1. Kallokhant choltolea lokak êk vhôdd uzvadd dixtti poddlo; mornnachê savllechea desant jietolea somestancher êk uzvadd fanklo.
2. Tunvem raxttr vaddoileim, tancho sontôs choddoiloi. Lunvnnechea vellar zoxem sontostat, lutticho mhal vanttun ghetana zoxem murgott'tat, toxench tim Tujê mukhar anondan ul'lastat.
3. Kiteak, Midianachea disa kel'leim toxem, tacher bhar ghaltalem tem zum, tachea khanda voili katthi, taka zulum' kortoleacho danddo, Tunvem môddun uddoilim.
4. Zomnir ttokttoktole moche ani rogtan bhòrlolim sogllim vostram ulpon vetolim ani ujean bhosm zatolim.
5. Kiteak zolmola amkam êk ballôk, dila amkam êk put: tachea khandar odhikar ghal'lo asa; ani taka hea nanvan vollkhotolim: Ojapvont Budh-Dinnar, Podvedar Dev, Fuddlea Iugacho Bap, Xanticho Kunvôr.
6. Tachi razvôttki soglleak pavtoli, ani tachê xantik mitmer aschi na. To Davidachea xinvasonar bosun aplem raj choloitolo; tedna thaun nitekallim nitin ani promannikponnan tem raj sthaptolo ani thiraitolo. Sorvsoktivont Sorvespor Aplê premaxen hem kortolo.
7. Dhonian Jakobacher add banna vori ek utor sôddlem ani tem vochun Israelacher poddlem.
8. Efraimacho sogllo lôk ani Samarient ravtat titlim-i tem zanno zatolim. Aplea kallzachê urmottaien uloun, gorvan tãnnim mhollem:
9. Vitt futtun poddle, tôr ami chireamnim bandchem; rumbodd kapun uddoile, tôr tanchê svater ami devdar lavche.'
10. Punn Sorvespor Razonak, Aplê porjechea dusmanak, ticher adddh addunk toiar korta. To tichea voiriank huskoita:
11. udentik Aram', ostomtek Filistevkar daddvonnam ugddun Israelak girastat. Tori punn Tacho rag thôndd zalo na, Tacho hat ozun ubarloloch asa.
12. Punn Zannem apnnak xikxa dilea Tachê-xim porza portun ieunk na, tim Sorvsoktivont Sorvesporak xeronna ailim nant.
13. Dekhun Sorvespor ekach disa bhitôr Israelachi tokli ani xempddi, khazur-madd ani pemparim, kapun uddoitolo.
14. ('Tokli' mhonngê malgodde ani kullivont monis; 'xempddi' mhollear fottkirea xikovnnanche provadi.)
15. Porjeche fuddari tika addmargan vhortat, ani oxem tanchê pattlean vetat tancho nas zata.
16. Hea pasot Pormespor tanchea tornnatteam sovem dhadoxi aschona, tanchea onath bhurgeanchi ani vidvanchi To doia korcho na. Sogllinch odhormi ani noxttim zaleant dekhun, tanchem sogllem ulovop pixeponn. Tori punn Tacho rag thôndd zalo na, Tacho hat ozun ubarloloch asa.
17. Khorench, khotteponn ujea vori pettlam, kantte ani kanttiô girasta, ranam-vônank uzo laita, ani tancho dhunvôr ghunvon-ghunvon voir choddot veta.
18. Sorvsoktivont Sorvesporachea ragan ak'kho dês bhogbhogta ani khud porza zalea ujeacho zollôv. Apleach khaxa bhavak porian konn sôddina,
19. (b) dôr-êk monis aplea xezariachem mas girasta. Uzvean mas katortat, tori upaxim urtat, davean girastat, tori dhadoxi zainant.
20. (19a) Manas'se Efraimak girasta, ani Efraim' Manas'sek, ani dog-ui Judachea angar poddtat. Tori punn Tacho rag thôndd zalo na, Tacho hat ozun ubarloloch asa.
