1. Dipam-zunveamnô, Mhojê mukhar ogich ravat! porzank novem boll gheum-di! Lagim ieun uloum-di. Neainit korunk zoma zaum-ia.
2. Zaka eka pattlean ek zoit mellta, tea promannik mon'xak konne mmhonn Udenti thaun upzoun haddla? Konn raxttrank tachea tabeant haddun ghalta ani razank tachê adhin korta? Tachi torvar tancho dhul'l korun sôddta, tachem dhonu tankam pola vori zollim-mollim ximpddaita.
3. To tanchea pallank lagta ani aplim panvlam rosteak tenkoinastana, konn addainastana fuddem veta toso veta.
4. Hem sogott korta konn? Hem kortutv konnachem? Zo survek thaun êk-êkê pinddkek rochun apoita, Tachench kortutv hem! Hanvuch To, Sorvespor, orombhak thaun asam To, xevottak-ui astolom Toch!'
5. Kinariô ani zunve hem polleun kamptat, prithvechea ximank porian thorthoro sutt'ta: lagim sortat sogllim, pavlim polleiat.
6. Sogllim ekamekak adar ditat, Porosporim mhonnttat: 'Dhir dhôr!'
7. Thovoi xettik dhir dita, uzollnnar oironnacher tutio martoleak kalliz dita. Panspa vixim to mhonntta: 'Borem kam' kelãi.' Ani murti halona zavpak to ti khilleamnim ghôtt korta.
8. Tum, Israela, Mhojea sevoka, Mhojea venchun kaddlolea Jakoba, Mhojea ixtta Abrahamachea puta,
9. Prithvechea ximam thaun Hanvem tuka ghôtt dhôrun haddla, poixilea desam thaun Hanvem tuka apoila; Tuka Hanvem mhollam: 'Tum Mhozo sevôk, Hanvem tuka venchun kaddla, tuka sôddun diunkna.'
10. Tôr bhieum naka, kiteak Hanv tujea sangata asam; huskeun ghabrun polleum naka, kiteak Hanv tuzo Dev. Tuka Hanv bollvont kortam ani mozôt ditam, Mhojea zoitivont uzvea hatan tuka samballun dhôrtam.
11. Polle, tuka zolltale te soglle lojen bhoron tokli pondak ghaltole; tujê kodde zhogddem manddunk sôdtale te dhul'lint vetole, nanch zatole.
12. Tujê kodde loddai kortale tankam tum sôdunk bhonvtoloi, punn te tuka sampoddche nant. Tujê lagim zhuz kortale te bhongon vetole, nanch zatole.
13. Kiteak Hanv, Sorvespor, tuzo Dev, tujea uzvea hatak ghôtt dhôrtam; Hanv tuka sangtam: 'Bhieum naka, Hanv tujea adarak ietam.'
14. Jakoba, kirkôll kiddea! Hinn-holkea Israela, bhieum naka! Hanvuch ietam tujea adarak - uloita to Sorvespor! Zo Israelacho Povitr Dev Toch tuzo Soddvonnar.
15. Polle, Hanv tuka ek môllnnechem iontr kortolom, novem iontr, doddte dant aslolem. Porvot môddun fôddun tum tanchi chur kortoloi, dongor sukea tonna sarke korun sôddtoloi.
16. Tum tankam varem ditoloi ani varo tankam uboun vhortolo, ani vadoll tankam zollim-mollim ximpddaitolem. Punn tum Sorvespora sovem sontostoloi ani Israelachea Povitr Deva sovem tuka mhoima melltoli.
17. Dolldirim ani gorib mon'xam udok sôdtat, punn thembo porian na, tanen suklea tanchi jib. Hanv, Sorvespor, tanchem aikotolom, Hanv, Israelacho Dev, tankam sanddcho na.
18. Bhurkondd dongrancher nodi ani vollamnim zhori vhanvo-xeô kortolom. Soddo asa thoim tollem kortolom ani suki zomin asa thoim zhori futto-xeô kortolom.
19. Oronneant devdar, babhull, benddi ani zoitun laitolom, ani mollar sorua borabor sailo ani mutthio roitolom.
20. Hê porim somest mon'xank disun ietolem ani gomtolem, sogllim chintunk poddtolim ani somzunk pavtolim, ki Sorvesporachea hatan hem sogllem kelam ani Israelachea Povitr Devan hem rochun haddlam.
21. Sorvespor mhonntta: 'Tumchê vatten kitem sangchem asa tem sangat.' Jakobacho Raza mhonntta: 'Tumche sakxi-purave dakhoiat.
22. Fuddarak kitem ghòddtolem tem tãnnim fuddem sorun amkam sangum-di. Adim kitem ghòddlam? Tem tãnnim poilench sanglam? Hôi tôr, ami chit diun polleum-ia. Vô amkam fuddarachi gozal sangat,
23. hachê magir kitem ghòddtolem tem amkam ugddapem korun diat, ani tumi dèv mhonn ami mandun ghetoleanv. Borem vô vaitt, kitem tori korun dakhoiat, tem polleun amkam ojap zaum-di vô akantumdi.
24. Polleiat, tumi kãich nhoi, ani khorem mhollear tumchean kãich korunk zaina; tumkam venchunk addop mhollear mon'xak okman!'
25. Ut'torek thaun Hanvem taka upzoilo ani to ailo, Udentê thaun Hanvem taka nanvan apoilo. Zoxem kumbar mati pãiamnim maddoita, toxem to odhikariank pãiam tolla chikla vori môstita.
26. Ami zanno zaunchê khatir, konnem tori magam oxem ghòddtole mmhonn sanglolem kai? 'Sanglolem toxench zalem' - oxem ami mhonnchê khatir, konnem punn purvkallim hem amkam kollit kel'lem kai? Konnench tem ugddapem korunk na, konnench porgôttunk na, tumi oxem sanglolem konnench aikunk na.
27. Hanvem ki soglleam adim Sionank porgôttlem: 'Him polle pavlim! Eka sondexkarak bori khobor gheun Hanvem Jerusaleak pattoilo.
28. Hanv polletalom, punn konnuch mellunk na; budh divpi vô vicharlear zobab diupi tanchê modem eklo porian na.
29. Soglle mellun te kãich nhoi, tanchean kãich korunk zaina, tancheô murti mhollear vareachi funk ani polkeponn.
