1. Sorvesporan mhaka sanglem: 'Êk vhoddli folli ghe ani ticher sadhê lekhnnen oxem boroi: "Maher Shalal-Hash-Baz."
2. Magir Urias iadnik ani Jeberekiacho put Zekariah, hea visvaxi sakxidarank sôdun Mhojêxim gheun ie.'
3. Magir hanv provadini-xim gelom; ti gorbhest zali ani eka putak tinnem zolm dilo. Sorvesporan mhaka mhollem: 'Maher-Shalal-Hash-Baz,' oxem taka nanv dovor,
4. karonn hea bhurgeak "pai" vô "mai" mhonnunk ieunchê adim, Damaskachi girestkai ani Samariecho lutticho mhal Assiriechea raza fuddem ubarun vhortole.'
5. Mhojê lagim novean uloun, Sorvesporan mhollem:
6. Ho lôk Shiloachim xant'taien vhanvtim udkam lekhinam dekhun, ani Razona mukhar ani Remaliachea puta mukhar koddkoddta dekhun,
7. Pormespor Nodichim bollixtt ani ufall udkam, mhonngê Assiriechea razak ani tachea sogllea tezvont dol-bharak ani tachem sogllem voibhov, tumchê add uprasaitolo. Ani ti aplea pottantli utthun bhoron òt'toli ani apleô doddô moddun uddoitoli;
8. ti Juda-prantant anvr haddun sogllem buddoitoli, ani upott bhoron choddtoli, golleak porian pavtoli; tiche paktte, Im'manuela, tujea desacher xekan'xek vistartole.
9. Aikat, porzamnô, tumcho zatolo churo; kan diat, poixilea raxttramnô, tumi zai titli zhuzachi toiari korat, tori tumcho churo zatolo to zatoloch.
10. Zai titleô mosloti korat; soglleô fiskotton vetoleô; dhomkavnniô tumcheô porgôtt korat: teô ghoddon ieuncheôch nant, karonn Dev amchea sangata asa!'
11. Aplea hatan ghôtt dhôrun, ho lôk dhôrta ti vatt sôddunk Sorvesporan mhaka xiddkailo. Tannem mhollem:
12. Hô lôk bondd mhonntta taka tum bondd mhonnum naka; to bhieta taka tum bhieum naka, tachem koslench bhem dhorum naka.
13. Ekloch Sorvsoktivont Sorvespor Povitr mhonn mandun ghe, Tachem ekleachench bhem dhôrchem, fokot Tachê mukhar kampun ravchem.
14. Toch povitr-sthan zatolo ani mon'xam adllun poddtat toslo fatôr, Israelachim don-ui Ghoramnnim sokla uddoita toslem khoddop, Jerusaleant ravtoleank êk fas ani manôs.
15. Taka adllun zaitim zannam khala poddtolim, aptton moddon vetolim, fasak sampoddtoli ani koidi zatolim.'
16. Hi govaiki bandun urum-di, mhojea xisanchea kallzant ho updês xik'ko marun asum-di.'
17. Jakobachea Ghorannea thaun Sorvespor Aplem tondd vollun lipoita, tori Tachi vatt hanv polleit asam, Tacher hanv visvas tthevtam.
18. Polleiat ami hanga asanv, hanv ani mhojim bhurgim, Sorvesporan mhaka dileant tim. Sion Dongrar tthikann korun ravtolea Sorvsoktivont Sorvesporan Israelachea Ghoranneak dil'lim khunna ani ochoriam ami.
19. Tim tumkam mhonnttolim: 'Bhutank ani montram sursurtolea ghaddiank vicharunk vochat.' Khoincho-i lôk aplea devank vicharunk vetoloch, ani jiveam khatir mel'leank vicharunk vetolo.
20. Updês ani govaiki apnnank mellchê khatir, dubava virêt tim oxem uloitolim, punn tankam fantem udeunchench na.
21. Dolldiro ani bhukel'lo zaun to desant zollim-mollim firtolo, upaxim asun ekdom' ragan zolltolo aplea razachi ani aplea Devachi ninda kortolo; ani voir dolle ubarun,
22. magir zomnir nodor marun, taka sampoddtolim fokot dolldirponn ani kallôkh, tollmolleancho andhar; taka distoli fokot rat.
23. Zoim tollmolle asat, thoim sogott kallo-kitt andhar nhoi? Adlea kallar Tannem Zebulunacho prant ani Neftalicho prant khala ghale, punn, ieunche asat tea disamnim, Jordana poltoddi Doriachê vatter asloli raxttranchi Galileia To mhoimevont kortolo.
