1. (a) Zoi, zoi Sorvespor! Sorvesporachea Nanvachi vakhann’nni korat! (1b)Sorvesporachea sevokamnô, (1c)Tachi vakhann’nni korat!
2. Sorvesporachea Mondirant, amchea Devachea angnnant Tachi seva-puza kortoleamnô,
3. Sorvesporachi stuti korat, kiteak Sorvespor khorench boro! Tachea Nanvachea manak gitam-gaionam korat, kiteak To dulôb mogall!
4. Jakobak Sorvesporan Apnnak venchun kaddla, Israelak Aploch zaunk Tannem nivddun haddla.
5. Sorvespor bhov vorto, sogllea devam modem amcho Dhoni ekloch xrêxtt: hem hanv borem zannam.
6. Mollbar toxem prithumer, khol khol doriamnim, Apnnak zai toxem Sorvespor korta.
7. Prithumechea ximam thaun kupam ubarta, zho lam modlo ghosghoxit paus denvoita. Aplea kottharantle vare sôddun dita.
8. Ejiptant kusveachea prothom’ follancho mon’xanchea putancho toxench gorvanchea vasrancho Tannem jiv kaddlo.
9. Tujê bhitôr, Ejipta, Faraocher ani tachea chakrancher Tannem kelim ochoriam-vismitam.
10. Kitlea bollixtt raxttrank Tannem boddoilim, podvedar razank marun uddoile:
11. Sihon, Amoritkaranchea razak, Og, Bashan’chea razak, ani Kanaan desantlea sogllea razank.
12. Tanche ganv kaddun Aplê Israel-porjek dile, tichem daiz koxem tika te dile.
13. Tujem Nanv, Sorvespora, sasnna thaun sasnnak togta! Tuzo ugddas, Sorvespora, pinddkechê pinddkent ballta!
14. Kiteak Sorvespor Aplê porjek samballta, Aplea sevokanchi kallji gheta.
15. Punn onbhavarthianche Dev rupeache ani bhangarache, mon’xachea hatan ghôddlole:
16. tankam tondd asa, punn vacha na, dolle asat, punn dixtt na.
17. Kan asat, punn tankam aikunk iena, ani tonddantlean huskar na,suskar na.
18. Murti kortat tim murtim sarkinch, ani tancher visvas dovortat tim-i toxinch.
19. Israelachê kulliê, Sorvesporachi vakhann’nni kôr. Aaronachê kulliê, Sorvesporachi vakhann’nni kôr.
20. Levichê Kulliê, Sorvesporachi vakhann’nni kôr. Sorvesporachi bhokti kortoleamnô, Sorvesporachi vakhann’nni korat!
21. Sorvesporan Jerusaleant tthikann kelam: Taka ami Sionant vakhannum-ia!
