1. Tuka xeronna ietam, Sorvespora; mhaka kodinch fottvonk dium naka.
2. Tum promannik dekhun mhaka soddoi, mhaka nivar, mhaka chit diun aik, mhojem taronn kôr!
3. Sorvespora, mhojem Khoddop za, mhaka asro di; mhozo kil’lo za, mhozo jiv rakh! Tum ekloch mhojem Khoddop, mhozo Kil’lo !
4. Deva mhojea, noxtteancheam hatantlo, onit ani zobordosti kortoleanchea chopkeantlo mhaka nivar!
5. Dhonia, Tum ekloch mhozo Bhorvanso, mhojê tornnê piraiê thaun Tujeruch mhozo visvas!
6. Zolma thaun Tujeruch patieun ailam, avoichea kusveant-sun Tum mhaka rakhtai, Tujich vakhann’nni korit asa sodankal.
7. Mhaka polleun lôk ekdom’ ojap zata, punn Tum mhozo thir-ghôtt adar.
8. Mhoji jib sodanch Tuji stuti korit asa, dis-bhôr Tujê mhoimechem kirton korta.
9. Mhojê mhatarê piraier mhaka pois ghalum naka; boll mhojem virlem mhonn mhaka soddum naka.
10. Kiteak mhoje dusman mhojê vixim uloitat, mhaka fas manddunk guddmêll kortat:
11. “Devan taka sôddlo-rê tachê pattik lagat! Dhôrat taka ! Atam taka nivartolo konn nam”
12. Deva, mhojê sorxilo pois ravum naka, vegim-vegim ie, pav mhaka!
13. Mhojea angar poddtoleank lojek ghal, tanchem nisontton kôr. Mhaka vaitt korunk sôdtoleanchem nak katôr,Tankam ghuspagondhollant ghal.
14. Punn hanv kodinch visvas sôddcho na, odik-odik Tuji stuti korit ravtolom.
15. Mhoje ontt Tujem promannikponn porgôtt’tole, dis- bhôr Tunvem kel’li soddvonn gazoitole.
16. Sorvesporachem boll vakhan'nit ietolom, Tujem sôr-naxil’lem promannikponn porgott kortolom.
17. Deva, mhojê tornnê piraiê thaun Tum mhaka xikoit ailai; azun porian Tujeam ochorianchem hanv vornnon korit asam.
18. Atam mhatari pirai pavli, kens gele pikun; Tum mhaka sanddum naka, Deva! Vaddtolê pinddkek Tujea bollvont hatachim kamam mhaka porgott korum-di.
19. Kupam voir, Deva, pavta Tujem promannikponn, vichitr Tujim kortutvam: Tujê sarko konn asa, Deva ?
20. Kedeam vhoddleam khontim-vignamnim Tunvem mhoje dis koddu kelei: tori Tum mhaka novean jivit ditoloi, khôl khôl khonddantlo mhaka portun ubartoloi,
21. Novean mhoji tokli unch kaddtoloi, porot mhaka buzvonn ditoloi.
22. Tujea visvaxi moga pasot, Deva mhojea, vinno vazoun Stotramnim Tuka dhin’vastolom, Tujea manak kin'nori gheun gitam gaitolom, Israelachea Povitr Deva!
23. Tuka gaionam gavun mhoje ontt murgott’tole, ani Tunvem soddoilolo otmo mhozo sontosan ul’lastolo
24. Mhojer nirbhag haddunk sôdtoleancher loz ani opman ailim dekhun, Tujea promannikponnachi khobor mhoji jib dis bhôr gazoitoli.
