasavnnê pormannem mhoji doia kôr.
59. Mhoji chal kosli ti hanvem barkaien pollelea ani Tujê khuxechea margar hanv portun ailam.
60. Tujeam hukumank pallo diunk kallav korinastanam suddsuddaien ietam.
61. Patki monis mhojê bhonvtonnim fas manddtat, tori astanam hanv Tuji Somurt visronam.
62. Tujeam promannikponnacheam nivaddeam pasot ratcho modianir utthun Tuka argham ditam.
63. Tuji bhokti kortat ani Tuje kaide samballtat team soglleancho hanv ixtt.
64. Tujea mogan, Sorvespora, prithum’ upott bhôrlea; Tuje nem' mhaka xikoi.
65. Tujea utra pormannem, Sorvespora; Tujea chakrak Tunvem Tujem boreponn dakhoilãi.
66. Ginean ani zannvai mhaka di, kiteak hanv Tujeam adniancher patietam.
67. Mhojer koxtt-upodre poddchê adim hanv chuklom, punn atam hanv Tujem utor samballtam.
68. Tum khorench boro, Tum kortai tem sogllem borem, Tuje nem’ mhaka xikoi.
69. Gorvi monis mhojer boglanttam-bodlamam ghaltat, tori astanam sogllea kallzan Tuje kaide hanv palltam.
70. Tanchem kalliz chorbê vori dattlam, punn mhozo sontôs asa Tujê Somurticher.
71. Mhojer koxtt-upodre aile te boreak aile; oso hanv Tuje nem'-xikunk pavlom.
72. Sonvsarantlea rupea-bhangara poros mhaka odik unch molachi Tunvench xikoil’li Somurt.
73. Tujeam hatamnim mhaka rochla ani mhaka akarla; Tujeô adnia xikunk mhaka ginean di.
74. Tujea utracher hanv visvas dovortam dekhun, mhaka polleun Tujeam bhoktank sontôs bhôgtolo.
75. Tuje kaide promannikponnache: hem hanv zannam, Sorvespora: mhojer tollmolle dhaddleai te-i visvaxiponnan dhaddleai.
76. Punn Tujea chakrak bhasailãi tea pormannem, Tujea mogan mhaka buzoi ani dhir di.
77. Konnvallaien mhaka vagoi ani mhozo jiv vanchtolo, kiteak Tujê Somurticher asa mhozo sontôs.
78. Boglanttam ghalun mhaka piddapidd ditat team gorvi mon’xank lojek ghal, pun hanv Tuje kaide niallit ravtolom.
79. Tujeam bhoktank, Tuji khuxi manun ghetoleank, mhojê bhonvtonnim ektthãi zaum-di.
80. Tujeam nemam pormannem cholun, kalliz mhojem patkavinn zaum-di, tednam mhaka loz bhôgchi nam.
81. Tujê soddvonnek hanv axetam, otrektam; Tujea utracher patieun ravtam.
82. Axeun axeun mhoje dolle Tujê bhasavnnechi vatt polletat: kednam mhaka buzvonn ditoloi?
83. Dhunvra voir dovorlolea dabea vori hanv sukun gelam, punn Tuje nem’ mhojea monant asatuch.
84. Anink kitle dis vanchot Tuzo sevôk ? mhaka piddapidd ditoleanchi kednam zhôddti kortoloi?
85. Tujê Somurtichi beporva korun, gorvi monis mhaka fônnd khonntat.
86. Tuje hukum’ soglle visvaxiponnache: fottkire monis mhojeam pallank lagtat tednam Tunch mhojea adarak ie.
87. Mhaka prithumêvelo nanch korunk lagim pavleat, tori astanam Tujeô adnia hanvem soddunk nant.
88. Tujea moga khatir mhozo jiv vattai, ani Tum kôr mhonn sangtai titlem-i hanv kortolom.
89. Tujem utor sasnnak togta, Sorvespora, sorgar tem sodanch thir.
90. Pinddkechê pinddkent togta Tujem visvaxiponn; Tunvem prithum’ rochleai ti-i togunkuch rochleai.
91. Tujeam formonnam pormannem soglli rochnna togta, kiteak soglleôch vostu Tuji chakri kortat.
92. Tuji Somurt mhozo sontôs zaunk nasli zalear, mhojea dolldirponnantuch hanv morun vetolom aslom.
93. Tujeô adnia hanv kodinch visorcho nam, kiteak tanchê vorvim Tum mhozo jiv samballtai.
94. Hanv Tuzoch: tôr mhaka nivar; Tujeô adnia hanv pallunk sôdtam.
95. Noxtte monis mhoji vatt Lavunk dodde manddtat, tori astanam mhojem dhean-mon Tujê khuxecher asa.
96. Sopurnn mhonntat teô soglleô vostu opurnn mhonn mhaka tthavem zalam. Sopurnn mhonnchem ekuch: Tujem oprimit utor.
