1. Ani atam, Jakoba, Mhojea sevoka, Hanvem venchun kaddlolea Israela, Mhojem aikun ghe.
2. Zannem tuka rochla, avoichea kusveant-thaun Zannem tuka akarla, ani Zo tujea adarak pavta, to Sorvespor oxem mhonntta: Bhieum naka, Jakoba, Mhojea sevoka, Hanvem venchun kaddlolea Jeshuruna!
3. Karonn tanel'lê zomnir Hanv udok sôddtolom, suklolê bhuincher udkache vhall vhanvoitolom. Tujea putam-dhuvancher Hanv Mhozo Atmo ghaltolom, Tujê sonsticher Mhozo axirvad denvoitolom.
4. Udok asa thoim zoxem tonn kirlota, vhanvtea vhallachê degek zoxe hivor vaddtat, toxim tim upzon vaddon ietolim.
5. Konn-eklo mhonnttolo: 'hanv Sorvesporacho.' Dusro konn Jakobachem nanv apnnak ghetolo. Anink konn 'hanv Sorvesporacho' mhonn aplea hatar khonchoun kaddtolo, ani 'Israel' hem addnanv lôk taka ditolo.
6. Sorvespor, Israelacho Raza, Sorvsoktivont Sorvespor, tacho Tarôk, oxem sangta: Poilo ani Nimanno to Hanvuch. Mhojê bhair anink Dev nanch!
7. Mhojê sarko konn asa? Taka fuddem sorum-di ani spoxtt uloum-di, ani aple purave Mhojê mukhar manddum-di. Purvilea kalla thaun konnem tori ghòddchem aslem tem sangun dilem zait? ani fuddarak ghòddtolem tem kollit korunk konn tori asa kai?
8. Thorthorum nakat, bhieum nakat: tumkam Hanvem sangun dovrunk na kai? ani magam thaun tumkam Hanvem tem kollit kelam ki na? Tuminch Mhojim sakxidaram: Mhojê bhair anink konn Dev asa kai? Khoddop anink dusrem na, Mhaka zalear tachi khobor nanch!
9. Murti kortat te soglle kãich nhoi; tankam dhadoxi kortat tim tanchea hatanchi kamam kiteakuch upkaronant. Murtink man ditat tim sarkim kudd'ddim ani nennar mon'xam; dekhun tim lojek sampoddtolim.
10. Zoddichi axa dhori-nastana konnem tori kednanch eka devak akarla vô êk murti koddhoilea zait?
11. Tiche soglle bhokt koxe lojek sampoddtole polleiat, karonn te murti-kar fokot monis! Tankam soglleank zoma zaun fuddem ieum-di: kitlem bhem ani loz tankam bhògta ti polleiat magir!
12. Lohar kollxeancher êk kuradd korta, tutio gheun taka akar dita, aplea bollixtt bavllean lokhonddacher dhopke marun-marun ti kuradd toiar korta. Magir taka bhuk lagta ani tacho jiv thokta; udok-ui pieunk na dekhun tachem sogllem boll moddon veta.
13. Lankddacho xilpi aplim zokham gheta, chunea-lapsan murticho akar chitarta, ttanki dhôrun ti noksunk lagta ani rondho bhonvddaun ti topasta. Oxi mon'xa-akarachi, mon'xa-sorupaiechi, prarthona-zagear dovrunk upkarta tosli murti korun dita.
14. Tannem devdar kaple, ranant apnnak dovorlolea zhaddam-rukham modle êk soru ani êk xindur vinchun kaddle, êk devdar-ui lailo ani pausan to borê bhaxen vaddoilo.
15. Zollovak upkarta tedna, to tanchem thoddem lankudd xêk gheunk vhorta; tem chulint ghalun tacher bhakri bhazta. Punn tachoch êk dêv-ui korta ani taka bhôzta; êk murti korta ani tika pãiam poddta.
16. Ordem lankudd chul'lint ghalun zolloita, tacher to mas bhazta, tem khata ani pott bhôrun dhadoxi zata; teach borabôr to dhogak bosta ani mhonntta: 'Hea bhogbhogancher dolle lavun astam, kai boro hanv xèktam!'
17. Urlolem lankudd gheun to êk dêv korta, taka pãiam poddta, tachi puza korta ani taka prathon korun oxem mhonntta: 'Tunch mhozo dêv, tôr mhojem taronn kôr!'
18. Te kãich nokllot, kitench somzonant. Tanche dolle samke dhamplole asat, kitem sarkem tem vollkhunk tanchem kalliz dhamplolem asa.
19. Tanchê-modlea ekleak porian ok'kôl na, konnakuch ginean na, konnuch oxem chintunk bosona: 'Ordem lankudd hanvem zolloilem ani kollxeancher bhakri ani mas bhazun hanv jevlom. Ani urlolea lankddachi hanv atam kanttalleachi vôst kortam ani lankddachea kuddkeak pãiam poddtam: hem mhojem sarkem asa?'
20. To gobrak axeta, tachem kalliz fosovlam, ani dekhun to vatt chukla. Taka taronn mellchem na; 'mhojea hatant asa tem fokot êk fôtt', oxem to kodinch chintcho na.
21. Jakoba, heô vostu monant dhôr, Israela, tum Mhozo sevôk mhonn ugddas kôr. Hanvem tuka akarla, tum Mhozo sevôk; Israela, Hanv tuka kodinch visorcho na.
22. Tuje guneanv eka kupa vori, ani tujim patkam dhova sarkim, Hanvem uboun nanch kelim. Mhojê-xim portun ie, kiteak Hanvem tuka soddoila.
23. Mollba, sontosache ul'las sôdd! kiteak Sorvesporan Aplem kortutv kelem! Patalla, vhoddlean bob mar! Sontosan arddun gaiat, porvotamnô, ani ranantlea sorv zhaddam-rukhamnô! Karonn Sorvesporan Jakobachi soddvônn keli ani Israelant Apli mhoima fankoili!
24. Oxem sangta Sorvespor, tuzo Tarôk, kusveant-sun tuka akarla To: Hanvem, Sorvesporan, sogllem rochlam, Hanvem ekleanuch mollob vistarlam. Hanvem prithvek akar dila tedna konn tori aslo Mhojea adarak?
25. Zo ghaddianche xokun fiskottaita ani parkhiank pixe korun sôddta, pondditank ghuspaita ani tanchi vidia pixeponn mhonn dakhoita to Hanvuch!
26. Hanvuch Mhojea sevokachem utor thiraitam ani Mhojea dutancheô ievzonnô xarthi pavoitam; Hanvuch Jerusaleak sangtam: 'Tujê bhitôr lôk ravunk ietolo'; ani Judachea nogrank: 'Tumkam novean bandun haddtolom ani ghorttann zal'lem Jerusalem novean ubem kortolom.'
27. Somdirak Hanv sangtam: 'Suko za! Tujeô nodi Hanv sukoitolom.'
28. Sirusak Hanv mhonnttam: 'Mhozo gonvlli tum!' Soglleô Mhojeô khuxiô to palltolo. Jerusaleak to mhonnttolo: 'Tuka hanv novean bandun kaddtolom!', ani Devmondirak: 'Tuka noveô buniadi marun ditolom!'
