1. Leviathan to uddto nag, Leviathan ang môddpi nag: tea disa, Apli nibôr, okhôndd ani ghôtt torsad gheun Sorvespor taka khast laitolo: somdirantlea arak To jivexim martolo.
2. Tea disa, matlolea dakam-mollea vixim ek git rochun gaiat!
3. Hanv, Sorvespor, tacho Samballnnar; tachim panam zhoddon poddona zaunk Hanv to ghoddiê-ghoddiê ximptam, dis-rat tachi rakhônn kortam.
4. Mhojea monant kosloch rag urunk na. Kantte ani kanttiô dixtti poddlear, Hanv tancher zhuz manddtolom, tamkam pãiam tollam mostitolom ani ekan' êk tankam lasun uddoitolom.
5. Punn Mhojê sorxem tankam asro zai zalear, tãnnim Mhojê lagim xanti korchi, hôi, tãnnim Mhojê lagim xanti korchi.
6. Ietea disamnim, Jakob mullam-pallam ghetolo, Israelak zatole bhonge ani fulam ani tachim follam ak'khea sonvsarak pavtolim.
7. Jitlo heramnim taka mar dilo, titloTannem-i taka mar ghalo kai? Zoso heramnim tacho jiv kaddlo, tosoch Tannem-i tacho jiv kaddlokai?
8. Taka dhanvddaun ani nirvaxi korun, Tunvem taka xikxa dilii; Udentichea varea sarko zhoddzhoddit zhoddpo dhaddun To tachea pallank laglo.
9. Jakobachea guneanvachem oxem farikponn diun zatolem, hem asa tachea patkachem farikponn: Chuneacheô khoddeô fôddun tanchi pudd kortat toxem, tanchea sogllea vedinchea chireank To kortolo. Ashera devik khambe ani suriak dhumpa-vedi konn anink ubarcho na.
10. Karonn kil'lea-kottachem xar atam osadd poddlam, soglleamnim tem sôddun dilam, oronnea sarkem tempadd zalam. Thoinsor hindd chorvak vetat, thoim bostat ani khandeô khaun uddoitat.
11. Khande sukun moddon geleat, bailô ietat ani te zollovak gheun vetat; kiteak ho lôk ginean-naslolo lôk ani hea pasot tacho Rochnnar tache churchure korcho na, Zannem taka akarla, To taka koslich doia dakhouncho na.
12. Tea disa, vhôdd Nodi thaun tem Ejiptachea vhalla porian Sorvespor Apli môllnni suru kortolo, ani tumkam, Israelachea putam-dhuvamnô, To ekan-ekak venchun zoma kortolo.
13. Tea disa, êk motto korno vaztolo, ani Assiriechea desant sanddleant tim ietolim, toxench Ejiptachea desant nirvaxi zaleant tim, ani Jerusaleant, povitr porvotar, tim Sorvesporak bhôztolim.
