1. Jea vorsa Sargon hea Assiriechea razan pattoil'lo senapoti Ashdod xara-xim ailo ani tacher poddun tannem tem jikhun ghetlem, teach vorsa
2. ani tea somoiar Amozachea puta Izaiasa udexim Sorvespor uloil'lo. Tannem taka oxem sanglolem: 'Chol voch ani tujea penkttak bandlolem gonna-lugott sôddun uddoi ani tujea pãiancheô vhannô kaddun dovor.' Tannem oxench kel'lem: vingllo ani uktea pãiamnim to bhonvunk laglo.
3. Sorvesporan tedna mhollem: 'Zoso Mhozo sevôk Izaias him tin nimannim vorsam, Ejiptak ani Ethiopiek êk khunna ani xokun zaunchê khatir, vingllo ani uktea pãiamnim bhonvot aila,
4. toxench Assiriecho raza Ejiptkarank koidi korun ani Ethiopiekarank nirvaxi korun vhortolo: Ejiptak lojek ghalun, tankam - bhurgeank ani zannteank- nagddim ani uktea pãiamnim ani vinglle kule dakhoun cholun vhortolo.
5. Ethiopiecher visvas dovortaleat mum tumi? Ani Ejiptachi vhoddvik sangtaleat nhoi? Tôr tanchê vixim tumkam bhem distolem ani loz bhògtoli.
6. Ani tedna hê kinarer ravpi lôk mhonnttolo: "Polleiat rê, hancher ami visvas dovorlolo mum rê, ani Assiriechea razachea hatantlim suttonk hancho ami adar maglolo ani asro sôdun hanchê-xim ami dhanvun gel'leanv mum rê, tankam atam kitem zalem tem polleiat! Tôr koxim mhonn ami atam sutt'toleanv?" '