97. Tujê Somurticho hanv môg kortam kitlo, dis-bhôr ti mhojea monantuch asa.
98. Tujeô adnia sodanch mhojem jivit choloitat; tanchê vorvim Tunvem mhaka mhojeam dusmanam poros xhanno kelai.
99. Tuji khuxi hanv niallit asam dekhun, soglleam mhojeam gurum poros hanv xhanno zalam.
100. Tuje kaide samballtam dekhun, zannteanchê zannvaiê poros odik vhôdd mhoji zannvai.
101. Tujea utrak pallo diunchê khatir patkachea margar hanv pai dovrinam.
102. Tujeam kaideank patt korun hanv cholonam, kiteak Tunch mhaka tanchi somzonni ditai.
103. Tonddant godd-godd mhova poros odik ruchik Tujea utrachi goddsann mhojea kallzak.
104. Tujeam kaideam vorvim mhaka zannvai mell’lea, dekhun fottkirê chalicho mhaka kanttallo dista.
105. Mhojeam panvlank Tujem utor ubarlolo divo, uzvadd mhojê vattecho.
106. Tujeam promannikponnacheam kaideank pallo ditolom; oso hanvem soput dila to hanv môddcho nam.
107. Soglloch akantak sampoddlam, Sorvespora; Tujea utran mhozo jiv samball.
108. Tuka vôptam tem stuti-dan Tuka manom, Sorvespora, Tujeam kaideanchi mhaka somzonni di.
109. Sogllo vêll jiv hatant dhorun bhonvtam, tori astanam Tuji Somurt hanv soddun dinam.
110. Noxtte monis mhaka fas manddtat, punn Tujeam kaideam-velo hanv koddsornam
111. Tuji khuxi mhollear mhojem sasnnachem daiz, tich mhojea kallzacho sontôs.
112. Dhean-mon Lavun Tuje nem’ hanv palltam; hench mhojem inam’ sodankal.
113. Doskea kallzacheam mon’xank hanv kanttalltam; punn mhojem kalliz sogllench Tujê Somurtik Lobhdolam.
114. Tujea gopant mhozo asro, Tunch mhozo Rakhnno; Tujea utracher asa mhozo bhorvanso.
115. Noxtteam mon’xamnô, mhaka soddun pois vochat; hanv mhojea Devacheam adniank pallo ditam.
116. Tunvem dil’lea utra pormannem mhaka samball, ani mhozo jiv vanchtolo: mhozo bhorvanso varear vochunk dium naka.
117. Dhôr mhaka ani hanv vattavtolom, ani Tuje nem’ sodankal mhojeam dolleam mukhar astole.
118. Tujeam nemanchi porva korinant team soglleanchi Tum beporva kortai; Tanchi naddbudh tankanch fottoita.
119. Prithumêveleam patkiank Tum Likitta vori Lêkhtai hea pasot Tujeam adniancho hanv môg kortam.
120. Tujê mukhar hanv sogllo bhieun koddkoddtam, Tujeam kaideanchi mhaka bhirant dista.
121. Nitichea ani sugunnanchea margar hanv chol’lam; piddapidd ditoleanchea hatant mhaka soddum naka.
122. Tujea chakrak borem tem kortoloi mhonn mhaka khatri di, gorvi mon’xank mhojer zobordosti korunk dium naka.
123. Axeun axeun mhoje dolle Tujê soddvonnechi vatt polletat, Tunvem bhasailolea promannikponnak otrekun ravtat.
124. Mhaka, Tujea chakrak, maiêmogan vagoi ani Tuje nem’ mhaka xikoi.
125. Hanv tôr Tuzo chakôr, mhaka ginean di, tednam Tuji khuxi mhaka somzotoli.
126. Tuji podvi dakhouncho vêll pavla, Sorvespora, kiteak Tuji Somurt tãnnim môddlea, hem mhojean sosunk nozo.
127. Kiteak oputt nirbhel bhangara poros Tujeam adniancho hanv chôdd môg kortam.
128. Hôi, Tujeam kaideam pormannem hanv choltam, sogllê torechê fottkirê chalicho mhaka kanttallo ieta.
129. Khorench vichitr Tunvem ghal’le kaide, dekhun hanv te manun ghetam.
130. Ugddapem zaun Tujem utor uzvadd ghalta, ani sadhea kallzacheam mon’xank somzonni mellta.
131. Tujeam adniank axeun axeun khorxeta mhojem horddem, tondd zata ugtem.
132. Tujea Nanvacho môg kortoleank Tum kortai toxem, mhojer nodor ghal, mhoji kaklut kôr.
133. Tujê bhasavnnê pormannem mhojim panvlam samball, vaittak mhojer zoit vhorunk dium naka.
134. Mon’xanchê zobordostentlo mhaka soddoi, ani Tuje kaide hanv palltolom.
135. Tujea mukhamollacho porzôll Tujea chakracher fankoi ani Tujeô adnia mhaka xikoi.
