1. Promannikponnan raj cholovpi êk raza ietolo ani neaian mon'subi korpi kunvor ietole;
2. tantlo dôr-eklo varo sutt'ta tedna asro zatolo, tufan uprasta tedna xeronn zatolo, sukê zomnintlean vhanvtea vhallam sarko, padd zal'lea ganvant mozbut khoddpachê savllê sarko.
3. Polletoleanche dolle anink dhamplole urche nant, aikopianche kan chit diun aikotole,
4. ullvulleanchem mon vivekun zannvai zôddtolem, gagianchi jib suddsuddaien spoxtt uloitoli.
5. Pixeak konn anink manadik monis mhonncho na, ani khottea mon'xak konn sodôll hatacho mhonn lêkhcho na.
6. Karonn piso pixeponnam uloita, tachem dhean-mon khotteponnacher asa; aplea kortubamnim taka devdhorm na, aplea utramnim to Sorvesporacheô chuki kaddta; bhukel'leank to upaxinch dovorta ani tanel'leank kodinch pieunk dina.
7. Khottea mon'xachem sogllench vaitt, durbollam vatten nit asa tedna porian, goribancho fottimnim nas korunk khotteô manddnniô to ievjit asa.
8. Vhodd monachea mon'xacheô ievzonneô soglleô unch-vorteô, to korta tem sogott promannikponnan korta.
9. Sust jietolea ostoriamnô, mhojem aikat! boddai kortolea dhuvamnô, hanv sangtam taka chit diat.
10. Boddai kortolea ostoriamnô, eka vorsa ani kaim disam bhitôr tumi koddkoddtoleat; kiteak dakanchem pik somptolem, dakô kaddcho somoi anink aschoch na.
11. Tumi, sust jietolea ostoriamnô, bhieun-kampun ravat; tumi, boddai kortolea ostoriamnô, thorthorun-koddkoddun dis kaddat; tumchin hesônn kaddat, vingllim zaiat, tumchea penkttank sakafottem bandat, gonnacheô falliô bandat.
12. Dukh korun tumchem hodd'ddem boddoiat! hanstim xetam nanch zalim, follabhorit dak-veli anink disonant;
13. kantteriamnim bhoron ailea mhojê porjechi zomin, hea sogtta pasot sontoxi ghoram moddon gelim, khuxali kortolem xar padd zalem: hodd;ddem boddoit-boddoit ravat!
14. Karonn rajkott sôddun ditole ani lokan bhòrlolem xar osadd poddtolem. Ofelachem ani Gopurachem ghorttann zatolem, ranott gaddvanchem khella-moidan, hinddanchem chorva-moll.
15. Ani tedna voir thaun Dhoni amcher atmo dhaddtolo, ani oronnem zatolem sufôll zomin, ani sufôll zomin rana vori mat'toli.
16. Oronneant nit vosti korun astoli, ani sufôll-pikall zomnicher promannikponn tthikann kortolem;
17. promannikponnantli utpon'n zatoli xanti; promannikponnachem foll nirontôr svosthai ani surokxa.
18. Mhoji porza jietoli eka xantichea zagear, surokxit ghoramnim, svosth ravnneamnim.
19. Ranam kapon nanch zatit, ani xarak tokli pondak ghalunk poddot:
20. tori tumi sorv vhanvtea vhallam-xim khuxalkaien vomptoleat ani tumchea gorvank ani gaddvank sogllêch kodden chorvak sôddtoleat.
