1. Sorvespora, Tum mhozo Dev, hanv Tuji thorai vornnitam, Tujem Nanv vakhanntam, kiteak magam-thaun ievjil'lo Tuzo sonkôlp visvaxiponnan ani sotan Tunvem sadhun haddloi.
2. Karonn xarachi Tunvem kelii fatranchi ras, kottachem keleim nisontton. Porkeancho kil'lo atam anink xar nhoi, anink kednanch to novean bandon ieuncho na.
3. Dekhun bollixtt porza Tuka mhoima dita, nixttur raxttranchem xar Tujem bhem dhôrta;
4. kiteak Tum zalai durbollank kil'lo, dolldireank akantant xeronn, vadollant asôr, gorment savlli; kiteak nixttur mon'xancho svas hinvalleachea vadolla sarko,
5. sukea desantlê dhaddi sarko. Punn Tum porkea lokancho gollbôll thonddaitai, kupachê savllen gormi denvoitai. Oxem zulumdaranchem zoigit bond zaun veta.
6. Hea porvotar Sorvsoktivont Sorvespor ruchik-svadik khannanchem ek vhoddlem jevonn sogllea porzank toiar kortolo: ruchik-ut'tom' soreanchem vhoddlem jevonn, rosbhorit khannache jin'nos, gall'lolo ut'tôm' soro.
7. Sogllea lokancher poddlolo asa to dukhacho podd'ddo, sorv raxttrank pangrun dovorta tem chador tea Porvotar To kaddun uddoitolo.
8. To sasnnak Mornnacho bhosm kortolo. Soglleanchea poleancher vhanvtat tim dukam Sorvespor Dev pusun kaddtolo. Ak'khê prithver Aplê porjechi loz To kaddun uddoitolo, kiteak Sorvesporan oxem sanglam.
9. Tea disa oxem mhonnttolim: 'Polleiat, ho amcho Dev! Amchi soddvônn kortolo mhonn Tacher amcho visvas aslo: Hoch to Sorvespor, Tacheruch ami visvas dovorlolo. Amchi soddvônn Tannem keli dekhun, ami murgott'tanv ani ul'lastanv.'
10. Karonn Sorvesporacho hat hea porvotar asa. Zoxem tonn xennachê gairint mostitat, toxem To Moabak Aplea pãiam tolla mostitolo.
11. Penvpi penvtana aple hat vistarta toso, thoim to aple hat vistarit. Punn Sorvespor tachem gorv ani tachea hatanche soglle proitn damun dhôrtolo.
12. Tujim mozbut unch kottam To môddtolo, konsllaitolo ani dhul'lint xevttun uddoitolo.
