1. Sorvespor Jakobachi doia kortolo, anink êk pavtt To Israelak venchun kaddtolo ani tankam tanchea khaxa desant tthikann korunk ditolo. Porkim mon'xam ieun Jakobachea Ghoranneak ektthovtolim.
2. Bhailim raxttram tankam gheuntanchea desant pavoitolim, ani Israelachem Ghorannem tankam Sorvesporachea desant apleô das-daxi korun ghetolem. Zãnnim tankam koidi korun vhel'lim, tankam tinch koidi kortolim, ani apnnank piddapidd diloleank apnnanchê svadhin kortolim.
3. Tuje koxtt ani vollvolle ani zobordosten tunvem bhôgleim tem gulam-ponn sompoun Sorvespor tuka visôv ditolo tea disa,
4. Babiloniechea raza add hem ovgit tum mhonnttoloi:' Khoim pavlo atam zulmi raza? Khoim pavli tachi urmottai?
5. Zo raja lokank dhopkear dhopko diun khast lait aslo, zo thambonastana piddapidd diun raxttrancher nixtturaien zulum' choloitalo,
6. to noxtteancho danddo, to zulmi razancho razdôndd, Sorvesporan môddun uddoilo.
7. Ak'khi prithum' svosth zalea, atam xant asa, sontosan ul'lasta.
8. Soru-rukh ani Lebanonache devdar tujem noxib polleun murgott'tat: "Tuka atam apttun sokla uddoilo mhonnttôch, anink konn amkam katrunk-kapunk fuddem sorona."
9. Tuka lagun amchê khal asa to Norôk tuka gheunk soglloch chollboll'la. Prithvechea sogllea mel'leam odhikariank Tuka noman korunk to zagoita. Raxttranchea somest razank aplea xinvasonam vele to utthoita.
10. Ek-eklo utthun te soglle tuka mhonnttole: "Mhonnttôch tum-i amchê bhaxen itlo osokt zaloi mum? Tum-i amchê sarkoch zaloi!
11. Tujea kin'norianchea songitam soit tuzo dobazo Norkant xevtton poddlo; Tujê ponda kiddeanchi khatt, ani tujê voir rontteanchem pangrunn.
12. Ê Disachea Noketra, ê Fanteachea puta, koso mhonn mollba velo xevtton poddloi tum? Tum raxttrank tujê khal chepun dovortaloi: tôr koso mhonn tuka dhornir xevttun uddoilo?
13. Tujeach monant tum oxem mhonnttaloi: 'Hanv mollba porian choddtolom; Devachea noketram poros odik unch mhojem xinvason ubartolom Ut'torê pelean, Sobhechea Porvotar hanv bostolom.
14. Kupam voir hanv choddun vetolom, Bhov Vortea Deva sarko zatolom."
15. Punn ho polle Norkant xevtton poddloi ani patallachê khorik pavloi mum rê tum!
16. Jim konn tuka polletat tim tuka barik topastolim ani tuji atanchi gôt polleun mhonnttolim: "Zannem ekdam prithum' haloili, ani rajeam konsllaun uddoilim, to hoch kai?
17. Zannem prithvechem kelem oronnem ani xaram-nograncho kelo vinas, ani aplea koidiank kodinch suttka dili na, to hoch kai?"
18. Raxttranche soglle raza ap-aplea fonddant manan nhidlole asat.
19. Punn tuka fôndd porian favo na zalo, ollxik zal'lê porim tuka bhair uddoilo. Zhuzant marlolim vô torvarin vidhlolim mon'xam patallant mudolachea fatrancher uddoil'lim asat; punn tuzo zago, vitt haddtolea sangaddea vori, tanchê raxi pondak.
20. Anink kednanch tum tanchea sangata fonddant purlolo ascho naim, kiteak tujea desachem tunvem nisontton keleim ani tujê porjecho nas keloi. Noxtteanchê pinddkechem nanv kednanch tichê pattlean urchem na.
21. Purvozanchea guneanva pasot tanchê sonstichi-i maramari korunk lagat! Oxem prithum' jikhun gheunk anink ti utthchi na ani aplea nogramnim ti anink sonvsar bhôrunk pavchi na.
22. Tanchê add Hanv utthtolom - uloita to Sorvsoktivont Sorvespor! Ani Babiloniechem nanvuch ani tichem kitem urlam tem-i nattak kortolom. Tankam bhurgim-ballam aschimnant, tanchi sonsôt urchi na - uloita to Sorvespor!
23. Tichem Hanv kortolom ek sallanchem xet vô ek chovonn. vid'vattacho zhaddu gheun, Hanv taka zhaddun uddoitolom - uloita to Sorvsoktivont Sorvespor!'
24. Sorvsoktivont Sorvesporan oso soput ghetla: 'Jem Hanvem ievjilam, tem dubavavinn zatolench; jem Hanvem tharailam, tem xarthi pavtolench:
25. Assiriechi podvi Hanv Mhojea desant môddtolom, Mhojea dongrancher tika Hanv pãiam tolla mostitolom. Tedna tichem zum tanchê voilem nisrun vetolem; tichem ojem tanchea khanda voilem poddtolem.'
26. Sogllea sonvsara ho nirnnoi ghetlolo asa; hoch to sorv raxttram add vistarlolo hat!
27. Sorvsoktivont Sorvesporan zôr nirnnoi ghetlo, konnachean to rôd'd korunk zait? Tannem zôr Aplo hat vistarlo, konnachean to addaunk zait?
28. Ahaz melo tea vorsa ucharlolem bhakit:
29. Filistevkaranchea ak'khea desa, tuka mar ghaltalo to danddo mòddlo mhonnun khuxali korum naka, karon sorpachea pileantlem furxem utpon'n zaunk xokta, ani hacho pilo êk uddto ar zatolo.
30. Punn ekdom' gorib asloleank Mhojea chorovantlem khaunk melltolem ani dolldireank sust add poddunk gavtolem. Punn tuji sonsôt zalear bhuken moro-xi Hanv kortolom, ani konn-ui urlim zalear tankam Hanv marun uddoitolom.
31. Darvonntea, rudon kôr! Xara, arddun bob mar! Filistikaranchea ak'khea desa, koddkoddun rav! Karonn Ut'torê thaun dhunvôr bhair sorun ieta, tanchê foujentlo konnuch sôddun pattim vochpacho na.
32. Tea raxttrachea niropiank koslo mhonn zobab diuncho? 'Sorvesporan Sion sthapun dovorlam, ani zulum' bhôglolê Tachê porjek thoim xeronn melltolem!'
