1. Oronnea vatten aslolea Sela thaun Sion-Xarachea porvota porian desachea razak menddram dhaddat.
2. Halinch ghontterantlim bhair sorlolea bhivkuttea ani mat-mat uddtolea lhan suknneam sarkeô zatoleô Arnon nodi sorxim Moabacheô dhuvô.
3. Budh di amkam, amchê khatir nirnnoi ghe. Donparchea vellar, rat zal'lê porim tuji savlli vistarun dovor. Zollim-mollim dhanvddail'leank lipoi, pollun ietoleank dakhoun dium naka.
4. Moaba thaun dhanvddailoleank tujê sorxem ravum-di. Luttnnara add tankam tujê-xim xeronna ieum-di.' Zobordosti somptoli atam, nas kortoleacho nas zatolo, pãiam tolla prithum' mostitale te vetole.
5. Tedna visvaxi mogan xinvason thirail'lem urtolem: tacher, Davidachea tombu bhitôr, visvaxiponnan bostolo eklo mon'subidar. Ek-ekleache hok'k To fikirin rakhtolo ani rokddea-rokddem nit korun ditolo.'
6. Moabachea gorvachi khobor ami aikolea, tachea xim' naslolea gorvachi. Tachi mijas, tachem gorv, tachi urmottai - hea sogttachi khobor amchea kanar poddlea. Punn polki tachi boddai.
7. Hea pasot Moabkar lôk Moaba khatir vilap korta, sogllim bora bôr tim vilaptat. Kir-Haresetantlea kismisanchea voddeancho ugddas kaddun, sarkinch khontibhorit zaun tim pinrgotat.
8. Karonn Heshbonache molle lasun-sukun gele, toxench Sibmasachi dak-vêl; tiche ut'tom' dakanche ghons raxttranchea odhipotimnim nas korun uddoile. Magam ti Jazera porian pavtali, oronneant legun rigloli; tiche fantte doria pelean vistarlole.
9. Dekhun Sibmasachê dak-veli pasot, zoxem Jazer roddta, toxem hanv-ui roddtam. Heshbon ani Eleiales, mhojea dukamnim hanv tumkam ximptam. Karonn tujea follam vixim ani tujea dakanchê pikavollichea somoiar kanar poddtalo to gitancho avaz somplo.
10. Follam-molleantlo ubun gelo anondani sontôs. Dakam-molleamnim khell-gitam anink nant, khuxalkaieche ul'las thamble; kollombiamnim anink soro pillun kaddinant, utsovacho ghonnghônn sogllo bond poddlo.
11. Hea pasot Moaba khatir sogllem ang mhojem kin'noriê vori khontin kollvollta, Kir-Heresa pasot mhojem kalliz dukhin ddobddobta.
12. Thokon khorxeun Moab unch zagear vochot, tachea mondirant prarthnam korunk rigot, punn sogllem nirfoll: tachean kãich korunk zaunchem na.
13. Magam Sorvesporan Moaba add oso nirnnoi ghetlolo.
14. Atam Sorvespor hem jahir korta: 'Moabant ispa bhair lôk asun-ui, tachi tezvont podvi, muxarekarachim vorsam mêztat toxem mezun - tin vorsam bhitôr, soglli moddon vetoli; ani tacho urot to lôk bhov thoddo, kirkôll ani boll-naslolo zatolo.'
