1. Mhozo updês chit diun aik, mhojê porjê, hanv sangunk vetam taka kan di:
2. Oparimnim khobor sangtam, purvile gutt tumcheam dolleam mukhar ugddape kortam
3. Jem amim aikolam, jem ami somzoleanv, jem amcheam purvozamnim amkam sanglam
4. Tem amim tanchê sonstik lipoun dovorchem nhoi, punn fuddlê pinddkek amim kollit korunk zai. Mhonnjê Sorvesporachem thôrponn, Tachi podvi Tannem kel’lim ojapanchim kortutvam.
5. Jakobak dil’le nirnnoi, Israelak pallunk dil’li somurt. Hem sogllem apleam bhurgeank kollit korchem mhonn Tannem amcheam purvozank adnia dili.
6. Fuddlê pinddken, zolma ieunchim aslim team bhurgeamnim, hem sogllem ollkhun gheunchem. Hãnnim-i toxench apleam bhurgeank sangchem:
7. Devan kelam tem kodinch visronastanam ani Tacheô adnia sodankal pallun, dôr-êkê fuddlê pinddken Devacher aplo visvas dovorchê khatir êkê pinddken dusrê pinddkek oxem xikounchem
8. Tim apleam purvozam sarkim mostim ani darunn kallzachim monan othir ani Devak ovisvaxi zainam zaunk êkê pinddken dusrê pinddkek oxem xikounchem.
9. Efraimache put huxar dhon’vi, tori zhuzachea disa tănnim kus marli.
10. Devacho korar purvozamnim samballunk nam, Tachê Somurti pormannem cholunk te kobul nam zale.
11. Tachim kamam, tanchê mukhar kel’lim ojapam, tanchea monantlim ubun gelim:
12. Ejiptachea desant, Soan’chea mollar, tancheam purvozam khatir Tannem kel’lim vismitam:
13. Doria doxim korun, udkancheô vonnti koxeô ubarun, tankam Tannem doriantlean bhair kaddlim.
14. Disachi eka kupachea rupan, ratchi ujeachea uzvaddan Tannem tankam vatt dakhoili.
15. Oronneant khoddpam foddun Tannem tankam doriachea udka itlem pieunk dilem.
16. Tachea hukuman khoddpantleô vhanvleô zhori ani nodim porim udkanchê lott denvun aile.
17. Tori astanam tãnnim Tacher patok kelem, oronneant tim Bhov Vortea Devacher kolpolim,
18. apnnank ruchta tem jevonn magun aplea kallzant Devachi porikxa keli.
19. Devacher add tim ulounk pavlim “Oronneant pongti ghalun jevonn vaddunk Devak koxem tanktolem ?” oxem tim mhonntalim.
20. “Tannem khoddpacher danddo marlo khoro, udok vhanvlem ani ghosghoxean denvun gelem; punn amkam unddo khõicho ditolo ? Aplê porjek mas khôichem haddun ditolo?”
21. Hem aikun Devacho rag choddlo, Jakobacher pettlo Tacho uzo, Israelacher denvlo Tacho krôdh.
22. Kiteak mhollear Devacher tãnnim bhavart dovrunk nam, Tachê soddvonnecher tãnnim visvas tthevlo nam.
23. Tori astanam mollbacheam kupank Tannem hokum’ ghalo, sorginchim daram Tannem ugôddlim.
24. tanchea jevnnak pausa vori Tannem man’na dhaddlo, sorgincho unddo Tannem tankam dilo,
25. Mon’xamnim khelo Bollixttancho unddo, dhadoxi zai-sôr Tannem tankam jevonn dilem.
26. Mollba thaun udenticho varo Tannem sôddlo, Aplê podven dokhinnacho varo suttoilo,
27. Dhulli bhaxen masacho paus tancher dhaddlo, doria-degevelê renvê itlim pakanchim suknnim;
28. tanchea pennea modem, tancheam tombum bhonvtim tim denvun poddlim
29. Dhadoxi zai-sor tankam jevunk-khaunk mell’lem, tankam ruchtalem titlem-i Tannem tankam dilem.
30. Punn tanchi ruch bhagonam fuddem, jevonn azun tonddanuch astanam,
31. Devacho rag tancher pettlo, tanchê modleam bolixttank Tannem jivexim marle, Israelacheam tornnatteank xevttun uddoile
32. Tori astanam, tim patkam korit ravlim, kel’leam vismitancho tãnnim bhavart sôddlo;
33. dekhun funk marun Tannem tanche dis uboile. eka khinna bhitôr tanchea jivitachi dori katrun uddoili.
34. To tankam mar ghaltalo tednam, tim Taka sodunk lagtalim, ani kallzant thaun Tachê-xim portotalim
35. Tednam Dev aplem Khoddop mhonn, Pormespor Dev Aplo Tarôk mhonn tankam ugddas ietalo.
36. Punn tonddapurtem mat tem tanchem ulovop, tancheam onttanchim utram fottkirim;
37. Taka dil’lem utor kallzant tim samballinaslim, tachê lagim kel’lea Korarak visvaxi nam zalim.
38. Punn Aplê vhoddê konnvallaien tanchem patok Tannem bhôgxil'lem ani tankam soddoilim, Aplo rag portun-portun damun dovorlo, Aplo krôdh tancher choddunk dilo nam.
