1. Purvilea kallant, amchea purvozanchea disamnim koslim-koslim kortutvam Tujeach hatan, Deva, ghôddun haddlim, hanchi khobor tãnninch amkam sangun dilea, amchea kanamnim ami ti aikolea.
2. Tankam Desant rigounchê khatir Tunvem raxttrank umttilim-i, tankam vaddonk -vistaronk diunchê pasot porzancho Tunvem vinas keloi.
3. Aplea torvarimnim tãnnim Dês jiklo na, apleach bavlleanchem zoit nhoi tem, bogor Tujea uzvea hatachem, Tujea bavlleachem, Tujea mukhamollachea porzollachem: karonn Tunvem tancho khoro môg keloi!
4. Tunvench Jakobak zoitan’ zoit dileim, mhojea Raia, mhojea Deva.
5. Tujê hostokim xotrunk ami xevttun uddoile,amchea angar ietoleank Tujeach Nanvan ami pãiam tolla mostile.
6. Visvas mhozo mhojea dhonucher naslo, mhojê torvarin hanv jikhlom na:
7. Tôr amchea dusmananchea hatantlim Tunvench amkam soddoilim-i, ani amcho dvês dhôrtoleank Tunvem ghuspaun uddoilim-i.
8. Tukach lagun dis-bhôr ami tokli voir kaddun bhonvtaleanv, Tujem Nanv nirontorim vakhanntaleanv.
9. Punn atam Tunvem amkam soddleãi ani lojek ghaleãi; amchea fouzam fuddem Tum atam vochoch naim.
10. Amchea xotrunk amchi duspôtt korunk ditai ani amcho dvês dhôrtoleank zai toxem amchem luttunk sôddtai.
11. Marunk vhortat tea xelliam bhaxen Tunvem amkam korun soddleãi, raxttram modem amkam ximpddaileãi.
12. Tujê porjek funkea sovai vikti dileai ani tika vikun Tum kãi grest zalo naim.
13. Tunvem nirmilãi mhunn amche xezari amcheô kortat moskoriô, ani bhonvtonncho lôk sogllo amchim khebaddam fokannam kortat.
14. Raxttram modem Tum amcher gopam marunk ditai, ani amkam pollena fuddem onbhavarthi lôk apli tokli haloun chol’lo.
15. Dis-rat mhozo beman mhojea dolleam mukhar asa, tondd dakhounk porian mhaka loz dista,
16. kiteak vetam thoim fokot bexttavnniô ani ninda aikotam, ragan bhòrlole, sudd ghetole dusman dixtti poddtat.
17. (a) tori hem sogllem amcher ailem Ami Tuka visorle nant, Tuzo Korar ami môddlo na,
18. amchim kallzam Tujê sorxilim koddsorlim nant, amche pãi Tuji vatt sanddun gele nant.
19. Khontim-dukhinchea desant Tunvem amkam doll’lim-i ani mornnachea kallokhan amkam guttlailim-i.
20. Amchea Devachem Nanv zôr ami visorloleanv, porkea Deva mukhar zôr ami hat zôddlole,
21. hem sogllem Tuka uktem aschem naslem? Kallzache gutt tôr Tuka sogllech tthave!
22. Na, Tujêch pasot amkam dispottim vollvollaun martat, marunk toiar kel’lea xelliam vori amkam lêkhtat.
23. Utth, Saiba! Nhidlai kiteak? Zago za! Amkam sodankal poro ghalum naka!
24. Kiteak mhonn Tujem tondd dhampun dovortai? Amchem dolldirponn ani tollmolle koso visortai?
25. Ami polle dhornnir xevtton poddleanv, dhul’lint lollon mati khatanv.
26. Utth! amkam hat di! Tujeach moga khatir amkam nivar!
