1. Moaba vixim bhakit: Êkêch rati bhitôr, Ar nograchi luttmar keli tedna, Moab gollgollun ogoch poddlo. Êkêch rati bhitôr, Kirnograchi luttmar keli tedna, Moab gollgollun ogoch poddlo.
2. Lôk Dibonachea devmondirant choddun veta, roddnnem korunk unch zagear choddta; Nebocher ani Medebant Moab vilap korta. Soglleancheô tokliô tasloleô asat, ek-ekleachem khadd tasun kaddlam;
3. Sakafottem nhesun rosteancher bhonvtat, ani ghoranchea pattsancher vhoddlean rudon kortat. Nakeancher sogllim vilap korit asat ani dukamnim roddtat.
4. Heshbon ani Eleiales aroddtat, Jahaz porian tanchi bob aikum-ieta. Dekhunuch Moabache zhuzari koddkoddtat, tancho jiv virgholun veta.
5. Moaba pasot mhojem kalliz pinrgota! Pollun vetat tim Zoarak pavlim, Eglat-Shelishiya porian. Luhitachê choddter tim roddot-roddot choddun vetat. Horonaimachea rostear killonchi marit-marit choltat.
6. Nimrimachim udkam sukun gelim, atam asa fokot osadd zomin; tonn sogllem suklem, zhadd-palo morun gelo, hirvem-pachvem anink kãich na.
7. Dekhun tim apli soglli girestkai ubarun vhortat, apnnem samball'lolo sogllo orôv-purôv Impollichea Vhalla pelean vhortat.
8. Moabachea prantant sogllê kodden bobô ani hueli aikum-ietat; Eglaima porian tacheô killonchi gaztat, Beier-Elima porian teô killonchi pavtat.
9. Dimonachim udkam rogtan bhòrleant, ani anink-ui vignam Dimonacher ieunchim asat: Jim konn Moaba thaun pollun vetat ani jim konn tea desant urleant, tanchea angar êk xinv poddtolo.
