1. Juda ani Jerusalea vixim, Amozachea puta Izaiasak mell'llolem dorxon hem:
2. Xevottachea kallar Sorvesporachea Mondiracho porvôt porvotam voir sthaplolo astolo. To sogllea dongram poros sunch ubarlolo astolo. Sogllim raxttram cholot-cholot thoim vetolim. Hispa bhair porza tachi vatt dhôrtoleô; ani teô oxem mhonnttoleô:
3. Ieiat, Sorvesporachea porvotar choddum-ia, Jakobachea Devachea Mondirant vochum-ia. To amkam Apleô vattô xikoitolo ani ami Tachea vattamnim cholunk pavtoleanv; kiteak Siona thaun ietoli Somurt ani Jerusalea thaun Sorvesporachem utor.'
4. Raxttram voir To odhikar choloitolo ani sorv porzanchi nit kortolo. Him sogllim raxttram apleô torvari môddun nangor kortolim ani aple bhale môddun koitiô kortolim. Ek raxttr dusrea raxttracher apli torvar ubarchem na, hea fuddem konnuch zhuzachi toiari korcho na.
5. Jakobachea Ghorannea, ie, Sorvesporachea uzvaddan cholun vochum-ia.
6. Hôi, Tujê porjek, Jakobachea Ghoranneak, Tunvem sôddun dilii, Udentichea parkhiamnim bhòrla dês, Filistevkaram sarke ghaddi thoim vostat ani hatant hat ghalun porkeam borabôr bhonvtat.
7. Tancho dês rupea-bhangaran bhòrla, tanchea bhanddarancho hixôb na; tancho dês ghoddeamnim bhoron gela ani hixôb-naslolea gaddiamnim;
8. tancho dês murtimnim bhòrla… Apleach hatkama mukhar, apleach bottamnim akarlolê vostu mukhar, saxttangim poddtat.
9. Gorvi man bagavon ravtoli, mon'xachi urmottai mati khatoli. Tankam Tum bhogsum naka.
10. Prithum' kampounk Sorvespor utthun ieta: Tachê bhoikôr dixtti mukhavelo, Tachê thoraiechea dobajea mukhavelo, khoddpam modem doddpun voch, dhul'lint lipun rav.
11. Tea disa mon'xanchem gorv moddon poddtolem, mon'xanchi urmottai mati khatoli, ekleach Sorvesporak melltoli vakhann'nni.
12. Jim konn aplem gorv, urmottai ani vhoddvik dakhoitat, tankam soglleank sokla uddoupak Sorvsoktivont Sorvesporan ho Aplo Dis tharaun dovorla:
13. Lebanonache soglle unch ani vhodd devdar, Bashanache soglle xindhur rukh,
14. soglle vhodd-vhodd porvot ani unch-unch dongor,
15. sorv unchle gopur ani sorv mozbut kottam,
16. Tarshisachim sogllim tarvam, ani soglleô moladik vostu, hea sorvancher add to Sorvesporacho Dis.
17. Tea disa mon'xanchem gorv moddon poddtolem, mon'xanchi urmottai mati khatoli, ekleach Sorvesporak mellttoli vakhann'nni,
18. ani soglleô murti sokla poddtoleô.
19. Prithum' kampounk Sorvespor utthun ieta: bhoikôr Tachi dixtt, tezvont Tachi thorai! Dekhun lôk khoddpam modem doddpun vetolo, dholimnim lipun ravtolo.
20. Mon'xamnim bhôzunk kel'leô rupeacheô murti ani bhangaracheô murti tea disa lôk chichondorank ani pakheank uddoitolo.
21. Prithum' kampounk Sorvespor utthun ieta: bhoikôr tachi dixtt, tezvont tachi thorai ! Tedna lôk khoddpanchea dholimnim ani tollpanchea khanchimnim pollun doddpun ravtolo.
22. Mon'xacher anink visvas dovrunkuch naka, nakachea puddantlea svasa bhair anink kãich na taka. Tôr tachem mol kitem?
