1. Sorvespor oxem sangta: 'Neainit rakhat, promannikponnan cholat, kiteak Mhoji soddvônn lagim pavlea ani Mhojem doiallaiechem nitivontponn ugddapem zaunchem zalam.
2. Oxim choltat tim mon'xam bhagi; hea margar thir ravtat, Son'var samballtat ani to bhoxttainant, sogllea vaitt kortuba thaun aple hat pois dovortat, tim mon'xam bhagi.
3. Sorvespor mhaka Aplê porjentlo bhair ghaltoloch': oxem Sorvesporachi seva-bhokti kortolea khoincheach videxi mon'xan mhonnchem nhoi. 'Polle, hanv êk suklolo rukh': oxem khoincheach izddean mhonnchem nhoi.
4. Kiteak Sorvespor oxem sangta: Mhozo Son'var samballtat, Mhaka man'ta tench pallunk tharaitat ani Mhojea korarak visvaxi ravtat tea izddeank
5. Mhojea Ghorant ani Mhojea xaracheam durgam bhitôr Hanv êk iadgiri ubartolom ani putam-dhuvam poros odik xrextt nanv tankam ditolom. Sodankal togpachem, kodinch bigddun vochona toslem nanv Hanv tankam ditolom.
6. Sorvesporachi seva korunk, Tachea Nanvacho môg korunk, Tachim chakram zaunk Taka pãiam poddtat tea videxi mon'xank - mhonngê, Son'var bhoxttainastana palltat ani Mhojea Korarak visvaxi ravtat titleank-ui -
7. Hanv Mhojea povitr dongrar pavoitolom, tankam Hanv Mhojea magnneachea Ghorant sontosbhorit kortolom. Tanche hom' ani iodn Mhojê vedicher manun ghetolom, kiteak Mhojea Ghorak sogllea porzank Magnneachem Ghor oxem nanv poddtolem.
8. Israelachea pordexiank novean zoma korta to Pormespor Dev oxem uloita: Hanvem zoma keleant tanchê bhair anink-ui mon'xank Hanv zomoun haddtolom.
9. Tumi sogllim, zonavoramnô, sogllim tumi, ranantlem savzamnô, ieiat ani dhadoxi zaiat!
10. Tiche pahredar sogllech kudd'dde, te kãich nokllot. Sogllech mone sunne, tankam bhonkunk iena; sopnetat, add poddtat ani sust nhidtat.
11. Sodam girasunk toiar, kodinch dhadoxi zainaslole, osle sunne he gonvlli. Tankam kãich somzona, soglle ap-apli vatt dhôrun chol'le, ek-eklo aploch faido kaddun kbhonvta.
12. Chol ia, hanv soro gheun ietam; koddok soro pieun bebde zaum-ia, aichea disa itlo faleancho dis boro astolo, vô aichê poros ekdom' odik boro!'
