1. Oronnem ani suki-korddi zomin khuxal zaum, padd zomin sontosum ani sallkamnim fulon ieum;
2. Tika bhorpur fulam fulum; ti sontosan murgottum ani anondan gitam gavum. Tika nettounk dilea Lebanonachi mhoima, Karmelacho ani Sharonacho protap. Oxi soglleank bhôgunk melltoli Sorvesporachi mhoima, amchea Devacho protap.
3. Soglle thoklole hat ghôtt korat, koddkoddtolim dhompram thir korat,
4. bhivkuttea kallzank sangat: 'Dhir gheiat! Bhieum nakat! Polleiat, ho asa tumcho Dev, sudd gheunk ani nit korun diunk Dev ieta, To Apunnuch tumkam sôddounk ieta.'
5. Tedna kudd'ddeanche dolle ugòddtole, bhereanche kan ukte zatole,
6. Tedna merva bhaxen thontte uddi marunk lagtole, moneancheô jibô anondan gaitoleô. Kiteak oronneant udok vhanvtolem, padd zal'lea ganvant zhori futt'toleô,
7. Korddê zomnichem tollem zatolem ani sukê bhumintleô futt'toleô udkacheô zhori. Kole tthikann korun asle teô dholi loveamnim ani jhilkuttamnim dattien bhoron ietoleô.
8. Tevtten êk rajmarôg vetolo: 'Povitr Vatt' mhonn taka nanv poddtolem; opovitr lokak tê vatten vochunk mellchem na; zannvai-naslolim mon'xam thoim bhonvchim nant.
9. Thoim xinv anink aschech nant, savzam mhollear thoim pãi ghalchinch nant: soddvônn-mell'lolim mon'xam mat tea rostean choltolim.
10. Sorvesporan soddoil'lim sogllim portun ietolim, anondache ul'las sôddun tim Sionak pavtolim, tanchea mathear porzolltolo nirontôr sontosacho mukutt; sontôs ani khuxalkai tanchea sangata astolim, dukh ani haskar-suskar somptolim.
