1. Mhojem magnnem aikun ghe, Sorvespora, mhojê vinovnnek kan di! Khorea utracho, neainiticho Tum, tôr mhaka zap di!
2. Tujea chakrachi porikxa korum naka: jivea mon’xam modlo eklo porian Tujê nodrek patkavinn mellcho na.
3. Dusman mhojê pattik lagla, mhaka dhortorer ghalun mostita, magam morun gel’leam sarko kallokhant mhaka buddoun dovorta.
4. Virun veta jiv mhozo, akantan kalliz mhojem virgholam.
5. Gel’lea disancho ugddas ieta: soglleô Tujeô kornniô monant gholloitam, Tujim kortutvam nialltam.
6. Tuzo adar magunk hat zôddtam: udkak morta toslê zomni porim, mhozo otmo Tukach tanela.
7. Vegim pav, Sorvespora, mhaka zap di! mhozo jiv virun veta. Tujem mukhamoll mhaka lipoum naka; na zalear, heram bhaxen Fonddant pavtolom.
8. Hanv Tujer visvas dovortam mhonnun, fantear Tujea mogachi khunna mhaka di; mhojem kalliz Tuka ubartam dekhun, borea margar ghal mhojim panvlam.
9. Mhojea dusmananchea hatantlo mhaka vattai, Sorvespora; Tujea gopant asro gheunk pollun ailam.
10. Tum mhozo Dev dekhun, Tuji khuxi korunk mhaka xikoi. Tuzo dulôb svas sôddun sopatt zomnicher mhojim panvlam ghal.
11. Tujea Nanva khatir, Sorvespora, mhozo jiv samball; Tum visvaxi dekhun, mhaka dhumalleantlo nivar.
12. Tum mhozo môg kortai mhonnun, mhojea dusmanancho nas kôr. Mhaka piddapidd ditoleank bhosmun uddoi kiteak hanv babddo Tuzo chakôr.
