1. Mhoji budh magunk ienaslim tankam Hanvem Mhojê sorxim ieunk dilem, Mhaka sôdinaslim tankam Hanvem Mhojem dorxon dilem. Mhojem Nanv ghenaslem tea raxttrak Hanvem mhollem: 'Ho polle Hanv asam! Ho polle Hanv asam!'
2. Apnnak motint marta toxem vaitt marôg dhôrta toslea fitur lokak dôr-disa Hanv Mhoje hat vistartalom.
3. Mhaka rag haddtat toslim kortubam Mhojê nodrê mukhar hô lôk korit asa: bagamnim aple iodn bhettoita, vittancher dhump lhasta,
4. mel'leanchea somadim modem jieta, kallokhi konnxiamnim rat kaddta, dukrachem mas khata, ani aplea tattamnim oxud'dh jin'nos ghalun khata.
5. Tim oxem sangtat: 'Pois rav, mhaka hat lavum naka, na tôr mhoji povitrtai tuka lagot.' Oslim utram Mhaka fugar korpacho dhunvôr, sodam-zollto uzo.
6. Polleiat, Mhojê mukhar oxem boroil'lem asa: Hanv tancho sudd ghetolonch, tankam dagun ditolom, oxem kelea xivai Hanv ogo ravpacho na!
7. Tumchea guneanvak ani tumchea purvozanchea guneanvak borabôr khast laitolom: uloita to Sorvespor! Tãnnim porvotancher dhump lasla, dongrancher Mhoji ninda kelea; hea tanchea kortubam pasot map bhoro-sôr Hanv tancho sudd ghetolom.
8. Sorvespor oxem mhonntta: Dakamnim rôs aso-sôr lôk mhonntta: 'Arê, teô bhair uddoum nakat: tantum amkam axirvad asa.' Toxench Hanv Mhojea sevokam khatir kortolom: tancho soglleancho nas korcho na.
9. Jakoba thaun sonsôt upzoitolom, ani Juda thaun Mhojea porvotank daiji utpon'n kortolom. Te Mhojea venchloleanchea hatant poddtole ani Mhoje sevok thoim tthikann korun ravtole.
10. Mhaka xeronna ietolê Mhojê porjê khatir Sharon hinddank chorvachem moll zatolem, Akhorachea Vollant gorvam visôv gheunk pavtolim.
11. Punn jim konn tumi Sorvesporak sôddun vetat, jim konn tumi Mhojea povitr porvotachi porva korinant, jim konn tumi Gad devak jevnnachem mez manddtat, jim konn tumi Meni, noxibachea devak, borxil'lea soreanchim pivonn-patram bhôrun ditat,
12. tumkam Hanv torvarin kapun uddoitolom, tumi sogllim man bagaun kapakapik vetoleat, kiteak Hanvem tumkam ulo kelo punn tumi Mhaka zap dili na, Hanv uloilom punn tumi Mhaka kan diunk na, jem Mhojea dolleam mukhar vaitt tench tumi kelam, jem Mhaka mandvona tench tumkam mandlam.
13. Dekhun Sorvespor Dev oxem sangta: Mhojim chakram jevnnam kortat mhonn tumi polletoleat, punn tumi zalear upaxim urtoleat. Mhojim chakram borim pietat mhonn tumi dekhtoleat, punn tumi tanen sukun vetoleat. Mhojim chakram khuxali kortat mhonn tumi polletoleat, punn tumi zalear lojen bhoron tondd dhamptoleat.
14. Mhojea chakrank anondbhorit kallzan ul'lastana tumi aikotoleat, punn tumi zalear kallzachê khontin killonchi martoleat,
15. Tumi dovortoleat tem tumchem nanv gheun Mhojim venchlolim oso xirap ghaltolim: 'Sorvespor Dev tumkam jivexim marun uddoum!' Punn Aplea chakrank To dusrem ek nanv ditolo.
16. Prithumer jim konn apnnancher axirvad ghaltat, tim sotevont Devachea nanvan apnnancher axirvad magtolim; ani jim konn prithumer soput ghetat, tim sotevont Devachea nanvan soput ghetolim. Kiteak adlea vaittam-vignancher visôr poddtolo ani Mhojea dolleam mukhavelim tim nanch zatolim.
17. Polleiat, atam Hanv novo sôrg ani novi prithum' rochunk vetam, adlea kallachi anink iad aschi na, mon'xachea monant anink tacho ugddas ieuncho na.
18. Hanv rochunk vetam tachê khatir sontosbhorit zaiat, sodam-sodankal anondan murgottat. Karonn Mhoji novi rochnna mhollear 'Sontôs' zaunchem Jerusalem, ani 'Anond' zaunchi Mhoji porza.
19. Jerusalea khatir Hanv sontosbhorit zatolom ani Mhojê porjê khatir anondan murgott'tolom. Thoim anink aikunk ieuncho na rudonacho avaz ani vilapacheô bobô-hueli.
20. Thoim thoddech dis jiel'lem bhurgem anink aschem na, nhoi mhonn aplê piraiechim vorsam bhôrchê adim khoinchinch mhatarim morchim nant. Xembôr vorsam zaun mortolea mon'xank tornnim mhonnpachim, ani xemborank pavlim nant tea mon'xancher xirap poddla mhonn somzochem.
21. Tim ghoram bandtolim ani tantum ravtolim, dakanche molle roitolim ani tanchim follam khatolim.
22. Dusreank ravpak ghoram bandchim nant, dusreamnim follam khavpak zhaddam roichim nant. Mhojê porjechea jivitache dis eka zhaddachea jivita sarke zatole, ani Mhojim vinchlolim aplea hatanchim follam khatolim.
23. Tim nirfollim vavurchim nant, vaitt dis polleunk pavtolim toslea bhurgeank tim zolma haddchim nant, kiteak tim ani tanchim bhurgim-ballam Sorvesporacho axirvad ghetlolim mon'xam.
24. Tãnnim Mhaka ulo korchê adinch Hanv zap ditolom, tanchim prarthonam sompchê adinch Hanv tim aikotolom.
25. Landdgo ani menddurlo sangata chorvak vetole, paddea bhaxen xinv tonn khatolo, ani sorôp dhul'l khaun aplem pott bhôrtolo. Mhojea ak'khea povitr porvotar konn konnakuch dukh diuncho na, konn konnakuch vaitt korcho na. - uloita to Sorvespor!
