1. Konn to Edoma thaun ieta to? Kirmiji-rongachim vostram ghalun Bozra thaun ieta to konn? Dobajean nhesun ani apli podvi-xokti dakhoun fuddem sorta to konn tôr? - Hanvuch to, doiall visvaxiponn porgôtt'tam to, ani soddvônn diunk xokta to!
2. Tujim vostram tambddim kiteak? Tuje kopdde dakô pillun ail'lea mon'xachea kopddeam sarke koxe zale?
3. Dakô hanvem ekleanuch pill'leô; mhojê porjentlo eklo porian mhojea vangdda naslo. Dekhun mhojea ragan hanvem tankam pillun kaddlim, mhojea krodhan tankam pãiam tolla mostilim. Tanchem rogot mhojea vostrancher usoll'llem ani soglle mhoje kopdde khotavleat.
4. Karonn sudd gheupacho dis Hanvem tharaila, farikponn ghevpachem Mhojem voros pavlem.
5. Hanvem nodor marli: Mhaka modôt korunk na zalo; hanv ojap zalom: Mhaka tenko diupak konnuch naslo! Oxem astam, Mhojeach bavlleachem Hanvem boll ghetlem ani Mhojeach krodhan Mhaka tenko dilo.
6. Mhojea ragan Hanvem lokank pillun kaddle, Mhojea krodhan Hanvem tankam pãiam tolla mostile, ani tanchem rogot zomnir vhanvo-xem kelem.
7. Sorvesporachea visvaxi mogachim kortutvam hanv vornnitolom; Sorvesporan amchê khatir kelam titlea-i pasot, Israelachea Ghoranneak Tannem dakhoil'lea vhodda bholeponna pasot, konnvallaien Tannem kelam titlea-i pasot, Tachea visvaxi mogachea mit-mer naslolea denneam khatir, hanv Sorvesporachi kirti gavunk vetam.
8. Kiteak Tannem mhollem: 'Khoreponnim tim Mhoji porza, Mhojim bhurgim tim, Mhozo ghat gheupi nhoi.' Ani To zalo tancho Soddvonnar.
9. Sogllea tanchea hal-upodreamnim, eka niropian vô devdutan nhoi, bogor Apunnuch ieun Tannem tankam nivarlim. Adlea kallam thaun, Aplea mogan ani konnvallaien khud Tannem tankam sôddoilim, tankam uklun dhôrlim ani ubar'n vhelim.
10. Punn tim kolpolim ani Tachea povitr Atmeak tãnnim tiddoilo. Tedna To tancho dusman zalo ani Tannench tancher zhuz manddlem.
11. Punn Tannem adlo kall monant haddlo, Aplea chakra Moizesacho ugddas kelo. Khoim asa tôr To, doriantlim tankam vattailim To? Khoim asa Tachea hinddacho Rakhnno? Khoim gelo To atam, Aplo povitr Atmo tanchê bhitôr ghal'lo To?
12. Zachea mhoimevont bavllean Moizesachea uzvea hatan tankam choloun vhel'lim To? Sorvkallak Apnnak mhoima zhôddchê khatir Zannem tanchê mukhar doriachim udkam vanttlim, To khoim gelo atam?
13. Eka ghoddeak oronneantlean choloun vhortat titlê sompeponnim, koslich addkholl nastana, Zannem tankam choloun vhelim, atam khoim pavlo rê To?
14. Dongra thaun sokla moidanar chorvak denvun ietolea gorvam bhaxen, Sorvesporachea Atmean tankam visovak pavoilim. Oxi Tunvem Tujê porjek choloun vhelii ani Tujea Nanvak vhôdd kirti zôddlii.
15. Sorgar thaun sokla nodor mar, povitr ani voibhovi Tujea sthana thaun polle. Khoim pavlo Ga Tuzo premaxecho môg ani Tuji podvi? Kiteak mhonn thamble Tujea kallzache kollvolle ani Tuji kaklut amchê thaim?
16. Tum amcho Bapui nhoi Ga? Abraham' amkam aplim mhonn ghena zait, Israel tosoch amkam vollkhona zait, punn Tum, Sorvespora, Tum amcho Bap, 'Amcho Tarôk', oxem magam thaun Tujem nanv.
17. Tujea marga thaun kiteak mhonn amkam koddsorunk ditai , Sorvespora? Ani Tujem bhem dhorinant toslim ami zaunk, kiteak mhonn amchim kallzam darunn zaunk ditai? Tujea sevokam khatir, Tujea daizachea kullam khatir, portun ie Ga!
18. Bhov thoddo kall Tujê povitr porjen tem daiz aplem mhonn bhôglem, punn amchea dusmanamnim Tujem povitr sthan pãiam tolla mostilam.
19. Kitlo kall atam zalo, jicher Tum anink razvôtt choloinaim, tosli porza ami zaleanv, Tujem Nanv anink na toslo lôk. Mollob pinzun Tum denvun ail'loi zalear, kitlem borem zatem! Tujea dorxonan porvot kampon vete!
