1. Sogllea vella Sorvesporak dhin’vastolom. Tachi stuti sodanch mhojea onttancher astoli.
2. Sorvespora sovem mhojea otmeak vhoddvik mellta; hem aikun, khalteank bhògtolo sontôs!
3. mhojê sangatim Sorvesporachi kirti gazoiat, eka tallean sogllim Tachem Nanv vakhannum-ia.
4. Sorvesporak hanv axen sôdtam, To mhaka zap dita ani sogllea mhojea akantantlo mhaka nivarta.
5. Tacher dolle lavun ravat: tedna tumi sontosan murgott’toleat, tokli pondak ghalunk tumkam kodinch poddchem na.
6. Dolldirean ulo marlo ani Sorvesporan zap dili, ani sogllea akantantlo taka nivarlo.
7. Sorvesporachi bhokti kortoleank Tacho dut veddho ghalun rakhta.
8. Chakun gheiat ani polleiat: Sorvespor kitlo mhonvall gôdd! Tachea gopant asro sôdta to monis bhagi!
9. Bhoktamnô, Sorvesporachi seva korat, Tachi bhokti kortoleank kãich unnem na!
10. Tornnea xinvank porian upas-topas kaddcho poddta, punn Sorvesporachi vatt polleun asat tankam borem kãich unnem zaunchem na!
11. Ieiat, bhurgeamnô, mhojem aikat: Sorvesporachi bhokti tumkam xikoitam.
12. Tumchea jivacho tumi môg kortat mum? Lamb auk, sukh-sontôs tumi axetat mum?
13. Khotteponn pois kôr, tuji jib damun dhôr: fottkirem utor tujea tonddantlem kodinch bhair sorona zaum;
14. Vaitt sogllem sôdd, borem tem kôr; xanti sôdun tichea panvlamnim chol.
15. Sorvesporache dolle borea mon’xancher asat, tanchea magnneachi bob Tachea kanar pavta.
16. Sorvespor khottea mon’xank patt korta prithumêvelo tancho ugddas pusun kaddta.
17. Borim mon’xam ulo martat, Sorvespor tanchem aikota ani sogllea akantantlim tankam nivarta.
18. Zanchem kalliz dukhovlam khontovlam, tanchê sorxem Sorvespor asach! Zanchem mon kollvollta vollvollta, tancher Sorvespor hat ôddta.
19. Borea mon’xak upodre-koxtt bharim ôddchitat, punn tea soglleantlo Sorvespor taka nivarta.
20. Sogllim tachim haddam To rakhta, ek porian To moddonk diunchona!
21. Khottea mon’xak tachem khotteponn moronn haddta, borea mon’xacho dvês dhôrtoleank khast poddtoli.
22. Aplea sevokanchea otmeank Sorvespor taronn dita, Tachea gopant asro sôdtoleank To kodinch khast launcho na.
