1. Babiloniê vixim Amozachea puta Izaiasak dorxonant dil'lem bhakit:
2. Eka uktea dongrar êk bavtto ubar, vhoddlean tankam ulo mar. Sordaranchea Darvontteantlean provês korunk tankam khunna kôr.
3. Mhojê pallien Hanvem Mhojea povitr kel'lea zhuzariank adnia kelea, Mhojea krodhachem kam'korunk Mhozo obhiman rakhtolea virank Hanvem apoileat.
4. Aikat! Lokachê vhoddlê khetticho koso dongrancher avaz gazta. Aikat! Rajeancho gollbôll to, zoma zatolea raxttrancho. Sorvsoktivont Sorvespor zhuzak fouzô manddun dovorta.
5. Pois thaun teô ietat, prithvechea ximam thaun teô zomtat. Ak'khê prithumecho nas korunk ieta Sorvespor ani Tachea krodhachim hatiaram.
6. Bob mar! Sorvesporacho Dis lagim pavla, Shaddai koddsun desvatt gheun to ieta.
7. Dekhun soglleanche bavlle golltat ek-ekleachem kalliz virgholun veta,
8. te koxttotat ani vollvolltat, ballonterak pavlolê bailê bhaxen te thorthortat. Te ekamekak ghabron polletat, tanchim tonddam zoran tapleant distat.
9. Prithumechi desvatt korunk ani patkiank thoinsorle umttun uddounk, nixttur, krodhan ani khôr ragan zollto, Sorvesporacho Dispavot ieta!
10. Mollba velim noketram ani taranche zome aplo prokas fankunk diunchim nant; suria udetananch kallôk poddtolo, ani chondrim' anink uzvadd diunchona.
11. Sonvsarak aplea guneanvam pasot ani noxtteank tanchea patkam pasot Hanv khast lavunk vetam. Mosteanchi urmottai môddtolom ani zulum' kortoleanchem gorv zomnir xevttitolom.
12. Nirbhel bhangara poros jivo urlolo lôk mellunk odik kotthin zai-xem kortolom, Ofirachea bhangara-vôn prithver mon'xam sôdun kaddunk odik kotthin zai-xem kortolom.
13. Hea pasot, Sorvsoktivont Sorvesporacho krôdh zolltolo tedna, Tacho rag pett'tolo tea disa, Hanv mollob halounk vetam, ani prithum' aplê buniadi soit kamptoli.
14. Tedna, xikarekaran dhanvddail'lea eka chitolla bhaxen, konnuch rakhina-zomoina toslea xelliam porim, dôr-êk monis ap-aplea loka-xim portun vetolo, sogllim ap-aplea desant pollun vetolim.
15. Jim konn sampoddtit tankam topun martole, konnak-ui dhôrlim zalear, tim torvarin poddtolim.
16. Tancheach dolleam mukhar tanchea ballanche apttun-dhopttun kuddke kortole, tanchim ghoram luttun uddoitole, tanchea bailancho bolatkar kortole.
17. Polleiat, tancher add Hanv Medi lokak huskaitam: te rupeak moluch dinant, bhangarachi beporva kortat.
18. Tanchea tornnatteanche dhonnvam-bannamnim kuddke kortole, kusveachea follachi te doia korche nant, tankam bhurgeam-ballanche churchure aschech nant.
19. Babilonia rajeanchem motim zait, Kaldeikar lokachem rotn ani vhoddvik zait, tori Sodoma ani Gomorra bhaxen Dev ticho sotianas kortolo.
20. Thoinsor anink konnuch vosti korcho na, pinddkechê pinddkent konn lôk thoim ravcho na. Konn Arbi monis aplo tombu thoim tanncho na, khoinchech gonvlli aplea hinddank thoim add poddunk diunche nant.
21. Punn oronneantlim sauzam thoim ieun bostolim, ani thoinchim ghoram natkam-ghugumamnim bhoron ietolim. Shohamurg thoinsor ravunk ietole, ani ranantle bokdde thoim uddkiô marit astole.
22. Tanchea kil'leamnim sunnimvagttam roddot astolim, tankam sontôs ditat tea tanchea raznivasamnim kole kule ghaltole. Ticho kall pavot ailo, chodd dis titogchi na.
