1. Deva bhair xanti na mhojea otmeak: To ekloch mhoji rakhonn korta;
2. Ekloch To mhojem Khoddop, To mhozo Kil’lo: hanv kodinch halchona!
3. Kitlê pavtti tumi mhojea angar poddtoleat? Loklolê vonnti porim, konsllunk laglolea durga vori hanv zalam: kedna porian mhaka tumi môddun uddounk sôdtoleat?
4. Mhojea unchlea sthana voilo mhaka nikllaun uddounk – ho êkuch tancho motlôb; lokak fottounk - hich tanchi morji. Tonddan uchartat axirvad, pun kallzant ghaltat xirap.
5. Tum, mhojea otmea, Devachea gopant xant rav: To ekloch mhozo Bhorvanso!
6. Ekloch to mhojem khoddop, mhozo Tarôk, To mhozo Kil’lo: hanv kodinch halcho na!
7. Deva sovem assa mhoji soddvonn, mhoji vhoddvik; ekloch To mhojem Khoddop; Tacher hanv thir ravtam. Devachea gopant mhaka asro mellta.
8. Mhojê porjê, sodanch Tacher visvas dovor; soglle tujea kallzache huske Tachea Kallzant ghal, kiteak Dev ekloch amchem xeronn!
9. Chalto lôk mhollear vareachi funk, ani vhoddle monis soglle lottik. Tagddien ghalear te unch choddtat, vareachê funki poros unnem tanchem vozon.
10. Zulumacher patieun cholum naka, lutticher pokholl visvas tthevum naka. Girestkai tuji kitli-i vaddom, tujem kalliz duddvacher dovrum naka.
11. Devan hem ek sangun dovorlam, tench hanvem portun-portun aikolam; soglli podvi Devachich,
12. ani Tunch, Dhonia, doiall mogall, Zonn-ekleachea kornniam pormannem Tunch mon’xank mozuri ditai.
