1. Deva, Tunvem amkam sôddun dilim-i, amchem boll môddun uddoileim. Tuzo rag amcher pettlo, punn atam portun amkam pav!
2. Tunvem bhuim kampo-xi kelii ani ti fall’lii; atam futti poddleat teô sarkeô kôr: ti polle lokta dolta.
3. Tujê porjek Tunvem borich dogdailii, toklek choddta toslo Tunvem amkam soro vanttun diloi.
4. Punn atam dhonu-bann tankam lagona zaunk Tujea bhoktank bavtto dakhoun zoma kôr.
5. Tujê mogachê porjek soddounk ie, Tujea uzvea hatan amchem taronn kôr, amchê vinovnnek kan di.
6. Aplea povitr Mondirant-thaun Devan utor dil’lem asa: "Zoit vhorona fuddem Shekemacho dês vanttun ditolom, Suk’koth vollache kuddke korun vantt’tolom.
7. "Gileiad ani Manas’se, he ganv Mhojech, Efraim’ Mhojea matheak tôp, Juda Mhoji betkatti.
8. "Moab Mhoje pãi dhuvpachem tost, Edomachea kantthear Mhoji vhann bosoitolom, Filistevkarank-ui jikhun ghetolom."
9. Punn konn mhaka atam kil’lo jikhun gheunchi vatt dakhoitolo? Konnachea adaran Edomant mhaka rig melltolo?
10. Deva, khorench Tunvem amkam sarkim sôddun dilim-i? Amchea fouzam borabor kiteak mhunn atam Tum bhair soronaim?
11. Amchea hal-upodreanchea vellar Tunch amkam pav; mon’xacho adar mhollear kãich nhoi!
12. Devachea adaran ami dhiran zhuztoleanv, amchea dusmanank mostitolo ekloch To!
