1. Aplea obhixikta Sirusa vixim Sorvespor mhonntta: Tacho uzvo hat Hanvem ghôtt dhôrla; to raxttranchi podvi moddun uddoitolo, razanchem zhuza-angtrann kaddun ghetolo; tachê mukhar xaranche darvontte Hanv ugôddtolom, ani te portun dhamplole asche nant. Tea Sirusak Sorvespor oxem sangta:
2. Khud Hanv tujê mukhar vetolom, unch-sokol asat te zage sopatt kortolom, pitullche darvontte moddun uddoitolom, lokhonddi addbareanche kuddkean'-kuddke kortolom.
3. Hanv tuka ditolom, gupit bhanddaram ani lipoun dovorloli dhon-girestkai; oxem Hanv Sorvespor, tujea nanvan tuka apoita To, Israelacho Dev mhonn tum vollkhunk pavtoloi.
4. Mhojea sevoka Jakoba khatir, Hanvem venchun kaddla tea Israela pasot, Hanvem tujea nanvan tuka apoila; tum Mhaka vollkhonaim, tori Hanvem tuka xrêxtt-vorto kelo.
5. Hanv Sorvespor, Ekloch Eklo; Mhojê bhair anink Dev na! Zori tum Mhaka vollkhonaim, tori Hanv tuka zhuzak toiar kortam.
6. Oxem, Mhojê bhair anink konnuch na mhonn Udente thaun Ostomtê porian sogllea mon'xamnim vollkhun gheunchem.
7. Uzvaddacho Rochnnar Hanv, kallokhacho Ghôddnnar Hanvuch. Sukh-sontôs dita to Hanv, nirbhag dhaddta to Hanvuch. Hanvuch, Sorvespor, hem sogllem kortam!
8. Mollba, voir thaun paus ghal, pausa vori denvoi doiallaiechem nitivontponn, kupantlem tem vhanvon ieum-di. Ukti zaum zomin ani upzum amkam Taronn! Tachê borabôr doiallaiechem nitivontponn-ui kirlon upzum: Hanv, Sorvespor, tem rochun haddtam.
9. Matiechea aidonam môdlem ek aidon aplea ghôddnnara kodde vad korit zalear, tachem padd zaum! 'Kitem kortai tum? Tunvem kel'lea aidonak hat nant!' oxem mati aplea kumbarak mhonntta kai?
10. Kiteak mhonn tum zolma haddtai?' oxem zôr konn aplea bapaik mhonnott, 'Kiteak mhonn tum zolm ditai?' oxem zôr konn aplê avoik mhonnott, tachem padd zaum!
11. Oxem mhonntta Sorvespor, Israel Povitr mhonn vondita To ani tacho Rochnnar: Mhojea putam-dhuvamvixim Mhojê lagim hixôb magunk tumi konn?! Mhojea hatanchea kamam vixim Mhaka budh diunk konn tumi?!
12. Hanvem rochlea prithum' ani ticher Hanvench mon'xam rochun ghaleant, Mhojea hatamnim mollob vistarlam ani tachea loskorank Hanvench hukum' ghaleat.
13. Doiallaiechea nitivontponnachi seva korunk Hanvench taka upzoila, ani soglleô vattô tachê khatir Hanv sopatt kortolom. Toch Mhojem xar novean bandun haddtolo, kosloch dôndd farik korinastana vô lônch dinastana pordexi zal'lê Mhojê porjek aplea desant portun haddtolo. Uloita to Sorvsoktivont Sorvespor!
14. Sorvespor oxem mhonntta: 'Tujê-xim pavtoli Ejiptachi dhon-girestkai, toxench Ethiopiecho veapar-dhondo ani angan lamb to Shebacho lôk: him sogllim tujêch adhin poddtolim, khoddeam-sankllimnim tujê pattlean cholun vetolim, tujê mukhar sorpott poddtolim ani tuka oxem prarthun mhonnttolim: 'Fokot tujea sangata Dev mellta; Tachê bhair dusro na; dèv mhonnttat te nanch!'
15. Khoreponnim Tum lipon ravta toslo Dev, Israelacho Dev Tum, Tarôk Tum!
16. Murti-korpi soglle lojen bhoron gondhollak sampoddtat, tokli bagaun chol'le aple.
17. Punn Israelachem Sorvespor taronn kortolo, sodankal togta toslem taronn taka ditolo. Tumi kodinch lojek sampoddchim nant, vô manbhông bhôgchim nant, kednanch na!
18. Karonn oxem mhonntta Sorvespor, sorgacho Rochnnar, prithum-ui rochlea ani akarlea ani thir korun dovorlea toch Dev; gondhollant dovrunk ti Tannem rochunk na, mon'xamnim thoim vosti korunk Tannem ti akarlea.
19. Hanv Sorvespor, dusro anink na. Guptim Hanvem kãi sangunk na, Prithumentlea kallkhea eka konnxeak ravun Hanv ulounk na. 'Gondhollachea zagear Mhaka sôdun kaddat', oxem Hanvem Jakobachê sonstik sangunk na. Hanv Sorvespor: sot tem Hanv sangtam, sarkem asa tench Hanv uloitam.
20. Raxttranchea nisonttonantlim jim tumi vanchleant, ektthaim zaun ieiat, sogllim lagim sorat! Jim konn lankddi murti uklun dhôrtat ani taronn diunk xokona toslea devak ulo martat, tankam mat-ui ginean na.
21. Uloiat, tumche purave manddat, ektthaim zaun eka-mekachi budh gheiat! Adim-fuddench hem konnem porgôtt kelam? ani adlea kallam thaun heô ghòddnniô konnem ugddapeô keleat? Hanvem Sorvesporanuch nhoi kai? Mhojê bhair anink Dev na. Nitivont ani taronn-diupi Mhojê bogor Dev nanch!
22. Prithumechea sogllea ximamnô, Mhojê-xim portun ieiat ani tumchi soddvônn zatoli, kiteak Hanv Dev, Ekloch Eklo!
23. Mhojeanuch Hanv soput ghetam; Mhojea tonddantlem bhair sorta titlem-i sot, pattim gheunk zaina toslem utor tem: sogllim Mhojê mukhar saxttangim poddtolim, Mhojem Nanv gheun soglleô jibô soput ghetoleô.
24. Tim mhonnttolim: 'Fokot Sorvespora thaun ietat doiall visvaxiponn ani boll!' Taka zolltalim tim sogllim lojen bhoron Taka xeronna ietolim.
25. Israelachi soglli sonsôt Sorvespora sovem neainit ani mhoima zôddunk pavtoli.