136. Tuji Somurt samballinant dekhun, mhojea dolleantleô vhanvtat dukancheô zhori.
137. Tum khoreponnim nitivont, Sorvespora, ani neainitin nirdharlole Tuje nirnnoi.
138. Niti pormannem Tum kaide ghaltai, toripunn sotacher te tthoraileai.
139. Mhaka piddapidd ditat te Tujem utor visortat; hem polleun hanv soglloch zolltam.
140. Tuji bhasavnni borich kosak Lavun kaddlea, Tujea chakrak ti chôdd opurbaiechi.
141. Hanv kirkôll khoro ani tiroskarlolo, tori Tujeô adnia hanv visornam.
142. Tuji nit sasnnachi nit, Tuji Somurt mhollear Sotuch.
143. Akantak ani tollmolleank hanv sampoddlam, tori astanam Tujeam adniancher asa mhozo sontôs.
144. Sasnnachê niti pormannem Tuje kaide; tanchi mhaka somzonni di ani mhozo jiv vanchtolo.
145. Sogllea kallzan Tuka ulo martam; mhaka zap di, Sorvespora, Tuje kaide hanv samballtolom.
146. Tuka ulo martam, mhaka vattai, ani hanv Tuji khuxi palltolom.
147. Fantea adim utthun adar magtam, Tujea utracher patieun ravtam.
148. Tuji bhasavnni niallunk soglli rat mhoje dolle ugtech asat.
149. Tum konnvallo, Sorvespora: tôr mhojê vinovnnek kan di, Tujeam adniam vorvim mhozo jiv samball.
150. Mhaka dogd ditat te noxtte lagim sortat, Tuji Somurt tānnim sanddlea.
151. Tum, tori, Sorvespora, laginch asai, Tujeô adnia sotuch.
152. Sasnnak togunk Tuje kaide tthoraileai mhonn adim thaun hanv zannam.
153. Mhojem dolldirponn polle, mhaka nivar, kiteak hanv Tuji Somurt visornam.
154. Mhaka favo ti nit korun di ani mhaka soddoi, Tujea utra pormannem mhozo jiv samball.
155. Tuje nem’ mandun ghenant dekhun, patkiank soddvonn mellonam.
156. Lêkh-naslole, Sorvespora, Tujea bholeponnache upkar; Tujeam adniam vorvim mhozo jiv samball.
157. Kitle zann mhojea angar poddtat, mhaka piddapidd ditat. Toriastanam tujeam adniam-velo hanv koddsorunk nam.
158. Somurt môddtat tankam polleun mhaka kanttallo ieta, Tujem utor te pallinant.
159. Tujeam adniancho kitlo mhaka môg polle, Sorvespora. Tum konnvallo dekhun, mhozo jiv rakh.
160. Tujem utor sogllem sotuch, Tuje nitiche kaide soglle sasnnak togpache.
161. Razkunvor bexttech mhojea angar poddtat, punn mhojem kalliz Tujeach utrachem bhem dhôrta.
162. Omolik dhirvem melltôch zoso mon’xak sontôs bhògta, tosoch Tujê bhasavnnent hanv sontostam.
163. Lottikponnacho mhaka kanttallo bhògta, sontap ieta; punn hanv Tujê Somurtichea mogant poddlam.
164. Tujeam niticheam kaideam pasot, disak sat pavtti hanv Tuka vakhanntam.
165. Tujê Somurticho môg kortat tim vhôdd xanti bhôgtat; tim kiteakuch adllun poddchim nant.
166. Tuji vatt polleun asam, Sorvespora, mhojea Taroka, Tujeô adnia hanv samballtam.
167. Tunvem dil’le kaide hanv man’tam, tancho sogllea kallzan môg kortam.
168. Tuje kaide ani Tujeô adnia hanv palltam; soglleô mhojeô kornniô Tujeam dolleam mukhar ugteô.
169. Mhozo ulo Tujê mukhar pavum, Sorvespora, Tujea utran mhaka zannvai mellum.
170. Mhojem magnnem Tujê mukhar pavum, Tujê bhasavnnê pormannem mhaka soddoi.
171. Tum mhaka Tuje nem’ xikoitai dekhun, mhojea tonddantlim gollum vakhann’nnechim utram.
172. Soglle Tuje hukum’ nitiche dekhun, mhoji jib gavum Tunvem dil’lem utor.
173. Tujeam adnianchi vatt hanvem vinchun kaddlea dekhun, Tujea hatacho adar mhaka sodam mellum.
174. Tuji vatt polleun asam, Sorvespora, mhojea Taroka; Tujê Somurtint asa sogllo mhozo sontôs.
175. Mhozo jiv samball ani hanv Tuka vakhanntolom, Tujeam kaideam vorvim mhaka adar mellum.
176. Sanddlolê xelliê porim hanv bhonvtam. Tujea chakrak sodunk ie. Tujeô adnia hanv kodinch visrunk nam.
