1. Jes'sechea mullak êk kombri futt'toli, tachea pallantlo upzun êk rompo follam ditolo;
2. tacher denvtolo Sorvesporacho Atmo: zannvaiecho ani vivekacho Atmo, budhicho ani podvecho Atmo, Sorvesporachi vollokh ani bhokti dita to Atmo. (Sorvesporachi bhokti tacho svas.)
3. To tondda pormannem neainit korcho na, lokachem aikun to nirnnoi gheuncho na,
4. punn promannikponnan to lhanank-durbollank nit korun ditolo, ani desachea lhan'vik-khaltea lokakhatir favo to nirnnoi ghetolo. Aplea sobdachê betkatthien desachea zobordost mon'xank To mar ghaltolo, aplea onttanchea svasan khottea mon'xancho To nas kortolo.
5. Promannikponn tachea penkttacho pott'tto, visvaxiponn tacho komorbond
6. Kolsunno ani menddro sangata jietole, bibtto-vag bokuddleachê kuxik add poddtolo, paddkulo ani xinvachem por borabôr chorvak vetolim ani êk supurlo bhurgo tankam chorvak vhortolo.
7. Gai ani ansvel ektthaim chortolim ani tanchim poram ektthaim nhidtolim. Xinv boila bhaxen tonn khatolo. Dudachem bhurgem sorpachê dholi-xim khelltolem.
8. Supurlem bhurgem furxeachea billkant hat ghaltolem.
9. Mhojea ak'khea povitr porvotar konnuch vaitt korcho na vô dusream konnakuch nuksann haddcho na. Doria zoso udkan bhòrlolo asa, toso Sorvesporachê vollkhin sogllo dês upott bhoron ietolo.
10. Tea disa, Jes'sechem mull porzam pasot êk bavtto koso ubem astolem. Raxttram dhanvim-dhanvim taka sôdunk ietolim ani tachem tthikann mhoimevont zatolem.
11. Tea disa Dhoni Aplê porjechea urlolea zomeak, mhonngê Assiria, Ejipt, Patros, Kush, Elam', Shinar, Hamat ani Doriantle zunve, hea ganvamnim pordexi zal'leantlim urleant tankam - portun haddunk aniêk pavtt Aplo hat ubartolo.
12. Raxttram khatir To êk bavtto ubartolo ani Israelachea pordexiank zomoitolo; zollim-mollim ximpoddlolea Judachea lokak prithumechea char-ui dixam thaun portun haddtolo.
13. Tea somoiar Efraimachi nirddukai somptoli ani Judache dusman nattak zatole; hea fuddem Efraim' Judachi anink nattkai dhôrcho na ani Juda Efraimak anink zollchona.
14. Tê ostomtê vatten Filistevkaranchê pattik lagtole; vangdda te udentichea lokank lutt laitole, Edomak ani Moabak aplea tabeant ghetole, ani Am'mon'karank aplê adhin kortole.
15. Tedna Sorvespor Aplea svasachea unhallan Ejiptacho upsagôr sukoitolo, ani Aplo hat Nodicher vistarun tiche sat fantte korun sôddtolo; oxem sukea pãiamnim lokak nôd utrunk zatoli.
16. Ani Israel Ejiptantlo bhair sorun ailo tedna ghòddlem toxem, Tachê porjechea urlolea zomeak, Assiriechea pordesantlim urleant tankam, êk razmarôg ukto zatolo.
