1. Jothamak, Uzziachea putak, Ahaz mhonnlolo êk put aslo. Ho Judacher razvôtt choloitalo tedna, Rejin, Aramacho raza, Remaliachea puta Pekasak, Israelachea razak, apnna bora-bôr gheun Jerusaleacher akromonn korunk gelo. Punntachean tem jikhun gheunk zalemna.
2. Davidachea Ghora-nneak ho nirôp pavlo: 'Aramachi fouz Efraimant riglea.' Hem aikun, ranant zhaddam varean haltat-kamptat têch bhaxen razachem ani porjechem kalliz hal'lem-kamplem.
3. Sorvesporan Izaiasak mhollem: 'Tujea puta Sheiar-Jashubak gheun, voilê tollie-chea kharijechea tonkar, Moddvollachea Xetachea rostear, Ahazak mellunk voch
4. ani taka sang: "Chotrai dhôr, thôndd rav, bhieum naka. Hea dogam dhunvor-tea inglleam pasot ani Razor, Aram' ani Remaliacho put, hanchea khôr raga pasot kalliz soddum naka.
5. Vô Aram', Efraim' ani Remaliacho put, hãnnim tujer guddmêll kela mhonnun akantum naka. Tãnnim oxem ievjilam:
6. Judacher dhadd ghalun tachi desvatt korum-ia ani taka amchea tabeant korum-ia; thoimTabeelachea putak raza korun bosoum-ia.
7. "Tôr Sorvespor Dev oxem sangta: Hem oxem zaunchem na; tem ghòddchench na.
8. (a) Aramachi razdhani Damask, ani Damaskacho odhipoti Razon.
9. (a) Efraimachi razdhani Samaria, ani Samariecho odhipoti Remaliacho put. (8b) Anink sôv vôpanch vorsam bhitôr Efraimacho bhông zaun, tem raj anink urchem na. (9b) Mhojem tumi sot mandina zaxat zalear, tumi-i urchinch nant!" '
10. Anink êk pavtt Sorvesporan Ahaza kodde uloun mhollem:
11. Sorvespora tujea Deva lagim tuka êk khunna mag: ti patallantlê kholaientli vô unch mollba veli zaum.
12. Punn Ahazan portipall kelo: 'Na, hanv magcho na, Sorvesporachi porikxa korcho na.'
13. Tedna Izaiasan mhollem: Atam chit diun aik, Davidachea Ghorannea! Mon'xanchi sõsnnikai tiddoilii ti puro na tuka? Atam mhojea Devachi-i tiddounk sôdtai?
14. Borem tôr, Pormesporuch tumkam êk khunna ditolo: Polle, êk tornni bail gorbhest zalea; ti eka putak zolm ditoli ani Im'manuel mhonn taka nanv dovortoli.
15. Vaitt sôddun diunk ani borem venchun kaddunk taka somzunk lagtolem tea disa porian tachem jevonn zatolem dhõi ani mhonv.
16. Hea bhurgeak vaitt sôddun diunk ani borem venchun kaddunk somzunk lagchê adim, jea dogam razank lagun tum soglloch thorthortai, tancho dês sarko padd zaun vetolo.
17. Efraim' Juda thaun kodd sorungela tedna thaun aile nant tosle dis tujer ani tujea lokacher ani tujea bapaichea Ghoranneacher Sorvespor ie-xe kortolo - To Assiriechea razak haddtolo.
18. Tea disa Sorvespor pirluk vazoun Nil Nodichea poixilea fantteam thaun Ejiptkarank kimsam vori Sapoun haddtolo, ani toxench Assiriekarank aplea desa thaun ganjilam porim apoun haddtolo.
19. Khol koddeamnim, khoddpanchea khanchim-veramnim, kantterea zhaddamnim ani sogllea santthovlolea udkamnim te ieun bostole.
20. Tea disa, Pormespor Nodi-polikoddcho vakhôr (mhonngê Assiriechea razak) gheun tokleche ani angache soglle kens tastolo.ani khadd-ui kapun uddoitolo.
21. Tea disa, êk-êk monis ek-ek paddkulem ani don-don menddram pôstolo,
22. ani tim itlem dud ditolim ki desant urleant tea soglleanchem jevonn dhõi ani mhonv zatolem.
23. Tea disa, zoim-zoim hozar rupeachea nanneancheô hozar dak-veli astaleô, thoim-thoim melltole fokot kantte ani kanttiô.
24. Thoim lôk dhonu ani bann gheun bhitôr sortolo, kiteak desant vostole fokot kantte ani kanttiô.
25. Adim kôslolea dongrancher kantteanchê ani kanttianchê bhirantin konnuch bhonvcho na; tea zageancher fokot chorvak vetolim gorvam ani firot astolim menddram.
