1. Zoi, zoi Sorvespor! Sorvesporak vakhannat: To bhov boro! Tachea manak stotram gaiat: amcho Dev bhov mogall! Taka ami vakhannunk favo!
2. Jerusalem-xar Sorvesporuch novean bandta! Israelachea pordexiank Toch portun haddta,
3. fapsol’lim kallzam To novean borim korta, tanche ghai bandun To pekoita.
4. Noketrancho ankddo Tannench tharaila: dôr-ekak To nanvan vollkhota.
5. Thôr ani bollixtt amcho Sorvespor, Tachê zannvaiek mit-mer na!
6. Khalteank Sorvespor unch kaddta, noxtteank Toch zomnir xevttita!
7. Gitam gavun Sorvesporak dhin’vasat, sitar vazoun amchea Devachem vondon korat!
8. Toch mollbar kupam manddta, zomnik zai to paus Toch toiar korta, dongravelem tonn ani zhaddam Toch mon’xachea upeôgak upzoita.
9. Gorvank toxench Apnnak ulo martolea kavlleanchea pilank tanchem khann Toch dita,
10. Ghoddeanchi boddai Taka man’vona, dhattea-mottea viranchea donkeanchi To porva korina.
11. Jim konn Tachi bhokti kortat, ani Tachea mogacher visvas tthevtat, tinch Sorvesporak man’tat.
12. Sorvesporachi vakhann’nni kôr, Jerusalea! Siona, tujea Devachi stuti kôr!
13. Tujea darvontteanche addambe Tannem ghott keleat ani tujê bhitôr ravtolea tujea bhurgeank sudoiv keleant.
14. Tujea ximam bhitôr Tannem tuka dilea sovostkai, ani puxtt gonv diun To tuka dhadoxi korta.
15. Sonvsaracher To Aplem utor pattoita, suddsuddit Tacho sôbd progôtt zata.
16. Dhovea kapsa vori To him’ dhaddta, gobra sarko korveancho To paus ghalta.
17. Churo kel’lea unddea bhaxen To hima-kapus xinvraita, Tachea hinvan udkam zatat nibor-borof.
18. Punn Tachea ekach utrak borof veta tevun, To Aplo varo sôddta ani udkancheô vhanvtat zhori!
19. Jakobak To aplem utor kollit korta, Israelak Aple kaide ani adnia xikoita.
20. Dusrea khoincheach raxttrak Tannem oxem korunk na, Aple nem’-kaide tankam ukte korunk nant.
