1. Nas korpi tum, punn tuzoch nas zaina; ghat ghevpi tum, punn tuzoch konn ghat ghena; tori tujem kottakotta! Dusreancho nas korun zatôch tuzo-i nas zatolo, dusreancho ghat gheun somptôch konn tori tuzo-i ghat ghetolo.
2. Sorvespora, amchi doia kôr, Tujer amcho visvas. Dôr sokallim za Tum amcho bavllo, vaitta-vignachea vellar za Tum amchem taronn.
3. Tujê dhomkavnnechea avazan porza pollun veta, Tum utthun ubo ravtai tedna raxttram zollim-mollim ximpoddtat.
4. Tollam bhaxen Tujê lutticho mhal punzaitat, tollanchea birea vori lôk tacher poddta.
5. Kitlo vorto Sorvespor! Sogtta voir To razvôtt choloita! To Sion-xar bhôrta promannikponnan ani doiallaiechea nitivontponnan.
6. To tuka sodanch rakhun dovortolo; taronn dita ti girestkai mhollear zannvai ani Devachi vollokh, Sorvesporachi bhokti khorem bhanddar.
7. Aikat, tanche dhiravont monis rosteancher dhanvun adar magun bob martat! Xantiche dut-dukamnim roddtat!
8. Rajmarog lokan sôddun dile, rosteancher ietim-vetim konnuch nant. Korar moddon gele, govaianchi konn porva korina, khoincheach mon'xak man na.
9. Roddun-pinrgun moddon poddla dês, lojen bhoron Lebanon veta sukun. Sharon dista padd zal'li zomin, Bashan ani Karmel kampun koddkoddtat.
10. Atam Hanv utthun ieta' - mmhonnta Sorvespor 'atam uboravun Mhoji podvi dakhounk vetam.
11. Polacho tumi gôrb samball'la, tonnak tumi zolm ditoleat: ujea vori Mhozo svas tumkam girastolo.
12. Chunean zal'lê porim porza lason vetoleô, katorlolea kantteam bhaxen ujean tancho bhosm zatolo.
13. Poixilea lokamnô, Hanvem kelam tachi khobor aikat, lagxilea mon'xamnô, Mhojem boll vollkhun gheiat.'
14. Sionant patkiancher aila bhiranticho koddkoddo, devdhorm naslolim mon'xam kolkoltat-thorthortat. 'Amchê modlo konn hea girastea ujea mukhar moronastana urot? Konn tori hea sodam-zolltea agtteant poddun ozun jivo urot?'
15. Zo konn promannikponnan cholta ani sota pormannem uloita, zo pillun-luttoun zôddloli girestkai apnnak nakach mhonntta, ani lônch ghena zaunk aplo hat pattim kaddta, zo rogot vikraunchê ievzonnek kan diich na, ani vaitt kortubank tenko dina zaunk aple dolle dhampta,
16. oslo monis unch dongrar tthikann korun astolo, khoddpar bandlolea kottant taka gavtolo asro, taka jevonn-khann sodanch astolem, ani udok-ui komi zaunchem na.
17. Tujea dolleank favo zatolem tezvont razachem dorxon, lamb-rund dês tankam bhôgunk melltolo.
18. Tujea kallzak adlea akantancho ugddas ietolo: 'Mezun gheunk ietalo to khoim asa atam? Zokhun dôndd ghetalo to khoim gelo atam? Rotnam-mannkam mezunk bhonvtalo to khoim pavlo tôr?'
19. Tea gorvi-urmôtt lokak, konnuch somzona tosli bhas ulovpi lokak, zonglli ani nirôrth bhaxechea lokak, tum anink polleunchoch naim.
20. Dolle ghal Sionacher, amchea utsovanchea Xaracher: Ravpak surokxit ghor, ubarun vhorpacho nhoi toslo tombu, - zacheô khunttiô kodinch oddun kaddunk zainant, zachim doram kodinch tutton vechim nant, toslo tombu oxem tujea dolleam mukhar ubem astolem Jerusalem.
21. Thoim Sorvespor amkam Aplem tez dakhoita: vhoddleô nodi ani bhov rund kharizô asun-ui, tancher dusman patmariô fircheô nant, khoimcheach tezvont tarvak tancher cholunk mellchem na.
22. (Sorvespor amcho Somurt-Dinnar, Sorvespor amcho Raza ani amcho Tarôk.)
23. Tumchim doram dil zaun geleant: tanchean xiddkatthi ghôtt dhorunk zaina, bavtto-i ubarunk zaina. Dekhun khub lutticho mhal vanttcho asa, thonttim-langddim porian luttunk lagtat,
24. thoinsor ravpi konnuch 'apunn boro na mhonn' sangcho na, thoinsor ravpi lokak aplea guneanvanchem bhogsonnem melltolem.
