1. Ejipta vixim bhakit: Eka dhanvtea kupa voir bosun ho polleiat Sorvespor Ejiptant ieta. Ejiptache kudde dev Tachê mukhar kamptat, ani Ejiptkaranchim kallzam tanchê bhitôr virgholun vetat.
2. Ejiptkarank Hanv ekamekacher add challoitolom ani te zhogddim-loddai kortole, bhav bhava lagim, ixtt ixtta lagim, ek xar dusrea xara lagim, ek raj dusrea rajea lagim.
3. Ejiptachem mon sarkench mòddtolem, kiteak Hanv tancheô ievzonnô fiskottaitolom. Kuddea devank ani ghaddiank bhutmontriank ani jaduvaleank te aple prosn ghaltole.
4. Hanv Ejiptkarank eka nixttur dhoniachê adhin korunk vetam; êk krur raza tancher sot'tia choloitolo - uloita to Dhoni, Sorvsoktivont Sorvespor!
5. Nilachim udkam komi zait vetolim, nôd sukun korddi zomin zatoli,
6. Vhallank ietoli ghann-ghutt'ttan, Ejiptantleô nodi denvun sukun vetoleô, kusun poddtolim betam ani love,
7. Nilachea kinarianchim sogllim zhaddam; Nilacho zhadd-palo sogllo suktolo, ubun vetolo, nanch zatolo.
8. Kharvi lôk pinrgotolo, Nilant goraitat te soglle khontibhorit zatole, udkamnim zallam martat te vilaptole.
9. Sonnkar fottovtole, toxench pinzari ani dhovea lugttache vinnpi.
10. Vinnpianchem mon mòddtolem ani sogllea kamgaranche hatpãi golltole.
11. Zoanache sordar sarke pixe, ani Faraohchea sogllea-vôn xannea montriank murkheanchi sobha mhonnchi. Hanv xannea mon'xancho xis, hanv purvinchea razancho xis' -oxem tujean Faraohk koxem mhonnum-iet?
12. Khoim pavle atam tuje xanne monis? Sorvsoktivont Sorvesporan Ejipta vixim kitem korunk ievjilam, tem, soglleank kollchê khatir, tãnnim tuka sangchem!
13. Zoanache sordar pixe zaun geleat, Nofache sordar apnnankuch fosoitat; Ejiptachea prantanche odhipoti taka naddun addmargan vhortat.
14. Tanchê bhitôr Sorvesporan orthacho onôrth korta toslem khottem mon denvo-xem kelem. Zoso êk bebdo aplêch onkint nisorta, toxech te Ejiptak sogllea aplea kamamnim nisrun poddo-so kortat.
15. Ani Ejiptachem ek-ui kam' sufoll zaunchem na, konn-ui tem korum - tokli vô xempddi, khazur-madd vô lovo.
16. Tea disa, jedna Ejiptacho lôk Sorvsoktivont Sorvesporacho hat ubarlolo dekhtolo, tedna to bailam sarko zatolo, bhivkutto, kamplolo.
17. Judacho dês Ejiptak thorthoro ghaltolo. Ejiptak konn-ui hacho ugddas porian korit zalear, tacher ietolo kampero; Sorvsoktivont Sorvesporan apnnak oslem nirmonn ievjilam mhonnun oxem taka bhògtolem.
18. Tea disa, Ejipt desantlim panch xaram Kanaan'chi bhas uloitolim ani Sorvsok-tivont Sorvesporachea Nanvan soput ghetolim, tantlea ekak Suriachem Xar mhonn nanv poddtolem.
19. Tea disa, Ejipt desachea mazar Sorvesporak bhettoil'li êk vedi ubarloli astoli ani, ximê lagim, Sorvesporachea manak ubarlo loêk khambo.
20. Hi zatoli Ejipt desant Sorvsoktivont Sorvesporachi êk khunna ani govaiki. Zulum' bhôgtat tedna Ejiptkaram Sorvesporak ulo martolim ani To tankam nivarunk tanchê-xim eka tarokak ani fuddariak pattoitolo.
21. Sorvespor tankam Apnnachi vollokh ditolo, ani tea disa Ejiptkaram Sorvesporak vollkhun ghetolim. Taka iodn ani orovachim danam bhettoitolim; toxench tim Sorvesporak angovnnô kortolim ani teô palltolim.
22. Sorvespor Ejiptkarank khast laitolo, ani ti lailea uprant To tankam borim kortolo. Tim Sorvespora-xim portun ietolim ani To tanchim prarthonam aikotolo ani tankam novean borim kortolo.
23. Tea disa Ejipta thaun Assiriê porian êk rosto astolo. Assiriekaranchean Ejiptant vochunk zatolem, ani Ejiptkarank Assirient vochunk melltolem. Ejiptkaram ani Assiriekaram borabôr Sorvesporachi seva kortolim.
24. Tea disa Israel Ejiptacho ani Assiriecho tisro vangddi zatolo: hoch zatolo ak'khê prithumek axirvad!
25. Hea utramnim Sorvsoktivont Sorvespor Aplo axirvad ghaltolo: 'Ejipt Mhoji porza: tacher axirvad! Assiria Mhojea hatanchi rochnna: ticher axirvad! Ani Israel Mhojem daiz: tacher axirvad!'
