1. Sorvespor oxem sangta: 'Tumchê avoik Hanvem sôddun dilea kai? tôr tem logn-môddnneachem potr khoim asa? Vô tumkam Hanvem vikun dileant kai? tôr khoim asa to Mhozo savkar? Zanna zaiat, tumcheach opradham pasot tumkam vikun dileant, tumchea khotteponnam pasot tumchê avoik sôddun dili.
2. Hanv tumchê modem ailom tedna, koso mhonn Mhaka konnuch mellunk na? Hanvem ulo kelo tedna, koxi mhonn konnench zap diunk na? Tumkam soddounk Mhozo hat pavona kai? Tumchem taronn korunk Mhaka tank na kai? Hem zanno zaiat, Hanvem êk dhomkavnni dili tôr, doria sukun vetolo ani nodinchem zatolem oronnem; tantum firta ti maslli udok na zaun tanen mortoli ani kusun vetoli.
3. Mollob Hanv kallem korunk vetam, tem Hanv sakafottean pangrunk vetam.
4. Pormespora Devan khorea xisachi mhaka jib dilea. Thokloleank mhojea utran dhir diunk Toch mhojea tonddant utram ghalta. Utsuk monacho xis koso Apnnak chit diunk dôr-sokallim To mhoje kan zagrut korta.
5. Pormespora Devan mhoje kan ugôddleat ani hanvem portem boll korunk na, patt vollun hanv vochunk na.
6. Mhaka martoleank hanvem mhoji fatt dili, mhojem khadd oddun kaddtoleank mhoje pole dakhoile. Mhojeô kenddnniô kortale ani mhojer thimpi uddoitale tedna porian, hanvem mhojem tondd pelean kaddunk na.
7. Pormespor Dev mhojea adarak ieta, tea pasot hanv bemanachi porva korina. Teach pasot kufatra bhaxen hanvem mhojem tondd nibor korun dovorlam. Hanv lojek sampoddcho na mhonn hanv bêsborem zannom.
8. Nit korun mhaka soddounk ieta Toh anga laginch asa! Konn mhojer garannem korta zait? Hôi zalear, borabôr nitisobhent ube ravum-ia. Mhojer firiad korunk konn asa kai? Mhojê sorxim ieum-di taka!
9. Polleiat, khud Pormespor Dev mhojea adarak ieta: Mhojer khastichem formonn marunk konn tori fuddem sorot? Polleiat tankam, sannxen khaun uddoil'lea vostram vori tanchim zatat bontram.
10. Tumchê modlim konn tori Sorvesporachi bhokti kortat? Tôr Tachea sevokachea talleak tãnnim kan diuncho. Konn tumchê modlim uzvadd nastana kallokhant choltat zait? Tãnnim Sorvesporachea Nanvacher visvas dovorcho ani aplea Devacher patieun ravchem!
11. Punn tumi sogllim, uzo kortat tim ani chuddiô dhôrun bhonvtat tim, tumcheach ujeachea uzvaddan cholat, tuminch pettoil'lea chuddianchea uzvaddan bhonvat! Hench tumkam Mhojea hatantlem favo zatolem: oslea attevitteamnim tumi vollvolltoleat!
