1. Tan laglea tumkam? udka-xim ieiat sogllim! Poixe nant tumchê lagim? Tori ieiat! Gonv gheun khaiat, soro gheiat, dud gheiat - poixeam vinnem, funkott!
2. Jiv posunk upkaronant toslea vostuncher kiteak mhonn tumcho duddu môddtat tumi? Tumkam dhadoxi korina tacher kiteak mhonn tumchi zôdd hogddaitat? Chotraien Mhojem aikat ani boreô-boreô vostu tumi khatoleat, rosvont-ruchik jevnnam korun tumi dhadoxi zatoleat.
3. Chit diun aikat, Mhojê-xim ieiat; Mhaka kan diat ani tumi sukhest jietoleat. Visvaxi mogan Davidak kel'li bhasavnni pallun, sasnnak togta toslo korar tumchê lagim Hanv korunk vetam.
4. Polle, porzam mukhar Hanvem taka sakxi korun dovorla; raxttrancho fuddari ani odhipoti Hanvem taka nemla.
5. Polle, tum vollkhonasloi tea raxttrak tum apoun haddtoloi, tuka vollkhona tea raxttracho lôk tujê-xim dhanvun ietolo. Tuka mhoimevont kela tea Sorvespora tujea Devak lagun, Israel Povitr mhonn vondita Taka lagun, hem oxem zatolem.
6. Sôdtoleank Sorvespor ozun mellta, tôr Taka sôdunk lagat. To ozun lagim asa, tôr Taka ulo marat.
7. Khottea mon'xamnim apli vatt sanddchi ani noxttea mon'xamnim aplim vaitt chintna sôddun diunchim. Tãnnim Sorvespora-xim portun ieunchem ani To tanchi doia kortolo. Tãnnim amchea Deva-xim ieunchem ani udar kallzan To tankam bhogxitolo.
8. Tôr Mhojim chintna tumchim chintna nhoi, ani Mhojeô vattô tumcheô vattô nhoi: uloita to Sorvespor!
9. Jitlem mollob prithvê poros unch asa, titleô Mhojeô vattô tumchea vattam poros unch, ani Mhojim chintna tumchea chintnam-vôn vortim.
10. Zoxem paus ani borof mollba thaun poddtat ani bexttim portun vochonant, bogor vomp'piak bim ani jevpak jevonn diunk zomin ximptat, ti sufôll kortat ani bim kirlaitat,
11. toxench Mhojea tonddantlem bhair sorta tem utor, Mhoji khuxi pall'lea bogor ani Hanvem korunk formailam tem xarthi pavoilea xivai, nirfoll zaun Mhojê-xim portun iena,
12. Khorench tumi sontosan bhair sortoleat ani tumkam solamoti portun pavoitolim. Porvot ani dongor anondan tumchê mukhar ul'lastole ani ranantlim sogllim zhaddam talliô pêtt'tolim.
13. Kanttianchê svater soru-rukh vaddtole, khatkhutlianchea zagear vaddtoli mendi. Oxi Sorvesporachi kirti fanktoli, ani hem sogllem zatolem kodinch moddon vochona tosli Tachea Nanvak sasnnik iadgiri.
