1. Sorvespora, sogllea mhojea kallzan hanv Tuka dhin’vastam, sogllim Tujim vismitam hanv vornnitam.
2. Tujea nimitan sontoxi zatam, anondan murgott’tam. Tujea Nanvachea manak Stotram gaitam, Bhov Vortea Deva.
3. Mhojê dusman pollun dhanvle, lokon, dhoddpoddun portole, Tujê mukhar morun poddle!
4. Nitivont Mon’subidar Tum: Tujê nitisodrer bosun, mhozo neai Tum samballun dhôrtai.
5. Onbhavarthi raxttrank Tunvem domailim-i, noxtteancho bhosm keloi, tanchem nanv porian umttun uddoileim.
6. Dusmanancho bhosm zalo, sasnnak te bhongon gele, tanchea xarancho nas korun sôddloi, tancho ugddas legun urlo na!
7. Polleiat, Sorvespor sasnnak xinvasonar bosla, mon’subek Tannem Apli sodôr manddlea;
8. Neainitin To kortolo sonvsarachi zhôddti, promannikponnan kortolo raxttranchi mon’subi.
9. Zulum’ bhôgtoleank Sorvespor kil’lo zaum, akantachea vellar tanchem kott’tt zaum.
10. Jim konn Tujem Nanv vollkhotat tim sodanch Tujer visvas dovortolim. Tuji vatt polletoleank, Sorvespora, Tum kodinch sanddinaim.
11. Sorvesporan Sionant tthikann kelam: Taka gitam-stotram gaiat; Tachim vichitr kortutvam raxttram modem porgôtt korat.
12. Zo vikrailolea rogtachem farikponn gheta, Taka dublleancho ugddas asa; Tanchi bob To visorcho na!:
13. Mornnachea ghansak hanv sampoddtam tedna Tum mhaka nivartai: tôr atam mhoji doia kôr, Sorvespora, Mhojea koxttam-dogdancher nodor ghal!
14. Ani Tunvem mhaka nivarloi mhonn sontosun, Sionachea darvontteam samkar soglle Tujê upkar vornnitolom.
15. Apnnench marlolea fonddant onbhavarthi raxttram poddlim, apnnench manddlolea fasant tanchê pãi farovle.
16. Apunn konn to Sorvesporan dakhoilem, ani nitichem formonn dilem. Tancheanch hatamnim vinnlolea zallant noxtteank Tannem sampddailim.
17. Noxttim mon’xam, Devak visortat tim sogllim raxttram, Norkant vochun poddum.
18. Kiteak mhollear Dev gorjevontank sodam visorcho na, goribancho visvas kodinch fottouncho na.
19. Utth, Sorvespora! mon’xak zoit vhorunk dium naka, raxttranchi Tujê mukhar zhôddti zaum-di.
20. Sorvespora, tanchea kallzant bhiranticho kolkolo ghal, apunn fokot monis mhonn raxttrank gomum-di.
