1. Jakobachea Ghorannea, haka chit di. 'Israel' hem nanv gheun astoleamnô, Juda thaun upzol'leamnô, chit diun aikat: Sorvesporachem Nanv gheun tumi soput ghetat, khorem, Israelachea Devak tumi ulo martat, khorem, punn khorea monan nhoi, promannikponnan-ui nhoi.
2. Tumi oxem mhonnttat: Ami Povitr Xarachim. Zachem Nanv Sorvsoktivont Sorvespor, tea Israelachea Devacher ami patieun asanv.
3. Jeô ghòddnniô ghoddon aileô teô Hanvem bhov purvilea kallar kollit kel'leô, Mhojea tonddantli tanchi khobor bhair sorli, Hanvench teô porgôtt keleô; magir okosmat Hanvem teô ghoddun haddleô.
4. Karonn tumi aplea vadeachim mhonn Hanv zanno aslom, tumchi man lokhondda sarki, tumchem kopal pitullê sarkem.
5. Dekhunuch bhov purvim thaun tea ghòddnnianchi khobor Hanvem tumkam sangun dovorloli. Teô ghòddchê adinch Hanvem teô tumkam porgott keleô. Oxem tumi mhonnunk pavchim nant: 'Mhojê murtin tem kelam, mhojê nokxil'lê protimen, mhojê koddhoil'lê protimen, tem rochlam.'
6. Hem sogott tumi aikolam ani dekhlam: kiteak mhonn tumi tem uktim sanginant? Atam anink noveô ghòddniô Hanv tumkam kollit kortam, gupit, tumi nokllo asloleô ghòddniô.
7. Teô atanch rochleat, adlea kallar nhoi, ani ozun porian tanchi khobor tumi aikunkuch na. Mhonnttôch tumchean oxem mhonnunk zaina: 'Hem tôr ami adim zanno asleanv.'
8. Na! Tumi hachi khobor aikunk na, hem tumi kãich nokllot, haka Hanvem tumche kan adim ugddunk nasle, kiteak tumi kitlim ghatki tim Hanv zanno aslom; avoichea kusveant-thaun fitur mhonn tumkam lêkhtat.
9. Mhojeach Nanva khatir Hanv Mhozo rag damun dovortolom, Mhoji ixim' rakhchê khatir Hanv sosnnikai dhôrtolom, tumcho nas korcho na.
10. Polleiat, Hanvem tumkam topasun xud'dh-nirbhel keleant, punn rupea bhaxen nhoi; hal-upodreanchea khornant ghalun Hanvem tumkam topasun kaddleant.
11. Hanv kortam tem Mhojêch khatir kortam. Kiteak mhonn Mhojem Nanv bhoxttaunk diunchem? Dusrea konnakuch Hanv Mhoji Mhoima sôddun diuncho na!
12. Mhojem aik, Jakoba, Hanvem venchun kaddlolea Israela: Ekloch Eklo, Hanv Poilo ani Nimanno!
13. Mhojea hatan prithumechi buniad ghalea, Mhojeach uzvea hatan mollob vistarlam. Hanvem tankam apoilear puro, tim borabor Mhojea fuddeant ubim zatat.
14. Tumi sogllim ektthaim zaiat ani aikat: tanchê modlea khoinchea devan hem ugddapem kelam zait? Zacho Hanv Sorvespor môg kortam, toch Babiloniê add ani Kaldeikaranchê sonsti add Mhoji khuxi palltolo.
15. Uloilam to Hanv, hôi Hanvuch, Hanvem taka apoila, taka Hanvem haddla, ani Hanvuch taka iesvont kortolom.
16. Lagim sorat ani hem aikat: Survatek thaun Hanv kodinch tumchê lagim guptim ulounk na. Heô vostu ghoddon aileô tedna, Hanv thoim aslom. Ani atam Sorvespora Devan Aplea atmeachea bollan mhaka dhaddla.
17. Sorvespor, tumcho Tarôk, Israel Povitr mhonn vondita To, oxem mhonntta: 'Hanv Sorvespor Dev, jem tumchea boreak tench tumkam xikoitam, ji vatt tumi dhôrunk zai, têch vatten Hanv tumkam vhortam.
18. Mhojea adniank tumi zôr kan dil'le, kai borem zatem! Nodi porim vhanvti tumkam xanti, ani doriachea lharam vori tumkam pavtem doiallaiechem nitivontponn!
19. Renvê sarki subham' zaum ieta tumchi sonsôt, renvechea konniam itlim tumchim bhurgim-ballam! Tanchem nanv Mhojea mukhavelem kodinch chirun vô pusun vechem nastem!'
20. Babiloniê thaun bhair sorat! Kaldeikaranchea desa thaun pollun ieiat! Sontosachea ul'lasamnim hem kollit korat, porgôtt korat, prithvechea poixilea ximam porian hi khobor gazoiat! Oxem sangat: 'Sorvesporan Aplea sevoka Jakobak soddoilo.'
21. Tannem oronneantlean vheleant tim kodinch tanen sukunk nant, tanchê khatir Tannem khoddpantlem udok vhanvo-xem kelem, Tannem khoddop fôddlem ani thoinchê-thoinch udok vhanvlem.
22. Khottea mon'xank xanti na, mhonntta Sorvespor.
