1. Hezekia Razachea chovdavea vorsa, Sennakeriban, Assirie-chea razan, Judachea sogllea kottancher poddon tim jikhun ghetlim.
2. Assiriechea razan Lakish thaun aplea sena-potik êk vhoddli fouz gheun Hezekia Raza-xim Jerusaleak dhaddlo. To Moddvollachea Xeta kodde veta tea rostear, voilê tolliechea kharijê lagim ieun toiar ravlo.
3. Rajnivasacho karbhari Hilkiacho put Eliakim', sochiv Shebna, ani razdut Joah, Asafacho put, taka mellunk gele.
4. Senapotin tankam mhollem: 'Hezekiak sangat: "Vorto raza, Assiriecho raza, oxem sangta: 'Khoincho tuka itlo visvas?
5. Bexttim pokoll utram boddaien uloun zhuzvidia ani foujêboll tuka melltat mhonn dista tuka? Mhojer kolpunk, konnacher mhonn tum patieun ravtai?
6. Tum Ejiptacher patieun asai mhonn gomta. Punn Ejipt mhollear mòddloli bet. Apnnak tenkta tacho hat ti tôpta ani bhitôr rigta. Tosloch to Faraoh, Ejiptacho raza, apnnacher visvas dovortoleam sorim.
7. Tumi ghoddiê mhaka sangxat: Ami Sorvesporacher, amchea Devacher, patietanv. Punn Hezekian Tachim unchlim devsthanam ani vedi môddlim ki na? Tannem Judachea ani Jerusaleachea lokak mhollem: Hêch vedi mukhar tumi saxttangim poddunk zai!
8. Tôr borem: mhojea dhonia Assiriechea raza kodde poiz mar: tum zôr don hozar ghoddesvar ube korxi, hanv tuka don hozar ghodde ditam.
9. Mhojea dhoniachea ekdom' kirkoll xipaiantlea ekleak tori tum pattim lottun uddoixi? Tori Ejipt tuka roth ani ghoddesvar ditolo mhonn tum patieun ravtai.
10. Tea bhair, Sorvesporachea hukuma virêt hea desachem ghorttann korunk hanv hea desacher choddun ailam mhonn dista tuka? Hea desacher akromonn kôr ani tachem ghorttann kôr': oxem khud Sorvesporan mhaka sanglam."'
11. Eliakim', Shebna ani Joah, hãnnim senapotik mhollem: 'Upkar korun tujea sevokam kodde Aramaik bhaxen uloi, kiteak hi bhas ami somzotanv; Judeia-chê bhaxen amchê lagim uloum naka; kottamnim aslolea lokak aikota toxem vhoddlean uloum naka.'
12. Punn senapotin mhollem: 'Fokot tumchea dhoniak ani tumkam heô gozali sangunk mhojea dhonian mhaka pattoila mhonn tumkam dista kitem? Urfattim, kottamnim ravtolea lokak teô kollounk mhaka pattoila, karonn, tumchêch bhaxen, tãnnim-i aplich ollxig khaunchi poddtoli ani aplench mut pieunchem poddtolem.'
13. Tedna senapoti ubo ravlo ani bob marun Judeiachê bhaxen tanne mmhollem: 'Vortea razacho, Assiriechea razacho, nirôp aikat:
14. Raza oxem mhonntta "Hezekiak tum kam fosounk dium nakat. Tumkam soddounk taka tank nanch.
15. Sorvespor amkam soddoitoloch, hachi amkam khatri asa; hem xar Assiriechea razachea tabeant poddchench na. Oslea utramnim Sorvesporacher visvas dovrat mhonn Hezekia tumchea monant ghaltolo, punn tumi oslea utranchea fasak sampddum nakat.
16. Hezekiak kan dium nakat, karonn Assiriecho raza oxem sangta: Mhojê lagim xanti korat,
17. tumkanch mhojê svadhin korat, ani tedna tumkam ek-ekleak ap-aplê dak-velichem ani ap-aplea anjirachem foll khaunk melltolem ani ap-aplea buiarantlem udok pieunk melltolem; magir hanv ietolom ani tumchea sarkea desant, mhonngê dhano ani dakam-soro, unddo ani dakam-molle aslolea desant, tumkam gheun vetolom.
18. Sorvespor amkam soddoitoloch, oxem mhonnun Hezekiak tumkam fosounk dium nakat. Khoinchea-i raxttracho konnuch dêv Assiriechea razachea chopkeantlo aplo dês soddounk kedna tori pavla mhonn asa?
19. Hamat ani Arpad, hanche dèvkhoim asat atam? Khoim asat te Sefarvaimache dev? Khoim pavle te soglle Samarieche raxttrik dèv? Samariek tãnnim mhojea chopkeantli soddoili kai?
20. Hea sorv desancheam devam modlea khoinchea devamnim aple dês mhojea chopkeantle soddoile? Ani atam to tumcho Sorvespor Jerusaleak mhojea chopkeantlem soddoitolo khoim?"
21. Punn te ogech ravle; kosloch tãnnim zobab diunk na, 'kiteak tumi taka zobab diunche nant', oso razan tankam hu-kum' ghal'lo.
22. Rajnivasacho karbhari Hilkiacho put Eliakim', sochiv Shebna ani razdut Joah, Asafacho put, aplim vostram pinzun Hezekia-xim porte gele. Senapotin sanglolem tem sogllem tãnnim taka kolloilem.
