1. Fantea porim udeun doiallaiechem nitivontponn porzoll'lea bogor, ani loklokit divttê vori tichem taronn pettlea xivai, Sionachea mogan Hanv ogo ravcho na, Jerusalea khatir Hanv thar gheuncho na.
2. Tedna raxttram tuka favo zal'lem doiallaiechem nitivontponn polletolim, soglle raza tuji mhoima dekhtole, ani tuka eka novea nanvan ulo kortolim: hem nanv khud Sorvespor tuka ditolo.
3. Sorvesporachea hatant tum zatolii êk tezvont mukutt, tujea Devachea hatant êk raiall mukutt.
4. Sôddun dil'li' hea nanvan tuka anink ulo korchim nant, ani tujê bhumik 'padd zal'li', oxem mhonnchim nant. Portench zalear, 'Mhozo sontôs', tuka oxem mhonnun lêkhtolim, ani tujê bhumik 'logn zal'li' oxem mhonnun pachartolim. Kiteak Sorvespor tujê sovem sontosbhorit zatolo ani tuji bhuim logn zatoli.
5. Zoso êk tornnatto eka cheddva lagim logn zata, tosoch tuka novean bandun haddta To tujê lagim logn zatolo, ani zoso êk novro aplê hoklê sovem murgott'ta, tosoch tuzo Dev tujê sovem murgott'tolo.
6. Tujea kottam-durgancher Hanvem pahrekar dovorleat; disache toxe ratche, te kodinch oge ravche nant. Sorvesporak Tachea bhasavnniancho ugddas korun ulo martoleamnô, tumi thar gheum noiê!
7. Jerusalem Tannem novean bandun haddi-sôr ani tika prithumecho obhiman korun novean ubari-sôr, Taka-i tumi thar dium nakat!
8. Aplea uzvea hatachean ani Aplea bollixtt bavlleachean Sorvesporan oso soput ghetlolo asa: Hea fuddem anink kednanch tuzo dhano tujea dusmanank Hanv khaunk diuncho na. Tras gheun tunvem kel'lo soro porkea mon'xank anink kednanch pieunk mellcho na.
9. Lunvnni kortat tinch pik khatolim ani Sorvesporak vakhanntolim; dakô kaddtat tinch Mhojea povitr Mondirachea angnnant tancho soro pietolim.
10. Utrat, darvontte utrun kaddat! Mhojê porjek rosto toiar korat! Sopatt korat, rajmarôg sopatt korat, fator gundde kuxin kaddat! Porzank kollounk bavtto ubarat!
11. Polleiat, prithvechea ximam porian Sorvespor oxem porgôtt korta: 'Sion-Xarak oxem sangat: Tumcho Tarôk ho polle ieta! Aplea zoitachem inam' To gheun ieta, Tannem jikhun ghetlolo mhal Tachea fuddeant veta!'
12. Povitr Porza', 'Sorvesporan soddoil'lo lôk', oxem mhonnun tankam ulo kortolim. Ani tuka mhonnttolim: 'Otrekloli potin', 'Sorvesporan kodinch soddun diunk naslolem Xar!'
