1. Dipam-zunveamnô, mhojem aikun gheiat; poixilea lokamnô, mhaka chit diat! Mhojê avoichea kusveant-thaun Sorvesporan mhaka apoilo, hanv zolmunchê adinch Tannem mhaka mhojea nanvan ulo kelo.
2. Dharichê torsadi sarki Tannem mhoji jib pazli, Aplea hatachê savllen mhaka lipoilo. Pazlolea banna sarko Tannem mhaka kelo ani Aplea poteant lipoun dovorlo.
3. Tannem mhaka mhollem: 'Israela, tum Mhozo sevôk, tum Mhaka mhoima haddtoloi.'
4. Punn hanv oxem chint'talom: 'Nirfollim vavurlom hanv, bexttoch hanvem sogllo mhozo jiv zhoroilo.' Tori astana Sorvespor mhojê hok'k rakhtalo ani Devachea hatant aslem mhojem inam'.
5. Aplo sevôk zaunk, Jakobak Tachê-xim portun haddunk, Israelak novean Taka ektthaim korunk, mhojê avoichea kusveant Sorvesporan mhaka akarlo. Sorvesporachea dolleam-mukhar mhaka man mell'lo, mhojem boll mhollear mhozo Devuch! Tôr hoch Sorvespor atam mhaka sangta:
6. Tum Mhozo sevôk zalear purona, Jakobachim kullam tunvem novean sthaplear purona, Israelachea urlolea zomeak tunvem portun haddlear pavona; punn prithumechea ximam porian Mhoji soddvônn pavchê khatir Hanv tuka raxttrancho uzvadd kortolom.'
7. Zachi lôk porva korich na, zacho raxttram kanttallo dhôrtat, zaka nixttur-zulmi raza gulama sarko vagoitat, taka Sorvespor, Israelacho Tarôk, Israel Povitr mhonn vondita To, oxem mhonntta: 'Tuka pollena fuddem ador-man diunk raza utthun ube ravtole, tujer dolle poddle toxe kunvor tuka pãiam poddtole. Sorvespor visvaxi mhonnun, Israelachea Povitr Devan tuka venchun kaddla dekhun, te oxem kortole.'
8. Sorvespor oxem mhonntta: Mhojê kurpechea vellar Hanvem tuka zap dili, taronnachea disa Hanvem tuka adar dilo. Hanvem tuka akarla ani Mhojê porjek korar zaunk tuka nemun dila. Tum dês novean sthaptoloi, padd zal'li daizachi zomin portun lokak vanttun ditoloi,
9. koidiank mhonnttoloi: 'Bhair sorat!' Kallokhant bosloleank mhonnttoloi: 'Cholat! Uzvaddak ieiat!' Rosteancher porian tankam chorôv melltolo, ani soglle kordde dongor chorvachem moll zatole.
10. Tankam tan-bhuk kodinch lagchi na, khôr varean ani suriachea dhogan tim ulpochim nant, kiteak Zo tanchi doia korta Toch tankam choloun vhortolo, udkachea zhorim-xim tankam vhorun pavoitolo.
11. Sogllea Mhojea dongrancher tankam roste ugddun ditolom, ani Mhoje rajmarog ubarun dovortolom.
12. Polleiat! Kitli pois thaun Mhoji porza ieta! Ut'torê thaun ani Ostomtê thaun tim ietat, Sinima thaun ietat tim polleiat!
13. Mollba, sontosbhorit za! Prithvê, anondache ul'las sôdd! Porvotamnô, khuxalkaien zôizôi gaiat! Kiteak Sorvesporan Aplê porjek dhir dilo, hal-upodre bhôgloleanchi To doia korta.
14. Sion mhonnttali: 'Sorvesporan mhaka soddun dili, Sorvespor mhaka visorlo.'
15. Konn-êk bail aplea dudachea ballak visrot kai? Apnnem zolm dil'lea bhurgeachi tika doia dischina kai? Punn ti porian visrot zalear, Hanv tuka kodinch visorcho na!
16. Polle, tuka Hanvem Mhojea hatanchea tollttar kantoun dovorlea, Mhoje dolle sodanch tujea kottancher asat.
17. Tuka novean bandun haddtole te dhanvun-dhanvun ietat, Tuka luttun tujem nisontton kelam te rokddech tuka sôddun vetole.
18. Tuje dolle matxe voir ubar ani tujê sobhonvtim polle: tuzo sogllo lôk zoma zaun tujê-xim ieta. Mhojeach jivachean soput gheun sangtam, - uloita to Sorvespor! - tim sogllim tuka nettounchim mannkam-rotnam zatolim, tuka tim hoklê vori xringartolim!
19. Tuzo dês atam osadd poddlolo, padd zal'lo ani nisontton kel'lo zago, punn thoim ravunk ieta tea lokak to bhov oxir zatolo, ani tuka luttun sôddlea te soglle pois-pois pavtole.
20. Tujea gopantlim kaddun vhel'lim tim tujim bhurgim anink êk pavtt tujea kanant oxem futfut'tolim: 'Ho zago mhaka ekdom' lhan, mhaka jieunk anink svat korun di gê!'
21. Tedna tum tujeach monant oxem chintunk poddtolii: 'Khoinchean mhonn him bhurgim mhaka zolmolim? Mhojea bhurgeam-ballank kaddun vhel'lim, hanv aslim vanztti, nirvaxi, mhojea ghorantli bhair ghal'li. Konnem tôr hankam lhan-vhodd kelim? Hanv sarkim eksurim zal'lim, tôr khoim thaun ailim him sogllim?'
22. Pormespor Dev oxem mhonntta: 'Polle, Mhojea hatan kuru korun Hanv raxttrank apoitam, porzam mukhar Mhozo bavtto ubartam: tujea putank tim aplê handdier dhôrun haddtolim, ani tujea dhuvank aplea bhuzancher uklun haddtolim.
23. Tuka rakhunk raza zatole tuje bapui, tuji ballgônn korunk tancheô kunvornni zatoleô tujeô avoiô. Saxttangim poddun tim tuka noman kortolim, ani tujea pãiam-xim dhul'l khatolim, Oxem Hanv Sorvespor mhonn tuka kollon ietolem; jim konn Mhojer visvas dovortat, tim kodinch lojek sampoddchim nant.
24. Zhuzariachea hatantli tachi lutt bollan kaddunk zait kai? Zulmi razachea tabeantlim konnachean tachea koidiank soddounk zata kai?
25. Toripunn Sorvespor oxem sangta: 'Zhuzariachea hatantlim koidi sutton vetolim, ani zulmi razachea tabeantli tachi lutt meklli zatoli. Tujê lagim zhuz kortat tanchê kodde khud Hanv zhuz kortolom ani tujea putam-dhuvank khud Hanv soddoitolom.
26. Tuka pilltoleank aplench mas Hanv khaunk ditolom, novo soro piel'lê porim aplench rogot pieun te bebde zatole. Tedna, Hanv Sorvespor tuzo Tarôk mhonn, Jakobacho Bollvont Dev tuzo Soddvonnar mhonn sogllea mon'xakullak kollon ietolem.'
