1. “Sorvesporak dhin’vasat. To kitlo boro. Tacho maiêmog mit-mer naslolo.”
2. Oxem mhonnum Sorvesporan soddoileant tim, dusmananchea chopkeantlim nivarleant tim,
3. poixileam desantlim zomoileant tim, Udenti thaum ani Ostomtê thaun, Ut’tori-sun ani Dokxinnê-sun ektthãi keleant tim.
4. Oronneant, zongllant, hevtten-tevtten tim bhonvtalim firtalim, tthikann korunk zata toslea xharachi tankam vatt mellonasli.
5. Tankam bhuk lago, tankam tan lago, tim jiv soddunk pavlolim.
6. Tednam aplea dolldirponnant Sorvesporak tãnnim ulo marlo ani tancheam attevitteantlim Tannem tankam nivarlim.
7. Ani tthikann korunk zata toslea xharant pavo-sôr borea margan Tannem tankam choloilim.
8. Tachea moga pasot, mon’xam khatir kel’leam vismitam pasot, tãnnim Sorvesporak argham diunk favo.
9. Kiteak tanel’lo otmo Tannem dhadoxi kelo, bhukel’lo otmo Tannem boream denneamnim bhôrlo.
10. Kãi zannam savllent ani kallokant jietalim, dolldirponnant ani lokhonddacheam sankllimnim koidi zal’lim.
11. kiteak Devan ghal’leam kaideancher tim add gel’lim ani Bhov Vortea Devachê budhichi tannim beporva kel’li.
12. Koxttanchea bharan tancho jiv Tannem ôddchil’lo, tim khala apttolim ani tankam adar diunk konn nam zalo.
13. Tednam aplea dolldirponnant Sorvesporak tannim ulo marlo ani tancheam attevitteantlim Tannem tankam nivarlim.
14. Savllentlim ani kallokantlim Tannem tankam bhair kaddlim, tancheô sanklli Tannem toddun uddoileô.
15. Tachea moga pasot, mon’xam khatir kel’leam vismitam pasot, tannim Sorvesporak argham diunk favo.
16. Kanxeachim daram Tannem môddun uddoilim, lokhonddachim logddam Tannem samkinch môddlim.
17. Kãi zannam apleam patkank lagun piddest zal’lim, apleam guneanvank lagun koxttam-upodreank sampoddlolim.
18. Jevnna-khannachi tankam vitt distali, mornnachê tonnir tim pavlolim.
19. Tednam aplea dolldirponnant Sorvesporak tannim ulo marlo ani tanchea attevitteantlim Tannem tankam nivarlim.
20. Aplem utor dhaddun Tannem tankam borim kelim, fonddak pavlolo tancho jiv Tannem nivarlo.
21. Tachea moga pasot, mon’xam khatir kel’leam vismitam pasot, tannim Sorvesporak argham diunk favo.
22. Dhin’vasnneche iodn tannim Taka bhettounk favo, anondacheam ul’lasamnim Tacheam kortutvanchem vornnon korunk favo.
23. Tarvanr bosun kai zann doriant bhonvtale, bhailea vhoddlea doriacher aplo vepar choloitale.
24. Tannim-i pollelim Sorvesporachim kortutvam ani sagorar Tannem Kel’lim vismitam.
25. Eka utran vadollacho varo Tannem utthoilo ani doriachim Lharam upraso-xim kelim.
26. Mollba porian te pavle, magir khôl sokla poddle, oslea akantant tancher ailo kampero.
27. Gunvôll ieun, bebdeam bhaxen te sarke ddounddollunk lagle, Soglli tanchi tarvotteanchi hikmôt virun geli.
28. Tednam aplea dolldirponnant Sorvesporak tannim ulo marlo ani tancheam attevitteantle Tannem tankam nivarle.
29. Tannem vadoll sursurit varea itlem thondd kelem ani doriachim Lharam xant poddlim.
30. Tim thondd zal’lim polleun te kuxal zale, vochunk sôdtale tea bondrar Tannem tankam pavoile.
31. Tachea moga pasot, mon’xam khatir kel’leam vismitam pasot, tannim Sorvesporak argham diunk favo.
32. Porjechê zomatint tannim Taka vakhannunk favo, zannteanchê sobhent Tachi stuti korunk favo.
33. Nodinchem Tannem oronnem kelem, udkacheam zhorinchi Tannem suki zomin keli.
34. Sufôll dês Tannem kelo kharvôtt, hem sogllem thôi ravtoleanchea noxtteponnak lagun.
35. Ufrattim oronnem bodlun Tannem udkachem tollem kelem, suki zomin bodlun udkacheô zhori keleô.
36. Thôi bhukel’leank Tannem tthikann korunk lailem; ani tannim apnnank ravunk thôi ek xhar bandlem.
37. Thôi tannim xetam roilim, dak-veli laileô, thôi tankam khub pik mell’lem.
38. Tannem tancher axirvad ghalo ani tanchi sonkia khub vaddli, tanchim gorvam Tannem unnim zaunk dilim nam.
39. Koxttam-noxttanchea bhara khal tim anvllon gelim, dolldirim zalim.
40. Kunvrank Tannem lojek ghale, vatt naxil’lea oronneant tankam ghuspaile.
41. Punn Toch atam dolldireank attevitteantlim nivarta, tanche ghorabe hinddam-sarke To vaddoita.
42. Hem polleun borim mon’xam sontosan bhôrtat ani khottim mon’xam lojen tondd dhamptat.
43. Konn tori xhanno aslear, to heô ghoddnniô nialltolo ani Sorvesporacho maiemôg vollkhunk pavtolo.
