1. Mhojea mogiak ek git gaitam: tachea dakam-mollea vixim mhoji prema-kovita. Eka pikall dongrachê kuxik mhojea mogiacho êk dakam-mollo aslo.
2. Tannem to khonnlo ani gundde ba kaddun nitôll kelo, ani thoim ekdom' boreô dak-veli laileô. Tanchê modem tannem êk gopur bandlo, ani thoim êk kollumbi kantoili. Tika boreô dakô zatoleô mhonn to axeun ravtalo, punn zaleô teô ran'vôtt dakô.
3. Tôr atam, Jerusaleant ravtoleamnô ani Judachea mon'xamnô, Mhojê ani Mhojea dakam-mollea modem nit korat mhonn magtam.
4. Mhojea dakam-molleak anink kitem Mhojean korunk zatalem ani tem Hanvem korinastana dovorlam zait? To Mhaka boreô dakô ditolo mhonn ravtalom, tôr tannem Mhaka ran'vott dakô kiteak mhonn dileô?
5. Borem atam, Mhojea dakam-molleak Hanv kitem korunk vetam tem tumkam sangtam: Hanv tacho addo môddtolom, Ani taka chorvak sanddtolom, to maddounchê khatir tachem oddop môddun uddoitolom, ani sogllim taka pãiam tolla mostitolim.
6. Hanv taka padd zaunk sôddtolom: taka benddcho na ani khonncho na tacher jhilkuttam choddtolim ani kantte-kuntte voir sortole. Tacher paus ghalina zaunk Hanv kupank hukum' ghaltolom.
7. Hôi, Israelachem Ghorannem, hoch to Sorvsoktivont Sorvesporacho dakam-mollo! Ani Judachi porza mhollear Tachem opurbaiechem zhadd. To nitik ravtalo, mell'llem vikrail'lem rogot; promannikponnak ravtalo, kanar poddleô fokot pill'loleancheô hueli-bobô.
8. Jim konn ghorak ghor ani xetak xet zôddun gheun sogllo zago aploch kortat ani ak'kho dês aploch zal'lê porim thoim jietat, tancher xirap!
9. Sorvsoktivont Sorvesporan soput gheun mhojea kanant sanglam: 'Zaitim ghoram osadd poddtolim, vhodd-vhodd ani sundor ghoram konn tantum ravonastana urtolim.
10. Dha kollxe divpacho dakam-mollo fokot êk kollso soro ditolo, dha monn bim fokot êk monn pik ditolem.'
11. Jim konn fantear utthchê-utthun koddok fenni sôdunk bhonvtat ani pieun lal zaun rat kortat, tancher xirap!
12. Tanchea dhumxannank fokot kin'noriô ani vinne, dholkim ani vennu ani soro. Sorvesporachea kortutvank lokxuch dinant, Tachea hatanchim kamam mat-punn pollenant.
13. Hea pasot Mhoji porza oslê obudhik lagun pordesant vetoli; tiche vhodd-vhodd monis upaxim mortole, holko lôk tanen vollvolltolo.
14. Khorench, Norôk aplo gollo rund korun ugôddta ani aplim daddhmonnam ugddun gillunk ravta: mouz marun arddotat thoinch astana tichea kullivont mon'xank ani holkea lokak to girastolo.
15. Tedna vinaxi rochnna man bagaitoli, mon'xakull khala poddtolem, gorvan bhòrlole dolle lojen dhamptole.
16. Sorvsoktivont Sorvesporachea nirnnoia vorvim Tachi mhoima vaddtoli, Povitr Devachea nitivontponna vorvim Tachi povitrtai porgôtt zatoli.
17. Tedna apleach chorva-mollar zal'lê porim menddram chorvak vetolim, mottim vasram ani bokuddle ghorttann zal'lea zageancher aplem pott bhôrunk vetolim.
18. Jim konn naddbudhichea bandpasamnim khotteponn oddun haddtat, ani gaddiechea doramnim zal'lê porim pap oddun ghetat, tancher xirap!
19. Tim oxem mhonnttat: 'Soddsoddit! Tannem Aplem kam' begobêg korchem ani ami tem polleunchem! Israelachea Povitr Devachi ievzônn vegim ghoddon ieunchi, sakar zaunchi, ani amkam ti bhôgunk mellchi!'
20. Jim konn vaittak borem ani boreak vaitt mhonnttat, jim konn kallôkhak uzvadd ani uzvaddak kallôkh mhonn dhôrtat, jim konn godd tem koddu ani koddu tem godd mhonn lêkhtat, tancher-ui xirap!
21. Jim konn apunnuch zannar mhonn chint'tat, ani apunnuch xanni mmhonn somzotat, tancher xirap!
22. Jim konn bebdikaient gollon-lollon boddai dakhoitat, ani koddok soro borsun pieun mijas kortat, tancher xirap!
23. Jim konn lônch khaun guneanvkarank niropradhi korun sôddtat ani borea mon'xank nit korun dinant, tancher xirap!
24. Dekhun, zoso bhatoddo ujeant lason veta ani zoxem tonn ujeant bhosm zata, toxem tanchem mull kusun vetolem, tanchim fulam dhul'li vori ubun vetolim, kiteak Sorvsoktivont Sorvesporachi tãnnim Somurt sôddun dili ani Israelachea Povitr Devachea utrachi beporva keli.
25. Hea pasot Sorvesporacho rag Tachê porjecher pettla, tankam marun uddounk Tannem Aplo hat ubarla. Porvot kolkol'le, moddim xenna bhaxen rosteancher poddlolim asat. Tori Tacho rag ozun thôndd zaunk na, Tacho hat ozun ubarlolo asa.
26. Bavtto ubarun poixilea raxttrank To apoita, pirluk vazoun sonvsarachea ximam thaun tankam apoita. Polleiat, dorvoddan, soddsoddit timietat!
27. Tanchê modem eklo porian osokt nhoi, thoklolo na, eklo porian jemena vô nhidona, konnachoch pott'tto dil na, konnacheach vhannancheô vadiô tuttloleô nant!
28. Tanche bann dhariche, tanche dhonu tann kel'le asat, tanchea ghoddeanche khur tollpa sarke, tanchea gaddianchim chakam vadolla sarkim.
29. Tancho gorôz xinvinnechea goroza sarko, xinvachea petteam bhaxen te gorôz ghaltat. Gorôz ghalun ghalun apli xikari dhôrtat, tika ubarun vhortat, ani konnachean tika sôddoum nozo.
30. Doria ghongheta toso to dis desacher ghongheun ieta. Desacher nodor marlear, soglloch kallôkh ani tollmolle! Kupamnim uzvadd dhampon gelo.
