1. Nitik ani taronnak ravtat tim, Sorvesporachi vatt polleit asat tim, sogllim tumi mhojem aikun gheiat. Khoinchea khoddpantlim tumkam katrun kaddleant, khoinchê chiream-khonnintlim tumkam kaddleant, hem chintun polleiat.
2. Tumcho bapui Abraham ani tumkam zolm dila ti Sara, hancho ugddas korat. Hanvem taka apoilo tedna to ekttoch aslo, punn Hanvem tacher axirvad ghalo ani tachi sonsôt hispa-bhair vaddoili.
3. Khorench, Sorvespor Sionak dhir dita, sarkench ghorttann zal'lea Xarak To ghottai dita. Zaun gelam oronnem, tachi To kortolo Eden-bag; osadd poddlolê zomnichi To kortolo Sorvesporachi bag. Thoinsor aikum ietol e sontosache ul'las, dhin'vasnnechim gitam ani tust-gitancho avaz.
4. Porjê Mhojê, Mhaka chit di; Raxttra Mhojea, Hanv sangtam taka kan di! Karonn Mhojê thaun bhair sortoli Somurt, ani Mhozo niticho nirnnoi zatolo porzancho uzvadd.
5. Ovchituch Mhojê nitichem zoit lagim pavta, Mhojem taronn dixtti poddtolem, Mhozo bavllo porzanchi mon'subi korunk veta. Kinariô ani zunve Mhoji vatt polleit asat ani Mhojea bavlleacher visvas dovrun ravtat.
6. Tumche dolle ubarun mollbak polleiat, sokla prithumer nodor ghalat; mollob dhunvra vori nanch zatolem, prithum' vostram bhaxen zhoron viron vetoli ani ticher ravta to lôk kiddeam sarko morun vetolo, punn Mhojem taronn sasnnak togtolem ani Mhojea doiall vsivaxiponnak xevôtt ascho na.
7. Doiallaiechea nitivontponnachi tumkam vollokh asa, Mhojem xastr monant samballta tosli porza tumi, tôr Mhojem aikun gheiat: lôk tumchim khebaddam korta mhonn bhieum nakat, tumchi ninda kortat mhonn kalliz soddum nakat,
8. kiteak vostram bhaxen sannôs tankam khatoli, lonv zal'lê porim kidd tankam girastoli; punn Mhojem doiallaiechem nitivontponn togtolem sodankal ani pinddkechê pinddkent Mhojem taronn.
9. Utth! Utthun ie! Bollan bhoron ie, Sorvesporachea bavllea! Magam, purvinchea pinddkanchea kallar kel'leim toxem, atam-i utthun ie! Raksak kapun tache kuddke kele ani Arak aspas tôplo, to Tunch nhoi Ga?
10. Doria sukoilo, Mha-Sagorachim udkam Vallgoilim to Tunch nhoi Ga? Oxem, Tunvem soddoil'lo lôk poltoddi vecho mhonnun, tanchê khatir khôl doriantlean marôg ukto korun dilo, to Tunch nhoi Ga?
11. Hea pasot, Sorvesporan mukt kel'lim sogllim portun ietolim, zoitachim gitam gavun Sionant tim provês kortolim. Tanchea mathear nirontorim zhogzhogtolo sontôs, tanchea porivarant astolim anond ani khuxalkai, dukh ani roddnnem pollun vetolim.
12. Hanv, hôi Hanvuch, tuka dhir ditam. Tôr kiteak mhonn tum vinaxi mon'xak bhietai? Mon'xachea putachi gôt tonna sarki.
13. Sorvesporan, tujea Rochnnara, mollob vistarlam ani prithvek aplê buniadir thir korun dovorlea, tori Taka tum visortai; zo monis tuzo nas korunk sodanch toiar asa, tea zulmi mon'xachea raga mukhar dis-bhôr tum kamptai. Khoim pavlo to atam, zulumdaracho rag?
14. Niraxi zal'lea koidiachi suttka rokddich zaunchi zali; kallkhê khonnint to morcho na, jevonn nastana to urcho na.
15. Hanv Sorvespor, tuzo Dev, doria uchambôll korta ani tachim lharam gazo-xim korta To. Sorvsoktivont Sorvespor, hem Mhojem Nanv.
16. Hanvem Mhojim utram tujea tonddant ghaleant, tuka Hanvem Mhojea hatachê savllent lipoila. Mollob vistarlam ani prithvek aplê buniadir thir kelea toch Hanv Sionak mhonnttam: 'Tumi Mhoji porza!'
17. Utth, Jerusalea! Zagi za! Ubi rav! Aplea krodhan bhòrlolo pelo khud Sorvesporan tuka pieunk dilo. Ghunvôll haddta toslea pivonnacho nimanno thembo porian tunvem pieun kaddlo.
18. Tinnem zolm dil'lea bhurgeam modlo tika vatt dakhounk eklo porian na, tinnem lhan-vhodd kel'lea bhurgeam modlo tika hatak dhôrun vhorunk eklo-i na.
19. Dupett noxtt tujer poddlem - konn asa tuje churchure dhôrunk? Lutt ani desvatt, dukôll ani torsad - konn asa tuka buzounk?
20. Zallant poddlolea chitolla sarkim rosteanchea nakeam-nakeancher poddlolim asat tujim bhurgim. Sorvesporacho krôdh ani Tacheô dhomkavnniô anink sosum-nozo zaun tim poddleant.
21. Tôr hem aik atam, akantak sampoddlolê; sorean nhoi tori bebdi zal'lê, haka chit di.
22. Oxem sangta Dhoni Sorvespor, tuzo Dev, tujê porjecho Rakhnno: Polle, tujea hatantlo kaddun ghetam tuka ghunvôll haddta tea pivonnacho pelo, Mhojea krodhacho pelo. Tantlem anink portun tuka pieunk poddchem na.
23. Tuka piddapidd ditale te oxem mhonnttale: 'Zomnir aptton rav: tujer pãi dovrun ami cholun vetoleanv.' Ani tunvem tujê pattichi sopatt zomin kelii, tankam cholun vochpak tujê patticho rosto korun diloi. Tôr atam tancheach hatant to pelo Hanv ghalunk vetam.
