1. Vhoddlea tallean bob marit rav, turturê sarko tuzo tallo ubar Mhojê porjek tiche guneanv kolloi; Jakobachea Ghoranneak tachim patkam vollkhum-di.
2. Apunn sodanch promannikponnan cholpi ani aplea Devachi Somurt kodinch sanddunk na toslem raxttr zal'lê porim, disan'dis Mhaka sôdunk ietat, Mhojeô vattô vollkhunk axetat. Mhojê lagim nitiche nirnnoi magtat, Dev apnnank lagim ail'lo polleunk otrektat.
3. Oxem mhonnttat: 'Tum amcho upas polleuncho naim zalear, kiteak mhonn ami upas korcho? Tum lokx diich naim zalear, kiteak mhonn ami amchea jivak donddvônn diunchi?' Polleiat, tumi upas kortat teach disamnim tumchich khuxi tumi kortat, ani tumchea vavraddiank piddapid dditat.
4. Aikat! tumchea upasacho faido kitem? Zhogddim ani uzôt korop ani vaitt monan mutti marop. Aiz porian tumi korun aileant toslo upas korun, tumcho tallo kodinch voir sorgar pavcho na.
5. Konn-eka mon'xan aplea jivak dukh dili mhonnun, mani bhaxen tokli bagaun to bhonvlo mhonnun, sakafottear ani gobracher add poddlo mhonnun, Mhaka avoddta toslo upas tannem kelo zait? Osleak tumi upas mhonnttat? Haka Sorvesporak man'ta toslo upasacho dis mhonncho?
6. Mhaka koslo upas man'ta to nokllot kai tumi? Oniticheô sanklli môddat; peleacher ghalam tem zum sôddun kuxin uddoiat; dolitank mekllim korun vochunk diat; ani sogllea jin'sachem zum moddun uddoiat;
7. bhukel'leank tumchem jevonn vanttun diat, ani ghor-dar nasloleank biradd diat; konn vingllo asa mhonn pollexat-tôr, taka nhesunk-pangrunk diat; ani tumcheach masa-rogtacheank sanddum nakat.
8. Tedna fantea porim tumcho uzvadd udetolo ani tumche ghai rokddech pekon ietole. Tumi bhôgchem doiallaiechem nitivontponn fuddeant vetolem, ani tumchê pattlean ietoli Sorvesporachi mhoima.
9. Tumi ulo martoleat ani Sorvespor tumkam zap ditolo; tumi Taka apoitoleat ani To mhonnttolo: 'Ho polle Hanv hangach asam!' Tumi zulumachem zum môddun uddoixat, konnacher mutt ubarina zaxat, ani okmanachim utram ucharina zaxat,
10. tumkam unnem korun bhukel'leank jevunk dixat, ani hal-upodre bhôgtoleanchea gorzank pavxat zalear, kallokant tumcho uzvadd udetolo ani tumcho kallôk donparchea vota sarko zatolo.
11. Sorvespor tumkam sodanch vatt dakhoitolo, tumchea sukea-korddea desant tumkam dhadoxi kortolo ani tumchê kuddik novi ghottai ditolo. Ani tumi zatoleat êkê ximplolê bagê sarkim, kodinch sukun vochona toslê zhori sarkim.
12. Ghorttann zal'lem xar tumi novean bandtoleat, adlea buniadincher novim ghoram ubim kortoleat. 'Mòddlolim durgam sarkim korpi' ani 'padd-zal'lim ghoram novean bandpi', oslim nanvam tumkam poddtolim.
13. Son'var tumi môddina zaxat, Mhojea povitr Disa tumcho veapar-dhondo choloina zaxat, Son'varak tumi 'Sontosacho Dis' mhonnxat ani Sorvesporak bhettoil'lo Dis 'Manacho Dis' mhonn lekhxat, tea disa vattek lagona zaxat, tumchench kam' ani dhondo korina zaxat, ani peleacheô bekar chaddiô korunk bosona zaxat zalear,
14. Sorvespora sovem khoro sontôs tumi bhôgtoleat, ani Hanv tumkam zoitivont korun desachea dongram voilean choloun vhortolom. Tumchea bapai Jakobachem daiz tumkam bhôgunk ditolom. Hanv, Sorvespor, hem sangun dovortam!
