1. Ariel, [Devachê vedi voilo uzo, Devacho xinv], Ariel, Davidan pennem kel'lem tem xar! Arielachem kottakotta! Ek vô don vorsam sorum-di , porbam-utsovanchem kallchokr ghunvom-di,
2. uprant Hanv Arielak sotaitolom ani rudon ani vilap thoim vostolim, tem Mhaka khorench Ariel zai-xem kortolom.
3. Davida bhaxen tujê add Hanv pennem ghaltolom, tuka veddho ghaltolom ani tujea kottancher choddunk adde bandtolom.
4. Xevtton poddon zomni thaun tum uloitoleim, dhul'lin ghusmottail'lim tujim utram bhair sortolim. Zomni thaun bhuta sarko tuzo tallo voir sortolo, dhul'lint-san sursurun tu muloitoleim.
5. (c) Ravonaslolea vellar eka khinna bhitôr,
6. goddgoddo, dhornkamp, khonnkhonnit ghonnghônn, tufan, vadoll, ani girastea ujeache zall gheun Sorvsoktivont Sorvespor tuka bhett diunk ietolo. (5ab) Tujea dusmananchi urpônz dhul'li vori zollim-mollim ximpoddtoli, Nixttur urpônz pola vori ubun vetoli;
7. Arielacher zhuz kortat tea sorv raxttranchi urpônz sopnna vori, ratchea dorxona sarki, nanch zatoli. Toxim zatolim tacher loddai kortat tim sogllim, taka veddho ghalun sotaitat tim.
8. Zoso êk bhukel'lo monis apunn jevta-khata mhonn sopneta, punn utthtana tachem pott ritench asa, zoso êk tanel'lo monis apunn pieta mhonn sopnneta punn utthtana to thokloloch asa ani tacho gollo sukloloch asa, toxich zatoli Sion Dongracher add zhuztat tea sorv raxttranchi gôt!
9. Chokasur zal'lim ravat, thottak zaun ravat, kãich disona toslim andhllim-kuddd'dim tumi zaleant toxinch ravat, soro pienastana bebdim zaleant tumi, koddok soro chakinastana tumi ghunvllon choltat.
10. Kiteak Sorvesporan tumchê bhitôr khôl nhidecho svas ghala, tumche dolle (mhonngê provadiank) Tannem dhampleat, tumcheô tokliô (mhonngê rixiank) Tannem podd'ddean pangurleat.
11. Tumkam zalear dôr-ek dorxon xik'keamnim dhamplolea eka pustoka bhaxen zalam. Vachunk Zanno asloleak to tumi ditat ani mhonnttat: 'Vach rê tem.' To zobab dita: 'Mhojean zaina, kiteak pustok xik'keamnim dhampun dovorlam.'
12. Na tôr, vachunk ienas-loleak tem pustok diun tumi taka mhonnttat: 'Vach rê tem.' To portipall korta: 'Mhaka vachunk iena.'
13. Dhonian magir oxem mhollem: Ho lôk fokot utram gheun Mhojê-xim ieta, fokot onttamnim Mhaka vakhannta, punn tanchem kalliz Mhojê-sun pois asa. To korta ti Mhoji puza fokot mon'xamnim ghôdlolea kaideanchi, patt kel'lea xastranchi puza.
14. Borem tôr, hea loka modem ochoriam-vismitam Hanv korit ravtolom. Tanchea zannaranchi zannvai padd zatoli, tanchea budhvontanchi budh dhampon urtoli.
15. Jim konn Sorvespora thaun lipun bhonvtat, apleô ievzonneô gupit dovrunk sôdtat, apleô naddbudhicheô manddnneô kallokhant ievjitat ani mhonnttat: 'Konn polleta rê amkam? Amchem konn zanna rê kitem?', osleanchem kottakotta!
16. Koslem noxtteponn hem! Matiê poros kumbarak odik mol na kai? Kel'lê vostun apnnak kelea tachê vixim oxem mhonnum-iet: 'Tannem mhaka korunk na'? Matiechem aidon kumbarak mhonnot: 'Taka kãich somzona!'
17. Thoddeach vellan, bhov thoddea vellan, Lebanon zatolo êk sufôll mollo, ani sufôll mollo distolo ek ran, oxem nhoi kai?
18. Tea disa, bherim mon'xam eka pustokantlim utram aikotolim ani kallôkh ani andhar ubon vochun, kudd'ddeanche dolle polleunk lagtole.
19. Punn lhan'vik mon'xam odikuch Sorvespora sovem sontostolim ani Zo Israelacho Povitr Dev Tachê sovem gorib tim murgott'tolim.
20. Karonn zulumdar anink asche nant, ani khebaddam korpi nanch zatole, ani vaitt korunk ievjitat tancho bhosm zatolo:
21. mhonngê dusreank guneanvkari korunk gozali kortat tancho, darvonttea lagim mon'subi kortoleak fas manddtat tancho, promannik mon'xacho khottlo naddbudhin bhair uddounk sôdtat tancho.
22. Tea pasot, oso uloita Sorvespor, Jakobachea Ghoranneacho Dev, Abrahamacho Tarôk: 'Jakobak anink loz bhògchi na, tachem mukh anink nistej zaunchem na,
23. kiteak jedna tachim bhurgim Mhojea hatan tachê modem kelam tem kam' polletolim, tedna tim Mhojem Nanv povitr mhonn vonditolim. Jakobachea Povitr Devak orchit mhonn tim manditolim, ani Israelachea Devachi kallzant thaun bhokti kortolim.
24. Budh-naslolim mon'xam zannvai xikunk pavtolim ani gunngunntolim mon'xam xikxonn mandun ghetolim.'
