1. Tea disa, Judachea prantant hem git gaitolim: 'Amkam ek ghôtt mozbut xar asa: amchi rakhônn korunk durgam ani kott Tannem bandleant.
2. Darvontte ugddat! Promannik raxttrak, visvaxi ravlolea raxttrak, bhitôr sorunk diat.
3. Zanchem mon Tujer thir dhòrlolem asa, tankam Tum purnn xantin jieunk ditai, kiteak tancho visvas Tujer dovorlolo asa.
4. Sorvesporacher visvas dovrat sodankal, kiteak Sorvespor sodankal thir Khoddop.
5. Voir-voir jietoleank, unchlea kottant ravtoleank Tannem sokla uddoileant; tem kott Tannem môddun uddoilem, zomni porian sopatt kelem, gollgollaun dhul'lint xevttilem.
6. Pillnnuk sôslolo lôk atam aplea pãiam tolla tem mostita, durboll lôk aplea panvlamnim tem maddoita.'
7. Nitivont Devachi vatt sodanch uzu cholnnukechi; uzu mon'xank Tunch uzu cholnnukechi vatt soroll korun ditai.
8. Khorench, Sorvespora, Tujea nivaddeancho rosto dhôrun, ami Tujer visvas dovortanv. Tujem Nanv gheunk, Tuzo ugddas korunk, hech amchea otmeache otrek.
9. Ratcho porian mhozo otmo Tuka axeta, mhojea hordd'ddeant kalliz mhojem Tuka sôdit asa. Tuje nivadde prithumer dixtti poddtat tedna sonvsarantlea mon'xank promannikponn vollkhunk melltolem.
10. Noxttea mon'xank doia dakhoili zalear-ui, promannikponn kitem tem tim xikonant. Promannikponnachea desant tim vaitt korit ravtat, Sorvesporachi thorai tankam dixtti poddona.
11. Sorvespora, Tuzo hat ubarlolo asa, punn to tankam dixtti poddona. Hê porjecho premaxen Tum môg kortai mhonn tankam polleum-di ani loz disum-di, Tujea dusmanank toiar kel'lea ujean tancho bhosm zaum-di.
12. Ami kelam tem sogott, Tunvench, Sorvespora, amchê khatir korun dilãi; dekhun Tum amkam xanti bhôgunk ditoloi.
13. Sorvespora, amchea Deva, Tujea zagear dusrea dhoniamnim amchê voir apli sot'tea choloili. Punn Tujê bhair anink konnakuch ami vollkhun ghenanv, Tujem ekleachench Nanv ami vonditanv.
14. Mel'lim mon'xam portun jivont zaunchim nant, tancheô savlliô portun utthcheô nant, kiteak Tunvem tankam khast lailii, tancho nas keloi, ani tancho ugddas porian sarko nanch keloi.
15. Tujem raxttr vaddoilãi, Sorvespora, Tujem raxttr vaddoilãi, ani Tuka mhoima zoddleai, desacheô ximô pois-pois pavoileai.
16. Aplea akantachea vellar, Sorvespora, Tuka tim sôdunk pavlim, Tuji khast tancher poddli tedna, Tuka tim ulo marit ravlim,
17. Zoxi êk gorbhest bail aplo vêll pavtôch ballonterachea dukhimnim vollvollta ani bobô marta, toxim, Sorvespora, zaleanv ami Tujê mukhar:
18. ami gorbhest zal'leanv, ballonterak pavlolê porim ami vollvolltaleanv; punn zolm dila fokot vareak. Prithvek ami soddvônn diunk na, jogant vosti korunk konnakuch ami zolma haddunk na.
19. Tujim mel'lim novean jivont zatolim, tanchim moddim novean utthtolim; jim tumi dhul'lint poddlolim asat, utthat, murgottun ul'lasat; kiteak tumcho dôv prokasbhorit dôv, ani prithum' savlliank novean zolma haddta.
20. Cholat, porjê mhojê, tumchea ap-aplea kuddamnim vochat, tumchê pattlean tumchim daram dhampat. Krodhacho zhopatto vocho porian ilo vogôt lipun ravat.
21. Karonn, polleiat, Sorvespor rokddoch Aplea sthana velo bhair sortolo, ani prithver ravtolea somestank tanchea khotteponnam pasot khast laitolo. Prithvi apnnacher vikrail'lem rogot dakhoitolem ani jivexim marlolea apleank anink lipoun dovorchi na.