39. Tim fokot osokt rochnna, aili toxi geli ani anink portun ienam tosli vareachi funk tim sogllim mhonn Taka ugddas ailo,
40. Kitlê pavtti oronneant tim Tacher kolpolim kittlê pavtti thôi tãnnim Taka okman kelo!
41. Portun-portun Devachi porikxa kortalim; Israelachea Povitr Devak challoitalim.
42. Tachea bavlleachim kortutvam tim visorlim, zulumkaranchea chopkeantlim Tannem tankam soddoilim tea disacho tãnnim ugddas dhorunk nam
43. Ejiptak Tannem Apleô khunna nettan dakhoileô, Soan’chea mollar Aplim vismitam fankoilim,
44. Tankam pieunk udok mellonam zaunk tancheam nodinchea udkachem kelem rogot.
45. Tankam kunsam laun khaunk Tannem dhaddle marekar mus, tankam tras diunk dhaddlim bebkam.
46. Piklolea dhanneacher dhaddli kidd, ttollank dilem koxttam-vavrachem pik.
47. Korveancho paus ghalun tancheam dakam-molleancho nas kelo, dova-borfan tanche xikamor-rukh padd kele.
48. mari dhaddun tanchim gorvam marun uddoilim, toxench marekar tapan tanche hindd gele lasun
49. Kanttallun tancher sôddlo Aplo khôr rag, krôdh ani jin-’savar vignam, ani xekim vinas korcho hukum’ ghetil’li devdutanchi fouz:
50. oxem Aplea ragak zai tem korunk dilem Tannem tankam mornnantlim vattailim nant, punn tancho jiv piddek sampddunk dilo.
51. Ejiptant soglleam tancheam malgoddeank marun uddoile, Khamacheam tombumnim tancheam bollixtt tornnatteancho nas kelo.
52. Xelliam vori Aplê porjek Tannem bhair kaddli, hindda vori oronneantlean tankam vatt dakhoili
53. Doria tancheam dusmanank girasta mhonno-sôr tankam Tannem solamoti ani bhea vinnem poltoddi pavo-xim kelim.
54. Aplea uzvea hatan jikun ghetlolea Porvotar, Aplea povitr Desant Tannem tankam pavoilim.
55. Tanchê mukhar raxttrank Tannem dhanvddailim, to Dês tankam aplem daiz koso Tannem vanttun dilo, ani tancheam biraddamnim Israelacheam kullank tthikann korunk lailem.
56. Tori astanam Bhov Vortea Devachi tãnnim porikxa keli ani Taka challoilo; Tacheam adniank tãnnim patt keli
57. Apleam purvozam bhaxen nitt vatt soddun tim ovisvaxi zalim, soddôll dhonu bhaxen ghatki zaun tim Tacher portolim.
58. Dongrancher kud'deam devank bhozun tãnnim Tacho rag pettoilo ani murtiô korun Taka tiddkailo.
59. Hem sogllem aikonam fuddem Devacho rag pettlo, Israelak Tannem saf soddun uddoilo.
60. Mon’xam modem ravunk jem Tannem ravull kel’lem, tem Silochem devsthan Tannem soddun dilem.
61. Aplem podvechem sthan Tannem gulam’ponnak sampddunk sôddlem Aplem mhoimechem biddar dusmananchea hatant poddunk dilem.
62. Aplêch porjek torvarin morunk vorjili, Apnnem vinchun kaddloleancher itlo Tacho rag!
63. Ujean tancheam tornnatteank girasle, tancheam choliank nam zale logna-mandde.
64. Tanche iadnik torvarin morun poddle, roddun roddun vidvancho boslo tallo, sukun geleô dukancheô zhori.
65. Tednam nidentlo koso Pormespor utthlo, soro lagun chollvoll’lea vira bhaxen To zago zalo.
66. Dusmanank Tannem pattlean boroch mar dilo, sasnnak tankam lojek sampddaile.
67. Zuzecho tombu Tannem sôddlo, Efraimachem kull Tannem vinchun kaddlem nam;
68. Punn vengent ghetlem Zudachea kullak Aplea mogacho Sionacho Dongôr vinchun kaddlo
69. Thôi Tannem unch-vortem Aplem Povitr Mondir bandlem prithumê sarkem sasnnak thir ravpachem
70. Aplea sevoka Davidak Tannem vinchun kaddlo; zo aslo menddram-rakhnno, taka apoun haddlo.
71. Dud diteam xelliank rakhtalo thôisorlo kaddun, Aplê Israel-porjek, Apnnem vinchun kaddlolea Jakobak, rakhunk ani chorvak vhorunk taka apoilo.
72. Promannik kallzan Davidan tanchi zoton keli, somorthaien tannem tankam choloun vhelim.
