1. Raxttramnô, lagim sorat ani aikun gheiat! Porzamnô, chit diun aikat! Prithum' aikum ani ticher asatitlem-i, jôg ani jogantlem upzota tem sogllem!
2. Karonn Sorvespor somest raxttrancher challovla, tanchea sorv fouzancher To ragan zollta. Tancho nas korunk Tannem ievjilam, tanchi maramari korunk Tannem tharailam.
3. Jivexim marloleank bhair rostear uddoitolim, tanchea moddeanchi ghann soglleak ximpoddtoli, dongrancher tanchem rogot vhanvon vetolem, mollbachim sogllim loskoram konsllon poddtolim.
4. Mollob grontha vori kovllon vetolem, ani dak-veliche bavun poddtolea panam bhaxen, anjirachea sukun poddtolea panam sarkim, tachim loskoram poddun nanch zatolim.
5. Karonn ontrallar marun marun Mhoji torvar rogtan bhòrlea, ti Edomacher koxi poddta ti polleiat! Jea lokacho nas korcho mhonn Hanvem tharailam, tea lokak khast divpak tacher ti poddta.
6. Rogtache bombhall korun ani vos porian bhair kaddun Sorvesporachi torvar dhadoxi zalea: menddreanchea ani bokddeanchea rogtan, menddreanchea parianchê voxen. Kiteak Bozrant Sorvesporak ek bolidan zaunchem asa, Edomachea desant êk bhov vhôdd maramari.
7. Ranvott gorvam tanchea vangdda morun poddtolim, paddeam borabôr paddkule; tancho dês rogtan buddon vetolo ani tanchi mati chorben bullbullit zatoli.
8. Karonn Sorvesporan sudd gheupacho dis to, Sionak nit korun diunk farikponnachem voros tem.
9. Tachea vhallanchea udkacho zatolo damôr, tachê matiecho zatolo gondhôk, tacho dês zatolo damorachem agttem.
10. Ratchem toxem disachem palovnastana, tacho dhunvôr choddot choddot vetolo. Pinddkechê pinddkent to dês padd urtolo, konnuch tê vatten anink kednanch vecho na.
11. Pannkolli ani sallô to dês aplo kortolim, thoim aplem tthikann kortolim natkam ani dhôrkavlle. Sorvespor novean tachem ghorttann kortolo ani purvilea gondhollant uddoun taka nanch kortolo.
12. Raiall odhikar porgôtt korunk unch kullieche monis anink asche nant, tache soglle kunvor nattak zaun vetole.
13. Tachea razvaddeamnim vaddtoleô kanttiô, tachea kil'leamnim khatkhutliô ani sorantte. To dês zatolo koleanchi dhôl, shohamurgancho asro.
14. Ran'mazram ani bahulam thoime kamekak melltolim, thoim ranbokdde ekamekak hak marun apnnak visôv mellpak apoitole, bhut-rakhôs-ui thoinsor lipun ravtolo.
15. Furxem aplo billuk sôdun thoim tantiam ghaltolem ani rovannek bosun aplea porank savllek zomoitolem. Ani gidancheô zoddiô thoinsoruch ektthaim zatoleô.
16. Sorvesporachea gronthant sôdun kadd, ani vach: hantlo êk-ui thoim na zauncho na: aplê zoddiechê sangatimnim xivai êk-ui ascho na! Karonn Tachea tonddan oso hukum' ghala, Tacheach svasan tankam ektthaim keleant.
17. Sorti ghalun Tannem ek-ekacho vantto tharaila, Apleach hatan map gheun Tannem to dês tankam vanttun dila; sodankal to tanchê adhin astolo, thoim tim ravtolim pinddkechê pinddkent.
