1. Bel aptton poddta, Nebo thopkotton bosta, tancheô murtim zonavorancher ghaltat, ojhim vahitat tea mon'zatincher; Tim ojhim vahun heô mon'zati thoktat domtat.
2. Tim sogllim thopkotton bostat ani aptton poddtat, konnacheanuch hem vojem kaddun uddounk zaina, tim apunnuch pordesant gelim.
3. Jakobachea Ghorannea, Mhojem aik! Israelachea Ghoranneantlea ak'khea urlolea zomea, Mhojem aikun gheiat! Tumchea zolma thaun Hanvem tumkam samball'leant, avoichea kusveant-sun Hanvem tumchi kallji ghetlea.
4. Tumchê mhatarê piraiê porian Hanv toxench kortolom, tumche kens piko-sôr Hanv tumkam samballun vhortolom. Adim kelam toxem, adim tumkam samball'lleant toxinch, khud Hanv tumkam ubarn vhortolom ani tumchem taronn kortolom.
5. Konna lagim tumi Mhaka sôr korxat? Konna sarko mhonn tumi Mhaka dhôrxat? Teach panvddear amkam dovrunk konna sarko Mhaka korxat?
6. Tim aplê potientlem soddôll hatan bhangar kaddun ditat, rupem zokhun ditat. Eka xettik mozuri diun haddtat ani tachê koddli eka devachi murti korun ghetat, magir tika pãiam poddtat ani tichi puza kortat.
7. Tika khandar marun vhortat ani tika toiar kel'lea zagear ubi korun dovortat: tea zagea veli tichean halonk-dolonk zaina. Vaitta-vignantt kitlo-i tika ulo marxi, ti tuka zap diich na, akantak sampoddlolea konnakuch ti soddoina.
8. Hem monant dhôrat, papiamnô, ani chit diat, hachê vixim tumchea kallzant niall korat.
9. Adlea kallanchea ghòddnniancho ugddas korat. Hanv ekloch Dev, dusro anink Dev na, Mhojê sarko anink konn na!
10. Fuddarak kitem ghòddtolem tem Hanvem survatek thaun sangun dilam, jem ozun ghoddonk na, tem Hanv adinch kollit kortam! Mhoji ievzônn xarthi pavtolich, oxem Hanv sangtam. Mhaka zai tem Hanv kortolonch.
11. Udentê thaun Hanv eka savlleak apoun haddtam, poixilea desa thaun Mhojea vinchlolea mon'xak upzoitam. Hanvem sanglam tem Hanv kortolonch, Hanvem ievjilam tem Hanv xarthi pavoitolom.
12. Tumi, urmott kallzachea mon'xamnô, doiallaiechea nitivontponna thaun pois asloleamnô, Mhojem aikat.
13. Mhoji nit Hanv laginch haddtam, ti atam pois na, Mhojem taronn anink kallav korchem na. Mhojea taronnachem Hanv Sionak dan kortolom, ani Mhoji mhoima Israelacher porzollaitolom.
