1. Polleiat, Dhoni Sorvsoktivont Sorvespor Jerusalea thaun ani Judasa thaun sogllê toreche upai ani tenko kaddun gheta (on'n-panniacho sogllo purôv):
2. vir ani soinik, nitidar ani provadi,
3. parkhi ani malgodde, odhipoti ani kullivont monis, montri, ghaddi ani montram-xastri.
4. Kunvranchea zagear Hanv tankam tornne-bhurge ditolom, kalche por tancher odhikar choloitole.'
5. Lôk ekamekak piddapidd ditolo, xezari xezariank; tornnattim mhatareank okman kortolim, holkim mon'xam manadik mon'xancho man kaddtolim.
6. Ek-eklo ap-aplea bhavak aplea bapaichea ghorant dhôrun mhonnttolo: 'Tuka êk zhubo asa, tôr tunch za amcho odhikari, ani hem nisontton tujea hatant ghe.'
7. Punn tea disa to dusro portun mhonnttolo: 'Hanv voiz nhoi, mhojea ghorant jevonn na, zhubo-I na; mhaka lokacho fuddari korum nakat.'
8. Hôi, Jerusaleachem zalam nisontton, Judas poddta konsllon, karonn aplea utramnim ani kortubamnim tim Sorvesporacher add vetat, Tachê mhoimechi ninda kortat.
9. Tanchem tondduch pollelear puro, tem tanchê virudh sakxi dita; Sodoma bhaxen aplem patok tim jahir kortat, tem lipoun dovrinant. Xirap poddlolim tim! Aplench nisontton toiar kortat!
10. Sang tankam: 'Promannik mon'xam bhagi, kiteak aplea kornnianchim follam tim khaunk pavtolim;
11. punn noxtteanchem kottakotta! Tancher vaitt ietolem, tanchea kortubam pormannem tankam favo zatolem.'
12. Aha porjê mhojê! Bhurgim tuka zobordosti kortat, bailô tujer odhikar choloitat! Aha porjê mhojê! tuje odhikari tuka addmargan vhortat ani tuji vatt tech padd korun sôddtat.
13. Sorvespor mon'subi korunk ubo zala, Aplê porjechi neainit korunk To toiar asa.
14. Aplê porjechea malgoddeank ani odhikariank tanchi zhôddti korunk Sorvespor apoita. 'Dakam-mollo khaun uddoitat te tumich, goribank tumi lutt'tat ani luttlolo mhal tumger lipoitat.
15. Mhojê porjek tumi mostitat ani goribancho jiv khatat: hem kitem tumchem?' Uloita to Dhoni, Sorvsoktivont Dev!
16. Sorvespor oxem-i mhonntta: Sionacheô dhuvô gorvixtt zaleat, apleô tokliô ubarun ani dolle môddun bhonvtat, pãizonnacho tinntinnit avaz korit fittifitti korun choltat:
17. tea pasot Dhoni Sionachea dhuvanchea mathear khorôz zai-xi kortolo, ani tankam boddkeô korun sôddtolo.
18. Tea disa Sorvespor sogllo tancho xringar kaddun uddoitolo: tanchim pãizonnam, bindiô ani chondrkori,
19. tancheô kanantleô mudiô, tanchim kanknnam ani toklê-zalliô,
20. tanche mukutt, nupuram anik omorpott'tte, sugondhancheô-pormollancheô xinsliô ani montram,
21. tancheô bottancheô mudiô ani nakacheô nothi,
22. nazuk-moladik kapddam-saddiô,
23. pasoddiô, xele ani dhormdanancheô theliô,
24. arxe, sonni vostram, muddaxe ani oli. Tedna itlench tuka melltolem: sugondha bodla, durgondh; komorpott'ttea bodla, razu; venniô-fonniô ghalun kel'lea kensam bodla, boddkem khorddem; nazuk sobit vostram bodla, sakafottem; ani sundoraiê bodla, tonddar dag.
25. Tuje dadle torvarin poddtole, tuje vir loddaient mortole.
26. Xaranche darvontte vilap ani rudon kortole; osadd poddun, Sion-Xar zomnir bostolem.
