1. Tea fitur bhurgeanchem kottakotta!- uloita to Sorvespor! Tim mosloti kortat, punn Hanvem teô suchounk nant; tim samilponnache korar kortat, punn tanchea monant Hanvem te ghalunk nant. Oxim tim patkacher patok choddoit asat.
2. Mhojea tonddantlem utor ghenastana Faraohcho asro magunk ani Ejiptak xeronna vochunk, tãnnim Ejiptachi vatt dhôrli.
3. Tôr Faraohcho asro tumkam lojechem karonn zatolo, Ejiptak xeronna vochun tumcho zatolo bhông.
4. Karonn tache kunvor Zoanak geleat, tache razdut Hanesak pavle.
5. Jea lokacho tankam kosloch faido mellcho na, zo lôk tankam kosloch adar diuncho na, modôt-ui korcho na, bogor tankam haddtolo loz ani manbhông, tea lokak te danam gheun geleat.
6. Negebachea savzam vixim jahir kollovnni Jea desant xinvinn ani goroztolo xinv, furxem ani uddto sorôp astat, oslea koxttam-tollmolleanchea desantlean apnnank kosleach faideacho zauncho na toslea lokak gaddvanchê pattir ghalun apli doulôt-girestkai gheun vetat, unttanchea dhongancher aplim bhanddaram vahun vhortat.
7. Ejiptachi sasai tankam zatoli nirfôll ani nirorthi, dekhun 'domail'lo Rakôs' oxem taka Hanv nanv ditam.
8. Chol voch atam ani iuga-iugant fuddlea pinddkank sakxi diunchê khatir êkê folliecher hem khonchoun dovor, eka pustokar boroun kadd:
9. Hi êk fitur porza, tim fottkirim bhurgim, Sorvesporachê Somurtik kan dinant tosleô put-dhuvô.
10. Dorxonam ghetoleank tim mhonnttat 'Dorxonam polleum nakat.' Provadiank mhonnttat: 'Amkam sotache sondex dium nakat. Godd-godd fuslavnniô sangat amkam; fottkirim dorxonam gheiat.
11. Vattê vele kuxin sorat, ho rosto sôddat, Israelachea Povitr Devak amchê mukhavelo pois kaddat!'
12. Tôr Israelacho Povitr Dev oxem mhonntta: 'Hê xiddkavnnek tumi patt kortat dekhun, ani naddbudhicher ani khotteponnacher patieun, hancher tumi visvas tthevtat dekhun,
13. ho guneanv tumkam zatolo futt-poddlolea ani konsllunk pavlolea eka unch durga sarko: ovchituch, eka khinna bhitôr, tem konsllon moddon poddta, Ekach faran puddkel'lê kumbarachê môddkê bhaxen To tacho churo kortolo.
14. Chulintlo êk kôllso dhôrunk vô buiarantlem ilem udok kaddunk tê môddkechea kuddkeantli ek koili sud'dam mellpachi na.'
15. Karonn Sorvespor Dev, Israel Povitr mhonn vondita To, oxem mhonntta: 'Mon bodlun xant ravxat zalear, tumkam taronn melltolem; xant ravun Mhojer visvas tthevxat tôr, Hanv tumkam bollixtt kortolom. Punn hem tumkam bilkul naka!
16. "Na" mhollem tumi -, ghoddear bosun ami pollun vetoleanv." Borem tôr, pollun vochat! Anink-ui tumi mhollem: "Zhoddzhoddit rothancher ami dhanvun vetoleanv". Borem tôr, dhanvun vochat! Tumchê pattlean vetat te-i zhoddzhoddit dhanvtole!
17. Ekleachêch dhomken tumche hozar pollun vetole, panch zannanchê dhomkavnnen sogllinch tumi pollun vetoleat. Tedna tumchê modlim urtat tim porvotachê tenkxer ubo kel'lea bavtteachea khambea sarkim, dongrar ubarlolea bavttea bhaxen zatolim.'
18. Punn Sorvespor tumkam proson'n zaunk ravta; Zo Xrêxtt-Vorto, To tumchi doia korunk veta. Karonn Sorvespor nitivont Dev; Tachi vatt polleun asat tim sogllim subhagi!
19. Khorench, Jerusaleant ravtolê Sionachê porjê, tum anink rudon korchi naim. Tum adarak ulo martai tedna To tuka proson'n zatolo; tuzo tallo aikona fuddench To tuka zap ditolo.
20. Dhonian tuka dogdogancho unddo dila ani upodreanchem udok, punn tuzo Guruji anink lipun ravcho na, ani tujeach dolleamnim tujea Gurujik tum dekhtolii.
21. Tum uzvean vô davean vexi, tujê pattlean tuje kan him utram aikotole: 'Hich ti vatt, têch vatten cholun voch.'
22. Rupem kaddloleô tujeô murti ani bhangar kaddloleô tujeô protima tum opovitr mhonn lekhtolii. Ghannicheô vostu mhonnun tum teô kaddun bhair martolii. 'Onvallun vochat!', oxem tankam khoraien mhonnttolii.
23. Zomnint vomptai tea biak To paus dhaddtolo ani zomin utpon'n korta to unddo gulgulit ani puxttik zatolo. Tea disa tujim gorvam lamb-rund mollar chorvak vetolim.
24. Zomin kamais korpi boilank ani gaddvank moddkullen ani challnnen toiar kel'li khavôdd melltoli.
25. Jea disa kottancho bhosm zatolo, tea vhoddlea Maramarechea disa sogllea unch-unch porvotancher ani sorv unchlea dongrancher zhori futt'toleô ani udkache vhall vhanvtole.
26. Jea disa Sorvespor Aplê porjeche ghai bandtolo ani Tannench mar ghalun kel'lim chovonam pekoitolo, tea disa chandnem suriachea vota sarkem zatolem, ani sat disanchem vot ekach disa poddlolê bhaxen, vot sat pavtti odikkoddok lagtolem.'
27. Polleiat, pois thaun ieta Sorvesporachem Nanv, Tachea zolltea ragachea dhunvrachim datt kupam choddot vetat, Tache ontt krodhan bhòrleat, Tachi jib zolltea ujea sarki.
28. Tacho svas êkê bhoron vhanvtolê, gollea porian pavtolê nodi sarko. Nas korpi challnni gheun raxttram ghallunk To ieta, raxttranchea daddvonnank Aplem logom' ghalun tankam nisonttonak pavounk ieta.
29. Utsovachê rati tumi gitam gaitat, toslench zatolem tumchem git; ani vennu vazoun iatrekaram nachun-nachun Sorvesporachea dongrar choddtat, Israelachea Khoddpa-xim vetat, tê bhaxen tumchim kallzam anondbhorit astolim.
30. Sorvespor Aplo tezvont tallo aiko-so kortolo ani Aplea krodhachea zallan, bhosm korpi ujean, tufan ani korveancho paus dhaddun, khast lavunk Aplo zôdd hat denvoitolo.
31. Karonn Sorvesporacho tallo Assiriek kampero haddtolo ani To tika Aplea danddean dopttun dhopkun boddoitolo.
32. Dholkim boddoun ani kin'noriô vazoun, Aplo hat ubarun ticher To loddai korit astolo; loddai korta titlê-i pavtti khastichea danddeacho far ticher poddtoloch.
33. Tofetacho khôl ani rund ujea-fôndd, bhorpur lankddamnim bhòrlolo, adim-fuddench razak toiar kel'lo asa. Gondhokacho lôtt zal'lê porim Sorvesporacho svas taka uzo laitolo.
