1. Ami porgôttlea ti khobor konn sotmandit? Ani hê ghòddnnent Sorvesporacho bollixtt hat konnak tori dokhôl zala zait?
2. Tachê mukhar êkê rompiê sarko to upzolo, sukê-korddê zomnintlea eka palla sarko. Taka sobitai na, surupai na; amche dolle oddun vhorpak taka koslich sundorai na.
3. Konn tachi porva korina, mon'xamnim taka poro ghala! Dukhincho monis to, koxtt-dogd bhôglolo; zancher ami nodor porian ghalinanv, tosloch eklo! Mon'xam tachi beporva kortat, aminch taka lekhunk na!
4. Khoreponnim tacher poddle te koxtt-dogd amchech, tannem bhôgleô teô dukhi amcheôch. Hea mon'xacher xikxa poddlea, Devan taka dogdaila ani apttun uddoila, oxem amkam dislolem.
5. Khorench mhollear, amchea opradhank lagun taka aspas vidhlo, amchea guneanvank lagun taka vollvollailo. Tacher xikxa poddlea tichê vorvim amkam xanti mell'lli, ani tachea ghaiank lagun amche ghai pekle.
6. Sogllim ami, menddram bhaxen zollim-mollim ximpddon gel'leanv, zonn-eklean ap-apli vatt dhôrloli. Ani amam-somestanchea guneanvancho bhar Sorvesporan tacher ghalo.
7. Taka boroch vollvollailo, tori tannem sogllem nomrutaien sôslem, ani aplem tondd ugddunkuch na. Marunk vhortat toslea lhan-menddrea sarko, apnnak tastolea mukhar ogich ravtolê xelliê bhaxen, tachea tonddantli zap bhair sorli na!
8. Zobordosten taka dhôrlo ani mon'subek oddun vhelo: konn tori tachê khatir ulounk fuddem sorot? Khorench, jivea mon'xanchê prithumêvelo taka umttun kaddlo; aplê porjechea opradham pasot tacher mornnachi khast poddli.
9. Noxtteam modem taka nikhipilo ani vaittoveam modem taka somadhi favo zali. Punn khorench mhollear tannem kodinch vaitt korunk na, tachea tonddant kednanch lobaddi mellunk na.
10. Koxttam-dogdamnim taka chenchunk Sorvesporak borem dislem. Patkanchem farikponn diunk aplea jivitachem bolidan to korit zalear, aplê sonstik polleunk taka favo zatolem, lamb auk to bhôgunk pavtolo, ani tachê udexim Sorvesporachi khuxi xarthi pavtoli.
11. Tachea jivache vollvolle somplea uprant, to sarkoch uzvaddak pavtolo ani dhadoxi zatolo. Aplea onnbhova vorvim Mhaka manovlolo Mhozo sevôk mon'xanchim patkam apnnacher gheun zaitea zannank Mhaka manovlolim kortolo.
12. Dekhun sobhêmazar Hanv taka manacho zago ditolom, ani zhuzant zôddlolo mhal to somestam modem vantt'tolo, kiteak tannem ap-khuxen moronn apnnacher ghetlem ani patkiam modlo êk patki koso apnnak lekhunk dilo. Khorem mhollear, somest mon'xanchea patkancho bhar to apnnacher gheun aslo ani patkiam pasot vinoti korit aslo.
